“Ilisimatuutut misissukkat illit ulluinnarni inuuninnut qaninnerulernissaat Arctic Hubimi suliniutigaarput”

Anna-Sofie Skjervedalimik ateqarpunga. Arctic Hubip allatseqarfianni aqutsisuuvunga.

Allaatiginnittoq Anna-Sofie Skjervedal

Immaqa maluginiarsimavat ilisimatusartorpassuit Nunatsinnukartartut. Kalaallit Nunaat ilisimatusarnermi qitiusorujussuanngorsimavoq. Ingammik silap pissusia allanngoriartormat. Tamanna nunarsuarmut tamarmut sunniuteqaraluartoq maani malunnarneruvoq.

Arctic Hubimit sulissutigineqarpoq Kalaallit Nunaanni ilisimatusartut paasisaat ilisimatusartut aallaraluaraangataluunniit maani atorluarneqartarnissaat. Ilisimatuutut misissukkat oqartussanut, suliffeqarfinnut, ilinniarfinnut minnerunngitsumillu nunatsinni innuttaasunut anngunnissaat sulissutigisarparput. Ilisimalikkat inuiaqatigiinnut iluaqutaaneruniassammata.

Ilisimatusarneq uummatitut kassuttutut takorlooriaruk. Ilisimasassanik iluatinnartunik ulikkaarpoq. Ilisimasat kaaviiaarluarnissaat, suna tamaat aqqusaarlugu ingerlaarluarnissaat – ilinnuttaaq anngussinnaanissaat – Arctic Hubimi sulissutigaarput.

Ilisimatuutut misissukkat illit ulluinnarni inuuninnut qaninnerulernissaat Arctic Hubimi suliniutigaarput. Ilaatigut ilisimatusartut nunatsinni suliniuteqartartunut attaveqalernissaannut ikiortarpagut. Ilisimatusarnermi ilisimalikkanik saqqummiussisarpugut. Workshoppertitsisarpugut. Inunnik attaveqatigiilersitsisarpugut.

Arctic Hubimut tunngasunik paasisaqarnerusinnaavutit ilisimasallu qanoq tamanut ammasunngortittarnerigut paasisaqarfigilaarlugu 👇