Apeqqutigineqakulasut...
Hub sunaava?
Teknikikkut taaguusersuutini hub tassaavoq ataqatigiiaani ataasiakkaat imminnut attaveqarnissaannut atuuttoq. Uagut hub-erput aamma taamatut atuuppoq, kisianni inuit akornanni. Uagut soqutiginnittunut assigiinngitsorpassuarnut ataqatigiiffiuvugut, ajornannginnerusumik inuit ilisimasat pillugit imminnut attaveqarfigisinnaalerniassammata.
Arctic Hub qanoq aningaasalersorneqarpa?
Kalaallit Nunaata Danmarkillu suleqatigiinnerisigut Arctic Hub nunanit taakkunannga aningaasalerneqarluni pilersinneqarpoq. Kalaallit Nunaanni aningaasaqarnikkut inatsimmi ukiumut koruuninik 750.000-nik immikkoortitsiffigineqartarpoq, ukiunilu 2019-imiit 2022-mut danskit aningaasanut inatsisaanni koruuninik milliuuninik pingasunik tassunga immikkoortitsisoqarsimalluni. Nunat assigiinngitsut akornanni ilisimatuutut misissuinermi qitiusumik Nuummi sullissiveqarnissaat suliniarnermi siunertarineqarpoq, taannalu issittumi ilisimatuutut misissuinermi aallavittut katersuiffiusaq.
Ilisimatuutut suliniutinnut Arctic Hub peqataasinnaava?
Arctic Hub ilisimatusaatigalugu suliniutini suleqataaneq ajorpoq. Arctic Hub suliniutini, aningaasaateqarfinnut qinnuteqarnerni assingusunilu suleqataatikkumallugu uagutsinnit allakkatigut akuersissuteqartariaqarputit. Nunaqavissunilli suleqatissarsiorninni ikiorusuppatsigit.
Arctic Hub-ip ilisimatuussutsikkut suliniutiga ingerlateqqissinnaavaa?
Taamaattoqarsinnaavoq. Ilisimatuutut misissuinerit toqqakkat suliaqarfiit nunallu killeqarfii akimorlugit Arctic Hub-ip ingerlateqqittarpai. Aamma nittartakkatsinni inuillu attaveqaqatigiittarfiini taamaaliortarpugut, aamma Kalaallit Nunaanni nuna tamakkerlugu aviisi saqqummersartoq Sermitsiaq suleqatigaarput. Suliniutivit amerlanerusunut anngunnissaa kissaatigigukku attaveqarfiginissatsinnut tikilluaqqusaavutit ilisimatuutullu misissuinerit oqaluttuaralugu. Taava sukumiinerusumik misissorsinnaavarput taassuminngalu ikiorsinnaanerlutit nalilerlugulu. Kalaallit Nunaanni eqqaanilu ilisimatuutut misissuinerit tamakkerlugit ingerlateqqissinnaasassanngilavut, taamaattorli sapinngisarput naapertorlugu ilisimatuutut misissuinerni assigiinngitsuni sullissilluarniarsarisarpugut.