Arnâqqap Kalaallit Nunaanni sumi tamani imminut toqussimasoqartillugu qimagaasut imminut toquttarneq pillugu akiuinermik ilinniartittarpai
Qaqortormiu Kornelia Rugholm inuit 500 sinnerlugit amerlassuseqartut Arnâraq Patricia Blochip imminut toquttarneq pillugu pinaveersaartitsinermik pikkorsissartitsinerani peqataasimasut ilagaat. Maannakkut taarsisalernerani unnuakkullu nunaqqatini oqallittarfikkut oqaloqatigiinnikkullu ikiortarpai.
Allaaserinnittoq Ole Ellekrog
Tasiilaq, Qaqortoq, Aappilattoq, Tasiusaq aamma Ilulissat. Arnârak Patricia Blochip Kalaallit Nunaanni illoqarfinni nunaqarfinnilu arlalinnit pikkorissaqataasimasut tulluusimaartut assingi takutissinnaavai. Tassami ukiuni kinngullerni arlalinni qanoq imminut toquttarneq pillugu pinaveersaartitsinermik ilinniartitsiartorluni Kalaallit Nunaata sineriassua avannamut kujammullu angallavigisarsimavaa. Inuit 500 sinnerlugit pikkorissartitsinerani peqataasimapput.
Ilisimatusartut ilisimatusarnertik oqaluttuariniarlugu nukiit taamak annertutigisut nalinginnnaq angalanermut atorneq ajoraluarpaat. Kisiannili Arnâqqamut, Kalaallit Nunaanni Innuttaasut Peqqissusiannik Ilisimatusarfimmi imminut toquttarneq pillugu pinaveersaartitsinermik ilisimatusartumut, ilisimatusarnermini paasisami innuttaasunut aamma tusarliunnissaat pingaaruteqartorujussuuvoq.
Arnâqqammi ilisimatusarnera inuit inuunerannik annaassisinnaavoq.
”Inuit imminnut toqoriarsimagaluartut imminoornissaminnillu eqqarsaateqarsimasut inoorusunneq qanoq nassaareqqissimaneraat kiisalu inuunissaq sooq toqqarsimanerat ilisimatusarninni sammisarivara,” Arnârak oqarpoq.
Imminut toquttarneq pillugu pinaveersaartitsinermi ilisimatusarnermini Arnâqqap kalaallit issittumilu nunani allani inuit immikkut ukkatarivai. Inerniliinerit ilaagisimavaat Danmarkimi Europamilu nunani allani pitsaaliuinermi periutsit atorneqarsinnaagamik imaanngitsoq Kalaallit Nunaanni aamma pinngitsoornatit atorneqarsinnaasut. Kalaallit Nunaanni ilaatigut tamanna avammut tusarliuitissallugu pingaaruteqarpoq.
Korneliap pikkorissarneq pitsaaliuinermik siunnersortitut atorpaa
Arnâqqap pikkorissartitsinerinut peqataasimasut ilagaat, Kujataani qaqortormiu Kornelia Rungholm. Taanna nammineq imminoorsimasunik arlalinnik qanigisaqarpoq, taamaattumillu pikkorissartitsineq annertuumik iluaqutigisimavaa. Siornatigut imminornissaminnut navianartorsiortut qanoq aqunnissai annertuumik ilisimasaqarfigisigimanngilaa.
”Taamatut sulineq uannut pingaaruteqartorujussuuvoq, tassami qanoq iliussallunga nalullugu misigisarsimagami. Qimagussimasut eqqarsaatigigaangakkit taava ikiornissaannik sakkussaaleqisimasutut misigisarpunga. Ingammik ukiorpassuarni ugguarnermik maqaasinermillu misigisarsimagama,” Kornelia oqarpoq.
Ullumikkut Kornelia Rungholm Kommune Kujallermi pitsaaliuinermik siunnersortitut atorfeqarpoq. Tassani Arnâqqap pikkorissartitsinerani ilisimasat pigilersimasani atortarpai.
Qulaani videoliaq takuk Qaqortumilu Arnâqqap tikeraarnera pillugu annertunerusumik paasisaqarit. Uani aamma ilisimatusaataa pillugu annertunerusumik atuaruk.
Ikiortissaq ungasinngilaq – aamma matoreernerata kingorna
”Inoqatigut ulluinnarminni atugarliortutut imaluunniit piffissami sivisunerusumik nikallungajuartutut misigisimaleraangamik annikigisutut misigisimalersarput. Sunaluunniit iluatsissinnaanngitsutut kanngusuutigisatillu oqaloqatigiissutigisinnaanagit misigisimalersarlutik. Kisianni allatut ajornartumik inuunerissutut avammut kiinnertariaqalerlutik misigilersarput,” Kornelia Rungholm oqarpoq.
Kornelia Rungholm – aamma Arnârak Patricia Bloch naapertorlugu – isumannat nikallunganartut nalliukkaangata oqaloqateqarsinnaaneq pingaartorujussuuvoq. Kanngusunnermik misigisimanani toqqissisimasumik oqaluuserisinnaasariaqarput.
Aasaq manna inuit taakku marluk Arnâqqap suliniutaa Kalaallit Nunaannilu imminut toquttarneq pillugu pinaveersaartitsineq oqaluuseriniarlugu naapipput.
Qulaani videomi naapinnerat qanoq ingerlasimanersoq takuk. Uani ilisimatusarluni suliniut annertunerusumik atuarneqarsinnaavoq: