Ilisimatusartup kajumissaarutaa: ”Imminut toqunnissamik eqqarsaateqarsorisat apersortaruk”
Arnârak Patricia Bloch, Syddansk Universitetimi imminut toquttarnermik pitsaaliuinermi ilisimatusartoq, videumi matumani imminut toqussimasunik ilisarisimasaqartunik siunnersuivoq.
Allattoq Ole Ellekrog
”Nunatsinni … amerlasoorujussuuvugut annaasaqarsimasut, immaqaluunniit aamma imminut toqunnissamik eqqarsaateqartarsimasut,” ilisimatusartoq Arnârak Patricia Bloch kujataani seqinnarissumi issiaartilluni oqarpoq.
Norgemi najugaqaraluarluni Danmarkimilu universitetimik sullissigaluarluni Kalaallit Nunaanni imminut toquttarnermik pitsaaliuineq anersaaqarfigaa. Nunatta kujataani Qaqortumi imminut toquttartut amerlaffianni inunngorpoq peroriartorlunilu.
”Nunatsinni … amerlasoorujussuuvugut annaasaqarsimasut, immaqaluunniit aamma imminut toqunnissamik eqqarsaateqartarsimasut,” Arnârak Patricia Bloch
Peqatigiilluta imminut toquttarnermik akiuuttariaqarpugut
Arnârak isiginnaartitsisutut sulisarnermi saniatigut nuna tamakkerlugu ilisimatusaatigalugu suliniummik annertuumik ingerlatsivoq. Suliniummut Syddansk Universitets Center for Folkesundhed i Grønland-imiit ingerlassaanut siunertaavoq Kalaallit Nunaanni tamarmi – aamma nunaqarfeeraagaluartuniluunniit – siunnersuisartunik imminut toquttarnermik pitsaaliueqataasinnaasunik ilinniartitsinissaq.
Videumi uani imminut toquttarnermik pinaveersaartitsinermi ilisimatusarnermigut paasisarpassuani ingerlateqqippai. Assersuutigalugu nalunngiliuk imminut toquttarnermik akiueriaatsini sunniuteqarluarnerpaasartoq tassaasoq illoqarfeqatigiinnik nunaqarfeqatigiinnillu ajornartorsiummut akiuuteqatigiissitsineq – suut tamaasa peqqinnissaqarfinnut isumagitinnagit?
Taamaattumik Arnârkap Kalaallit Nunaannut manna oqariartuutigerusuppaa: Peqatigiilluta imminut toquttarnermik akiuuttariaqarpugut. Videumi qulaatungaaniittumi paasisaqarnerugit.
Imminut toqunnissat eqqarsaatigisarpiuk? Kisimiinngilatit.
Tusaannga-mut attaveqarit uku aqqutigalugit:
Oqarasuaat: 80 11 80
SMS: 18 99