Anguniagaq aamma takorluugaq

Tassaavoq qanoq iliorniarnerput

Anguniagarput

Arctic Hub-imi suliniutivut tamavimmik Kalaallit Nunaanni ilisimatusarnikkut ingerlanneqartunik uummammioqarput. Suliassaraarput ilisimasat pitsaasumik ingerlaarnerat isumagissallugu, ilisimasat ajornanngitsumik ataqatigiimmik aaqqissuussaanikkut ingerlaarsinnaaqqullugit. Ilisimatusarnikkut inuiaqatigiinnilu naapeqatigiinnerit aqqutigalugit ataqatigiilersitsiviuvugut, ilisimatuullu inuussutissarsiortut, oqartussat, ilinniartitaanermilu ingerlatsiviusut kiisalu nunat tamalaat akornanni suleqatigisanik naapeqatigiissitsilerfiusoq. Kalaallit Nunaanni ilisimasat pissarsiarineqartut nalituut Kalaallit Nunaanni inuiaqatigiinnut apuunneqarnissaat isumagissavarput. Ingerlatitseqqinnikkullu tamanna angussavarput, aammali ilisimatuut suliaqarneranni sumiiffimmi innuttaasunik eqeersimaartumik peqataalersitsinissaannik ikiuunnikkut. Naatsumik oqaatigalugu: ilisimalikkat ilisimatusarnerup silarsuaanit avammut siammarlugit ammaatissavagut, piujuartitsinermillu toqqammaveqarluni ineriartortitsinissat siuarsaanissallu aqqutissiueqataaffigissallugit – Kalaallit Nunaanni nunarsuullu sinnerani iluaqutigisassanngorlugit.

 

Takorluugarput

Issittumi ilisimatuutut misissuinermut ilanngunnissaq ajornaatsuussaaq. Arctic Hub periarfissiivoq ilisimatuutut misissuisut ataqatigiissitsilerfigisinnaassaannik, ingerlatseqatigiiffiit suleqatigiiffigisinnaasaannik innuttaasullu Kalaallit Nunaanni ilisimatuutut sulinermut tunniusimaffigisinnaasaannik pilersitsissalluni.  Ilisimasat Kalaallit Nunaannut tunngasut piujuartumik ineriartortitseqataasinnaanerat qularutiginngilarput.  Ilaatigut pissutigalugu ilisimatuutut misissuinerit nunarsuaq tamakkerlugu silap pissusiani unammilligassanik sammisaqarnissamut sakkussaammata, kisianni aamma ilisimasat nutaat Kalaallit Nunaanni inuiaqatigiit pitsaasumik ineriartornissaannut ilapittuutaasinnaammata. Taamaattumik Issittumi ilisimasanik tamanik ammaassisunngorniarpugut.

 

Anguniagarput takorluugarpullu pillugit annertunerusumik atuarit…