Paasisavut-mut qinnuteqarnissamut killigititaq qanilliartupallappoq
Ilisimatusarfigisanik saqqummiussillaqqinneqqisaanneq Paasisavut peqataaffigerusukkukku allaffigeriannguartigut. Qinnuteqarnissamummi killigititaq tassaavoq decembarip 1-iat.
Allaatiginnittoq Nicoline Larsen
Illit ilisimatusarfigisatit pillugit saqqummiussinissannik qitiutitsilluni ilinnullu naleqqussakkamik ilinniartitsineq. Illit ph.d.-nngorniutigisannik nittarsaassilluarneq. Ataqatigiissaarluni suleqatigiinneq. Inuppassuit takkuanni saqqummiussinermik misilittagaqalerneq. Soorunamilu 25.000 kroninik eqquinissamut periarfissaqarneq.
Taakkua ilisimatusarfigisanik saqqummiussillaqqinneqqisaannermi Paasisavut-mi peqataanerup iluaqutissartaasa ilagaat.
Ilisimatuutut misissukkanik paasiuminarsaaneq
Paasisavut-mi peqataaguit isiginnaariat naliliisartullu pikkorilluinnartut takkuanni ilisimatusarfigisatit pillugit saqqummiussisinnaavutit. Tamanna KNR-ikkut aallakaatinneqassaaq illit ilisimatusarfigisatit Kalaallit Nunaat tamakkerlugu ilisimaneqalerniassammata.
Minutsini tallimaannarni saqqummiussisussaavutit, pingaarnerpaavorlu ilisimatusarfigisannik tamanut paasiuminarnerpaamik saqqummiussinissat. Ilisimatuutut misissuisimasoq paasiuminarsaalluarnerpaaq Paasisavut-mi ajugaassaaq 25.000 kroninnassallunilu.
Kalaallit Nunaannut tunngassuteqartumik ph.d.-nngorniuteqartut ph.d.-nngorniuteqareersimasullu aamma Kalaallit Nunaanni nunalluunniit avannarliit arlaanni universitetimi allatsissimasut peqataanissamut qinnuteqarsinnaapput.
Kalaallit Nunaanni najugaqanngikkuit angalanermi inisimmavinnilu aningaasartuutissat akilissavavut. Eqqumaffigiulli qinnuteqarnissamut killigititaq, decembarip 1-iat 2022, maanna qanilliartupallammat.
Paasisavut pillugit qanorlu qinnuteqarnissannik paasissutissat amerlanerusut uaniipput: www.paasisavut.gl
Ajugaasut oqaluttuarput sooq peqataaniarnissaq pingaaruteqartoq
Danmarkimi Ph.d. Cup, ilisimatuutut misissukkanik inunnut ilinniagartuujunngitsunut soqutiginarsaanermi ukiuni qulini iluatsilluarsimasoq, isumassarsiffigalugu Paasisavut pilersinneqarpoq.
Taamaattumik Danmarkimi Ph.d. Cup-imi siornatigut peqataasimasut arlallit qinnuigaavut unammisitsinermi Paasisavut-mi ph.d.-tut peqataaneq sunik iluaqutissartaqarnersoq.
Matumani takusinnaavat Andreas Sommerfeldtip Ph.d. Cup 2021-mi ajugaasup oqaluttuarigaa peqataanini qanoq pissarsiffigisimanerlugu aamma pisinnaasut tamarmik Paasisavut-mi sooq peqataasariaqarnersut.
Ajugaaniunnissamut anngussimasut peqataanertik qanoq pissarsiaqarfigisimanerlugu oqaluttuarnerannik filmit amerlanerusut Youtube-imi quppernitsinni isiginnaakkit.
Paasisavut Arctic Hubimit Ilisimatusarfimmillu aaqqissugaavoq. Novembarip 17-ianni Nuummiissaguit Pikialaarfimmut alakkaasinnaavutit nal. 14-16. Tassani qinnuteqarumasut tamaasa qinnuteqaammut videuliornissaannut naatsumillu imminut allaaserinissaannut ikiussavavut.
Aaqqissuussaq pillugu uani paasisaqarnerugit.