Ilisimatusartoq: Inuiaqatigiinnik pitsanngorsaaqataassaagut

Steven Arnfjordip angerlarsimaffeqannginneq pillugu ilisimatusarnermini anguniagaqarpoq: Ilisimatusarneq Kalaallit Nunaanni isumaginninnikkut politikkimik pitsanngorsaataassaaq.

 

Allaatiginnittoq Signe Ravn-Højgaard

 

Ullaassakkut nalunaaqutaq sisamanngorpoq, Nuummilu inissiarsuit Radiop qaqqaaniittut silataanni isseqaaq. Steven Arnfjord, Ilisimatusarfimmi isumaginninnermik suliaqarnermi lektoriusoq, blok 17-ip majuartarfippassuisigut nungullarsimasukkut nipaarsaarluni majuaqattaarpoq. Makkuarpalunngitsunik kamippalersimavoq majuartarfinni sinittunik itertitsiumanani. Taassumami Ilisimatusarfimmilu ilisimatusaqataasa paaserusuppaat inuit qanoq amerlatigisut angerlarsimaffeqanngitsuunersut.

 

Angerlarsimaffeqanngitsuuneq qanorpiaq paasisariaqarami?

Inunnilli angerlarsimaffeqanngitsuunermit eqqugaasunik kisitsisinnaalersinnani paasiniarneqartariaqarpoq angerlarsimaffeqanngitsuuneq qanorpiaq paasisariaqarnersoq. Inuimmi ilaat majuartarfinni sinittariaqartut angerlarsimaffeqanngitsuunerat erseqqippoq. Allammi siniffissaqannginnamik ilaquttamik ikinngutimilluunniit sofaanni sinittariaqartut angerlarsimaffeqanngitsuuppat?

 

”Inuiaqatigiinni kalaallini inukitsuusuni ilisimatusartut imaannaanngitsumik akisussaaffeqarput,” Steven Arnfjord

 

Steven nassuiaavoq: ”Inuit qanoq amerlatigisut taamatut inuusariaqarnersut qanorlu taamatut atugaqalersimanersut nalugutsigu eqqortunik suliniuteqalernissaq ajornakusoorsinnaavoq. Aatsaallu qaqugukkut angerlarsimaffeqanngitsutut oqaatiginnittoqarsinnaanersoq paasigutsigu paasisinnaassavarput inuit maani angerlarsimaffeqanngitsuusut qanoq amerlatiginersut.”

Taamaattumik Steven 2021-mi Sermitsiami kronikkimi politikerinut allappoq, angerlarsimaffeqanngitsunik kisitsisoqarnissaa isumaginninnikkut politikkimut tunngatillugu kissaatiginerpaallugu. Naalakkersuisut tusarnaarput angerlarsimaffeqanngitsunillu kisitsinermi isumasiuinermilu suliniutissamik piareersaallutik, maanna Ilisimatusarfimmit ingerlanneqartumik.

Ilisimatusartut maani nunaqavissut

Steven isumaqarpoq universitetip Kalaallit Nunaanniittup ilisimatusarnermi suliniummik ingerlatsisuunera iluaqutaangaartoq.

 

”Ilisimatusartut maani nunaqavissut ilisimatusarnermik ingerlatsippata kingornalu ilisimatusarfigisaminnik ilinniartitsivinni atuilerpata, ilisimatusarneq taamaalilluni Kalaallit Nunaanni siunissami isumaginninnermi siunnersortiusussanut toqqaannartumik iluaqutaassaaq,” Steven Arnfjord oqarpoq imalu nangilluni:

 

”Paasissutissat angerlarsimaffeqanngitsunik kisitsinermi katersortakkavut nunatta avataanut imaaliallaannaq ingerlateqqinneqarsinnaanngillat. Taamaattumik suliniutini siornatigut ingerlanneqartuni takusarsimavarput ilisimatusartut nunanit allaneersut paasissutissanik nunatsinnit annissisartut, maani nunatsinni ilisimatusartutut misissuinermi paasissutissanik taakkuninnga uagut atuisinnaanata. Tamanna ajuusaarnarpoq. Taamaattumik ajunngeqaaq suliffeqarfik Kalaallit Nunaanniittoq maanna paasissutissanik katersuisuummat. Taava paasissutissat Kalaallit Nunaanniiginnassapput kingusinnerusukkullu suliniutini Kalaallit Nunaannut iluaqutaasussani allani atorneqarsinnaassallutik.”

Stevenip suleqataasalu angerlarsimaffeqanngitsunik kisitsinermi inernerit aggustimi 2022-mi Naalakkersuisunut tunniunneqareerpata paasissutissanik qanoq suliarinninnissartik pilersaarusioreerpaat.

 

”Assersuutigalugu angerlarsimaffeqanngitsut qanoq suiaassuseqarnerannik qassinillu ukioqarnerannik misissuinerunissaq soqutiginarsinnaavoq, suliniummilu ilisimalikkavut tamaasa atorlugit soorunami Kalaallit Nunaanni angerlarsimaffeqannginnermut politikkimut tunngatillugu innersuussuteqartoqassalluni.”

Ilisimatusartup inuiaqatigiinnut akisussaassuseqarnera

Ilisimatusarfigisat isumaginninnikkut politikkip qanoq pitsanngorsarneqarsinnaaneranut innersuussutinngortinnissaat Stevenip pingaartippaa.

 

”Inuiaqatigiinni kalaallini inukitsuusuni ilisimatusartut imaannaanngitsumik akisussaaffeqarput. Maanimi suliniuteqartartut peqatigiiffiillu suliniuteqarfiusartut ilaatigut angerlarsimaffeqanngitsuunermut tunngatillugu innersuussuteqartartut politikkinullu siunnersuuteqartartut ikittuinnaapput. Taamaattumik isumaqarpunga uagut ilisimatusartutut tamanna pillugu ilisimasaqarluartugut ilisimasatta inuiaqatigiinnik pitsanngorsaaqataanermut atornissaat pingaaruteqartoq”.

 

Taamaattumik Steven suleqataalu briefing notesinik taasaminnik suliaqartarput. Taakkunani ilisimatusartutut misissukkatik atorlugit ilaatigut pinaveersaartitsinermi periusissianut oqartussaasunut politikerinullu nassiuttakkaminnut tunngatillugu politikkimut attuumassuteqanngitsunik innersuussuteqartarput.

Assit
Steven Arnfjord assinga Ilisimatusarfik
Asseq siulleq Blok 17 Steven Arnfjord-mit
Kevin Perry aamma Steven Arnfjord Kevin Perry-mit