Nick meeqqat isigisaat pillugit ilisimatusarpoq
Kalaallit Nunaanni meeqqat kingusinaarlutik isimikkut misissortittarput. Ilisimatooq isaruaarniarlu ajornartorsiummut tamatumunnga aaqqiissutissarsioqatigiipput.
Allaatiginnittoq Nicoline Larsen
Ullumikkut meeqqat aatsaat atualereeraangamik isigisamikkut misissortittarput. Ilisimatuulli Nick Duelundip tamanna kingusippallaarsoraa. Meeqqat siusinnerusukkut misissortittartuuppata isigisamikkut ajoquteqalernissaat pinaveersaartinneqarsinnaalissagaluarpoq. Taamaattumik ph.d.-nngorniutimini ajornartorsiummut tamatumunngarpiaq aaqqiissutissarsiorpoq.
“Maani nunatsinni meeqqat isigisamikkut kingusippallaartumik misissorneqartarnerat ilisimatusaatinnut tunngaviuvoq,” Nick Duelund Arctic Hubimut oqarpoq. Nick Nuummi meeqqerivimmut Sikkersumut, isarualerisoq Maja Overgaard peqatigalugu meeqqat isigisaannik misissuiartortoq ilagaarput.
Nick Duelund nakorsaavoq, Ilisimatusarfimmilu aamma Københavns Universitetimi ph.d.-nngorniuteqarpoq. Ph.d.-nngorniutini aqqutigalugu ullumikkut pisarnermit siusinnerusukkut meeqqat isigisaannik qanoq misissuisoqarsinnaaneranik periutsimik misileraavoq. Periutsimi nunatsinni isarualerisut peqataatinneqarput, taakkulu ilagaat tassaavoq Maja Overgaard, Nuummi Majas Optikimi sulisoq.
”Nickip ilisimatusarnerani peqataanissannut akuersivunga isumaqarama isip nakorsaanik nunatsinniittoqartuaannanngimmat meeqqat isigisamikkut misissorneqajaartariaqartut,” Maja Overgaard oqarpoq.
Sinerissami inersimasut isaannik misissuiartorluni angalasarpoq, siunissamili immaqa aamma meeraaqqat isaannik misissuisalersinnaavoq. Nick Duelund misissuivoq Maja Overgaardip isinik misissueriaasia meeqqat sisamanik ukiullit isigisamikkut ajoquteqarnersut misissornissaannut atorneqarsinnaanersoq.
“Nunatsinni meeqqat tamarmik sisamanik ukioqarnerminni misissortittarnissaat anguniarparput.” Nick Duelund
”Meeqqat sisamanik ukioqarneranni isigisamikkut ajoquteqarnersut paasineqarsinnaasuuppat kingorna ataavartumik isiluttunngornissaat pinaveersaartissinnaassagaluarparput. Atualereersulli isigisamikkut ajoquteqartut paasineqarpat, tamatuma iliuuseqarfiginissaa kingusippallaarsinnaavoq,” Nick Duelund nassuiaavoq. “Taamaattumik anguniagaraarput nunatsinni meeqqat tamarmik sisamanik ukioqarnerminni misissortittarnissaat.”
Nickip ilisimatuutut misissuinerani paasinarsippat Maja Overgaardip isinik misissuineri meeqqat sisamanik ukioqartillugit isigisamikkut ajoquteqarnerannik paasinninnissamut atorneqarsinnaappata, periutsimik nunatsinni isaruaarniat sinerissami angalaangamik isinik misissuinermi periutsimik pilersitsisoqarsinnaassagaluarpoq. Taamaalilluni meeqqat aaqqinneqarsinnaanngitsumik isiluttunngortartut ikinnerulersinneqassapput.