InuitKalaallit NunaatOqaluttuarisaaneqPeqqinneq

Qilaatersorneq inuillu kakiueriaasitoqaat aamma tassaapput Kalaallit Nunaat nutaaq

Oqaluttuanik, oqaluttuatoqqanik, unikkaartuanik, ileqqulersuutinillu misissuilluni Kalaallit Nunaata qanga ullumilu oqaluttuassartaanik peqaannaratik siunissamik oqaluttuussinnaavaatigut. 

 

Allaatiginnittoq Josephine Schnohr , Polarfronten 

 

Qilaatersornerit, kaffillertarnerit, oqaluttuatoqqat, aarnussat, inuit kakiueriaasitoqaat, qaannamik unammersuarnerit uaajeertarnerillu, tamakkerlutik piorsarsimassutsikkut kingornussaapput- piorsarsimassuseq kinguaariit siuliinik kingornussarsiaraarput. Naak kingornussarsiarput uuttortarlutigulu oqimaalutarsinnaanngikkaluarlugu, pingaarutilerujussuuvoq, paaserusukkaanni, kalaallit inuiattut kinaassuserisimasaat, kinaassusaat siunissamilu kinaassuserisassaat. 

 

Taamaattumik Nunatta Katersugaasiaviani  

 Allagaateqarfianilu anguniagaliullugu, piorsarsimassutsikkut kingornussatsinni taakku, nalunaarsorlugillu nassuiaatissartalersorpaat. Kalaallimik qallunaamillu akusap Kirstine Eiby Møllerip ima nassuiarpaa: 

”Itsarnisarsiuutut, itsarnisarsuarnit sinneruttunik tigussaasunillu nassaanik, misissuinermut piffissarujussuaq atornarpoq, inuit illuminnuinnaq, atortuminnuinnaq, ilivitoqqaminnullu taamaallaat tunngannginnamik. Taamaattuminguna Katersugaasivimmi ukiuni kingullinngortuni anersaakkut kingornussarsiagut ukkatarigigut, ileqquusimasut piorsarsimassutsikkut ilisarnaatigut, ullumimut kalaallini inuiaqatigiinni pingaaruteqartut. ” 

 

Naak kaffillerneq katersugaasivimmi saqqummersikkuminaassinnaagaluarluni tigussaasutullu pisinnaatitaaffeqarlunilu assiganik pingaaruteqarpoq kingornussatut eqqaamaneqarnissaminut. 

 

”Kaffillertarneq kalaallit ilisarnaatimissut ataatsimooqatigiittarnerannik oqaluttuartuuvoq. Inoqatinik ataatsimooqatigeriaasaavoq immikkuullarissoq, takornarissanit ilisimatusarlutillu angalasunit misigineqartartoq” taama oqarpoq Kirstine Eiby Møller. ”Aammalumi, nuullutik tikittut kalaallit inuiaqatigiit ileqquassutatulerlugu sungiutipallattagaraat. Imaappoq kaffillertarnerit aqqutigalugit inuiaqatigiinnut pulapallattarput, taava immaqa anersaakkut kingornussarput ilanngutsitsissutitut, atuutilerluni. 

Kakiueriaasitoqqat uteqqittut  

Anersaakkut kingornussisarneq puigugaanngilluinnarpoq, aamma kalaallini inuiaqatigiinni ullumikkut ileqqutoqaasimasut saqqummeqqikkaluttuinnarnerat ersippoq. Takuminartuni ersarissuni assersuutitut taasinnaavarput inuit kiinnamikkut assammikkullu kakiueriaasitoqaat, kinguaariinni nukarlerni, ingammik illoqarfinni anginerusuni soorlu Nuukkunni Sisimiukkunnilu. 

  

Kakiuisarneq, inuit akornanni siaruarsimajuaannarnikuuvoq, taamanikkut ujaloq paatersimasoq ammip ikeranut pulatillugu meqqummik kakiuisoqartarpoq, taamaaliornermi paaq ammip ikeraniilerluni. Kakiortittartut tassaanerusimapput arnat, niviarsiaqqamiik arnamut ikaarsaarnerminnut ilisarnaatigitillugu, kiinnamikkut, nissumikkut, talermikkut iviagimikkullu kakiortittarsimapput. 

   

”Ullumikkut aqqusinikkooraanni inuit kakiuerisaasitoqaat atorlugu kakiortissimasunik takussaasoqaraluttuinnarpoq, uanga aamma nammineerlunga kakiortinnikuuvunga, Nunatta Katersugaasivianiittut allalersueriaasitoqqat isumassarsiffigalugit, assakkut paffikkullu. Aamma allatigut anersaakkut kingornussatsinnik ukkissaqarpugut. Assersuutigalugu issittoq akimorlugu qilaatersortartunik attaveqatigiittoqarpoq, imminnut ilinniarfigiiutigalutik ileqqutoqqamik immikkuullarissumik, festiavalertoqarnerni assigisaanniluunniit, ileqqutigut akuerisanngortikkumallugu. Aamma taamaappoq qaannamik unammersuartarnerit qimussimik sukkaniiuutsitsisarnerit, tamarmik kalaallit piorsarsimassusaannik pingaarutilinnik, tarnikkut kingornussaasa attanneqartuaannarnissaannut, qulakkeerinnittussat. Imaaginnarpoq manna katersugaasivilerisunut, sammisanik ingerlatsisunut, Kalaallit Nunaannilu inuiaqatigiinnut siammasissumik, attuumassuteqarfigaa. Kingullertigut Múte B. Egede siuttoralugu Naalakkersuisunngortitsisoqarmat, qilaatersortoqarpoq, attortiffigilaarpara, naak pisorsarsimassutsikkut kingornussaq uani politikkikkut sammisamut pituuserneqaraluartoq”, paasisimasani Kirstine Eiby Møllerip taama oqaatigaa. 

  

Attavissaq: Kirstine Eiby Møller aamma Asta Mønsted 

 

Una allaaserisaq Polarfrontip immikkut Arctic Hub pillugu sammisaaneerpoq. Arctic Hub aamma Polarfronten suleqatigiinneratigut saqqummersinneqarpoq.