Illoqarfimmi innuttaasut, atuarfiup, suliffeqarfiit ilisimatuullu suleqatigiinnerannik isummersoqatigiittarnerannillu pitsanngorsaanikkut neriuppoq ilisimatuutut misissuivik ilisimatuutut misissuilluni suliniutinik Narsami innuttaasunut atorluarneqarsinnaalersitseqataassasoq. Pitsanngorsaasoqassaaq innuttaasunik ataatsimiisitsisarnikkut, illoqarfimmi siunnersortinik akuutitsinikkut innuttaasunillu ilisimatuutut misissuivimmi siulersuisunut ilaasortaatitsinikkut.
Misissuivik ulapaarfiusoq
Covid-19 misissuivimmik aasaq manna ammaanissamik kinguaattoortitsigaluartoq misissuivik ilisimatuunit arlalinnit tikeraarneqareerpoq. Ilaatigut Zane Cooperimit. Taanna 2021-mi ukiakkut misissuivimmi qaammat inisimasuuvoq. University of Pennsylvania USA-miittumi ph.d.-nngorniaavoq, elektronikkimik atortuliornermi atuinermi eqqagassaalertartut ilisimatusarfigalugit.
Taanna oqarpoq: ”Ilisimatuutut misissuivimmiinnera Narsami innuttaasunik, innuttaasut qanoq inuunerannik, ilinniarfigilluarpara. Aamma ilisimatuutut misissuinermi isumassarsiassannik aalajangiussinissannut iluaqutigaara.”
Narsamiinnermini paasisaasa ilagaat eqqagassatut oqaatigineqarsinnaasut pingaarnersaat tassaasoq piffissaq utaqqiffiusartoq. Aatsitassarsiornerup aallartinnissaa – taamaatinneqarnissaaluunniit – inunnit utaqqineqarpoq. Illoqarfimmik siunissaa pillugu paasisaqarnissartik utaqqivaat, aalajangiisoqarsinnaaniassammat suliniutillu aallartinneqarniassammata.
”Ilisimatuutut misissuivimmiinnera Narsami innuttaasunik, innuttaasut qanoq inuunerannik, ilinniarfigilluarpara,” Zane Cooper
Aasaru ilisimatuut ilisimatuutut misissuivimmik alakkaaniarlutik nunanit assigiinngitsunit tikerarpata sammisassaqartitsisoqarluassaaq. Assersuutigalugu ilusilersuinermik ilisimatusartut Tuluit Nunaanneersut arlallit Narsami suliffeqarfiit innuttaasullu suleqatigalugit peqqissutsimi, eqqakkanik passusseriaatsini Kalaallillu Nunaata kujataani inuunermi atukkanik pitsanngorsaanermi aaqqiissutissanik nungusaataanngitsunik ilusilersuissapput.
