Kangiata Illorsua tikinngikkaluarlugu ’alakkarsinnaanngorpat’
Ilulissani Kangiata Illorsuanut ornigussinnaanngikkaluarlutit alakkaavigipajaarsinnaavat. Illorsuup ilikkagassanut aallerfia iluaqutigalugu meeqqat inuusuttullu Kalaallit Nunaanni sumiluunniit najugallit sermeq sermillu eqqaani uumassusilli pillugit ilinniarsinnaapput.
Allattoq Sara Kirstine Hald
Kalaallit Nunaanni meeqqat inuusuttullu ikittuinnaat Kangiata Illorsuanut Ilulissaniittumut alakkaasinnaapput. Taamaattumik tassani saqqummersinneqartut aallaavigalugit ilinniartitsissusiortoqarpoq maanna illorsuup nittartagaani aaneqariaannaasunik.
Kangiata Illorsuani saqqummersitsineq ilisimatusarnermik tunngaveqarpoq taamaalillunilu Kalaallit Nunaanni inuusuttunut amerlanerusunut anngutitinneqarsinnaalluni.
Atuakkat meeqqat ilisimasaqarfigilluagaat
Elisabeth Momme, Kangiata Illorsuani pisortaq, naapertorlugu ilinniutit kalaallisuut ilarpassui Danmarkimi suliaasarput.
”Taamaattumik suliassat ilaat Roskildemiit Korsørimut qimuttuitsornermut Jens Hansenillu illuanut nunaataanullu tunngasinnaasarput Kalaallillu Nunaata avannaani najugaqaraanni paasiuminaalaarsinnaallutik,” oqarpoq.
Siunertarineqarpoq Kangiata Illorsuanit ilinniusiarineqartuta atuartunut paasiuminarnerunissaat pissutsit taakkua inuuffigisaat aallaavigineqassammata. Taakkua atuariartorusussuseqarnerulersitsisinnaanissaat Elisabeth Mommep aamma neriuutigaa.
Ilisimatusarnermik tunngavillit
Kangiata Illorsuani saqqummersitsineq ”Sermeq pillugu Oqaluttuaq”-mik taaguuteqarpoq. Ilisimatusarnermik tunngaveqarpoq, ilisimatusarfigineqartulli innuttaasut amerlanersaannut soqutiginartumik paasiuminartumillu saqqummiunneqarlutik.
”Taamaattumik meeqqat atuarfiannut gymnasianullu ilinniartitsissusiornissamut aallaaviulluarsimavoq,” Elisabeth Momme oqarpoq.
Kulturikkut oqaluttuarisaanermut pinngortitalerinermullu tunngasut ilaatigut saqqummersinneqarput, aammattaaq silap pissusiata allanngoriartornera, ingammik Kangiata Illorsuata eqqaani malunnartaqisoq, sammineqarpoq.
Ilinniartitsissusiat tamarmik klassinut immikkoortiterneqarsinnaapput, aamma kalaallisut, danskisut tuluttullu pineqarsinnaapput.