Nipaannerup qilalukkat qernertat annaassinnaavai
Qilalukkat qernertat pissusiannik nakkutiginninnerup takutippaa nipit assigiinngitsut uumasut uippakajaarnerisa annertussusiannut annertuumik sunniuteqartartut, Outi Maria Tervo oqarpoq
Allaatiginnittoq Phillippa Mangalika Maigaard Filtenborg
Tunumi ilisimatusarnikkut suleqatigiit qilalukkat qernertat nipinut assigiinngitsunut qanoq malussaritsiginerat nakkutigaat. Suliniummi ilisimatuut misissuisut ilaat tassaavoq Outi Maria Tervo, Pinngortitaleriffimmeersoq.
“Qilalukkat qernertat pisareriarlugit nassitsissutinik ikkussivigaavut. Taamaaliornikkut uumasut taakkua qanoq pissuseqarnerannik nakkutiginnissinnaalersippaatigut. Kingorna nipinik assigiinngitsunik qilalukkat nipinut qanoq qisuariarnerat paasiniarlugu nassitsivigaavut,” Outi Maria Tervo oqarpoq.
Ilisimatuutut misissuisut paasivaat nipit assigiinngitsut qilalukkanut annertoqisumik sunniuteqartut. Piaqqiorunnaarput nipillu aallaavia qimanniarlugu suna tamaat atorpaat sukkanerusumillu ingerlalerlutik.
“Qilalukkanik qernertanik nakkutiginninnerup aamma takutippaa qilalukkap uummataata pissusissamisuunngitsumik tillilersarnera. Isumaqarpugut uummataata pissusissamisuunngitsumik tillernera aamma nipinik assigiinngippallaanik sunnerneqaraangamik uumasup uippakajaalernera annilaangalerneralu imminnut ataqatigiittut. Qilalukkanut qernertanut ataasiakkaanut ulorianartorujussuusinnaavoq,” Outi Maria Tervo oqarpoq.
Outi Maria Tervo nassuiaavoq nipit inunnit pilersinneqartut qilalukkat qernertat qisuariarfigisaraat. Assersuutigalugu angallannerit, umiarsuarsuit takornariartaatit aamma aatsitassarsiornernit nipiliortitsinerit. Suliniutit Kalaallit Nunaata ilaani ataatsimullu isigalugu Issittumi amerliartortut.
Ilisimatuutut misissuisut Kalaallit Nunaata aningaasaqarnikkut imminut napatittuunissaanik kissaateqarneq paasilluarpaat, tamannalu akulikitsumik suliniarnernut taamaattunut pingaarnertut pissutaasarpoq.
“Oqimaaqatigiissumik inissittoqarnissaanik nassaartoqarsinnaasoq isumaqarpugut. Innuttaasunut inuuginnarsinnaaneq ineriartornissarlu pingaaruteqarluinnarpoq. Aningaasat takornariaqarnermit, aalisarnermit aamma aatsitassarsiornermit aallaaveqartut atorfissaqartinneqarput, Kalaallit Nunaanni soorlu aamma Issittup ilaani allani. Kisianni aamma arferit qularnaartariaqarpavut,” Outi Maria Tervo oqarpoq.
Ilisimatuutut misissuisup periarfissatut allatut siunnersuutigaa qilalukkanut qernertanut killilersukkamik eqqissisimatitsiviliortoqassasoq, imaluunniit ukiup ingerlanerata ilaani aalajangikkami angallanneq killilersorneqassasoq. Aamma siunnersuutigaa umiarsuarnut tamaani ingerlaartartunut sukkassutsimik killilersuisoqarnissaa oqallisigineqassasoq, nipiliornikkut ajoqusersuinerit annikillisinniarlugit.
“Siunnersuutit uku ilaannaalluunniit piviusunngortinneqarsinnaappata qilalukkanut qernertanut pingaaruteqartorujussuussaaq. Suliniutinnguit taakku qilalukkanut qernertanut uumaneranni atugarisaat pitsaanerulersissavaat, tamannalu aamma inunnut iluaqutaassaaq,” Outi Maria Tervo oqarpoq.