”Inuit puujortarpaat kalaallisuut taama isikkoqartuaannarsimanngitsut”

Allaatiginnittoq Nicoline Larsen

Rosannguaq Rossen kalaallisuuni ilisimasaqarfigilluarsorisimagaluarpai. Kalaallisuulli oqaluttuassartai isumaalu pillugit misissuilerami tupaallaatigisarpassuaqarsimavoq. Ph.d-imik suliniutini suliarineratigut, “Branding gennem moden – den vestgrønlandske kvindedragt som symbol”, tamanna paasivaa, taannalu Ilisimatusarfimmi allallugu.

Assersuutigalugu suliami ingerlannerani Rosannguaq Rossen paasilerpaa ”malittarisassat” assersuutigalugu annoraap qalipaataanik qanoq ittumik atuinissaq, qatanngutigiinniat herrnhut-inut tysk-iusunut aallaaveqartut. Taamaammat ullutsinni kalaallit arnat tungujortumik qalipaatilimmik annoraaqaraangamik tysk-it ileqquannit tamanna aallaaveqarpoq.

Rosannguaq Rossen nammineq oqarnera najoqqutaralugu kisimiunngisimanngilaq kitaamiusut arnat kalaallisuui assuutit pillugit oqaluttuassamik ilisimasaqarsimanngitsoq. Assersuutigalugumi tikkuarpaa tunngaviusumik malittarisassaqanngivissoq kikkut qanorlu kalaallisuunik assuutaasunik atuinissaat.

“Inuiaqatigiit kalaallit puujorluinnarpaat siuaasami assuutit nikerartumik allanngorartissimagaat mutiusullu ataavartumik allanngorartiinnavissimagaat,”

Sapanngat nuilaqutit kitaani arnat kalaallisuuini assutini ilisarnaataaqisoq assersuutigalugu ukiunik ´taamaallaat´ 150-inik kingumut utoqqaassuseqarpoq. Ullumikkut allaaneroqaaq aallaqqaataani isikkuminit. Siullermimmi aallaqqaammut nuilaqutit naatsuaraasimapput, ullumikkulli tueq tikillugu takussuseqarlutik.

Rosannguaq Rossen najoqqutaralugu sapangat nuilaqutit aamma tassaapput kitaamiusut kalaallisuut assuutaasut kultur-ikkut assigiinngitsorpassuarnik tunuliaquteqarfiusut naperarfiisa takussutissartai, tamatumani kalaallit europa-miullu kultur-ikkut naapinnerisa takussutissartaasa ilai. Sapanngammi kalaallit arfanniat holland-imeersunit niuernermikkut aallarniutigalugu pissarisarivaat.

Aammattaaq Rosannguaq isumaqarpoq kalaallisuut assuutit ”illernartitatut” massakkullu isikkumisut allangutsaalineqartariaqarnerinik isigisassanngortinneqarneri eqqunngitsumik takussutissiissutaasoq. Rosannguaq Rossen najoqqutaralugumi aalajangersimasumik kalaallisuut assuutaasut isikkoqarnikuunngisaannarmata. Illuatali tungerluinnaanut oqaluttuarisaanikkut nunarsuup sinneranik akulerukkiartornerni arlaleriarluni allanngoriartortinneqarsimammat.

Rosannguaq Rossen Immikkoortortaqarfimmi pisortaq, adjunkti, ph.d.

Kulturimik, Oqaatsinik Oqaluttuarisaanermillu Ilisimatusarfik

Oqaasilerinermut, Atuakkialerinermut Tusagassiuutilerinermullu Immikkoortortami. Kitaamiut kalaallisuui assuutit pillugit ilisimatusarnera pillugu oqaluttuartoq nittartakkap qulaatungaaniittoq tusarnaaruk.

Rosannguaq Rossens ph.d.-imik ilisimatusaatigalugu allataa “Branding gennem moden – den vestgrønlandske kvindedragt som symbol” tamakkerlugu uani atuaruk.