Greenland Science Week ilimatusarneq pillugu inunni nalliuttorsiornerussaaq
Allaaserinnittoq Nicoline Larsen
Maannakkut Arctic Hubimi ulappunnersuaqarpoq. Tassami erniinnannguaq Greenland Science Week Kalaallit Nunaannut nunneqqittussaavoq. Novembarip 3-nit – 10-ta tungaanut Kalaallit Nunaanni ilisimatusarneq qitiutillugu aaqqissuinerpassuit Sisimiuni, Sarfannguani, Kangerlussuarmi Nuummilu ingerlanneqassapput.
”Arctic Hubimi Greenland Science Week pillugu nukippassuit atorpavut. Tamaaliorpugut ilisimatuut imminnut qaninnerulernissaannut ilisimatusarnerullu inuttaasunut qaninnerulernissaanut periarfissatsialassuummat.” Jula Maegaard-Hoffmann, Arctic Hubimi aallaffeqarfimmi pisortaagallartoq oqarpoq.
Greenland Science Week marlunnik immikkoortortaqarpoq. Immikkoortoq siulleq ataatsimeersuarneruvoq ilisimatuunut siulliutillugu sammitinneqartoq. Tassani saqqummiinerit attaveqatissarsiornerillu ingerlanneqassapput, ilisimatuullu nunatsinneersut nunanilu allaneersut naapisimaassapput ilisimasaminnillu avitseqatigiillutik. Immikkoortup aappaa kalaallinut innuttaasunut sammitinneqarpoq. Tassani assigiinngitsunik arlalinnik aaqqissuussineqassaaq, innuttaasullu Kalaallit Nunaanni ilisimatusarnerup silarsuanut qaaqquneqarput.
”Arctic Hubimi Greenland Science Week pingaarnerpaanut ilaatillugu ingerlanneqarnissaa toqqarsimavarput. Aaqqissuussineq pillugu innuttaasunut erseqqissarnissaa immikkut ukkatarisimavarput,” Jula Maegaard-Hoffmann oqarpoq, taassuma Arctic Hubimi ulluinnarni aqutsinermik suliaqarnermi saniatigut Greenland Science Weekip nittartagaa nutaaq isumagisimavaa.
Ilisimatusarnerup nalliuttorsiutigineqarnera ilisimatusarfiit assigiinngitsut arlallit kommunillu peqatigalugit ataatsimoorluni aaqqissorneqarpoq, suliffeqarfiillu ataasiakkaat namminneq pisinnaasaminnik tunniussinnaasaminnillu neqerooruteqarsinnaanerannik tungaveqarluni.
”Greenland Science Weekip ilisimatusarnerup inuiattut nalliuttorsioqatigiinnertut ingerlanneqarnissaa uagut anguniarparput. Taamaattumik ilisimatuunuinnaq nalliuttorsiutaannginnera tusarliutissallugu ilungersuutigisimavarput. Kikkut tamarmik tikilluaqquneqarput, ilisimatusarnermi tamatsinnut tunngasuuvoq.”
Greenland Science Weekip nutaamik nittartagartaarnerata saniatigut Greenland Science Weekip ingerlanneqarnerani Katuap qaammaqqusersornissaa Arctic Hubip isumagisimavaa, taamaalilluni taqqamani susoqarnersoq inuit ilisimaniassammassuk alakkaanissaminnullu pilerisulerlutik. Hubip aamma YouTubemi nunarput pillugu saqqummiisartoq Q´s Greenland suleqatissarsiarisimavaa aammalu filmertarfimmik takoqqusaarusiorsimalluni, taamaalilluni Greenland Science Week pillugu tusarliussaq nuna tamakkerlugu siaruarterneqarniassammat.
”Nunarsuarmi sumi tamanit ilisimatuut Greenland Science Weekip ingerlanneqarnerani peqataajartorlutik maanga anngupput. Taamaattumik ilisimatuut innuttaasullu imminnut naapeqatigiinnissaannut tamanna periarfissatsialaavoq. Tassami inuit naapinneranni isumassarsioqatigiinneq paaseqatigiinnerlu pinngortarpoq, taamaattumik periarfissaq taanna amerlasuunit tigulluarneqarnissaa neriuutigaara,” Jula Maegaard-Hoffmann naggasiivoq.
Greenland Science Week ukioq allortarlugu ingerlanneqartarpoq, maannakkullu ilisimatusarnerup nalliuttorsiutigineqarnera pingajussaa ingerlanneqarpoq. Aaqqissuussinerit pissanganartorpassuit pillugit paasisaqarusukkut Greenland Science Week pillugu uani annertunerusumik atuarsinnaavutit.