Ilisimatuut inuussutissarsiornerullu iluani suliallit raajat pillugit iluatsittumik suleqatigiipput
Raajaqassutsip qanoq ineriartorneranik soqutigisaqaqatigiinneq aalisarnermik inuussutissarsiuteqartut Pinngortitaleriffiullu sivisuumik suleqatigiissuteqarnerannut aallaaviuvoq.
Allaatiginnittoq Nicoline Larsen
AnnDorte Burmeister aamma Andrias Olsen suliaminni Kalaallit Nunaanni raajanik qitiutitsipput. Tamarmilli immikkut assigiinngitsunik periuseqarput. Taamaakkaluartoq ilisimatooq kilisaatinullu pisortaq ilisimasaminnik paarlaateqatigiilluarfigisaminnik suleqatigiilersimapput.
”Oqiliallannartaqaaq nalunagu Andriasimut sianersinnaajuaannartunga raajanut raajaqassutsimullu tunngasunik eqqartueqatiginiarlugu. Ilisimatuutut misissukkakka inuussutissarsiortut takusartagaannut naapertuuppat?” AnnDorte Burmeister oqarpoq.
AnnDorte Pinngortitaleriffimmi siunnersortaaneruvoq raajallu saattuallu ilisimatusarfigalugit. Ilaatigut amerlassusiliisarnernut akisussaasuuvoq. Arctic Hubip AnnDorte aamma kilisaatinut pisortaq Royal Greenlandip umiarsuaataanut akisussaasuusoq Royal Greenlandip Nuummi qullersaqarfiani naapippai.
Oqaloqatigiinnerit angusaqarluarfiusut
AnnDorte Burmeister aamma Andrias Olsen nalaatsornikkut suleqatigiilerput. Aaqqissuussani suliaminnut tunngasuni assigiinngitsuni naapikkaangamik oqaloqatigiilluartarsimapput paasisimallugulu raajat pillugit ilisimasaminnik qimerloorsimasaminnillu avitseqatigiinnikkut iluaqutissarsingaarsinnaallutik.
“Soqutigisaqaqatigiinneq suleqatigiinnermik ajornannginnerulersitsisarpoq,” Andrias Olsen
AnnDorte Burmeisterip Andrias Olsenillu oqaloqatigiittarnerat Pinngortitaleriffiup Royal Greenlandillu aamma aalisarnermik inuussutissarsiuteqarfiusut allat suleqatigiilernerannik kinguneqarpoq. Suleqatigiilernerminniilli maannamut suliniutinik arlalinnik ingerlatseqatigiittarsimapput.
”Ukiut ingerlanerini assigiinngitsorpassuarnut tunngatillugu suleqatigiittarsimavugut, oqaloqatigiittarnivullu angusaqarluarfiusimaqaat,” AnnDorte Burmeister oqarpoq.
Soqutigisaqaqatigiilluni suleqatigiinneq
Taakkua tamarmik immikkut tunuliaqutarisamikkut assigiinngikkaluaqalutik soqutigisaqaqatigiillutik paasisarpaat.
”Pinngortitaleriffimmiut akerlerisatsitut isiginngilluinnarpakka, suleqatittut isigineruakka. Raajaqassutsip pissusissamisoornissaanik ilisimatuut inuiaqatigiillu soqutiginninnerattulli soqutiginnitsivugut,” Andrias Olsen nassuiaavoq.
AnnDorte Burmeister isumaqataavoq, imali ilassuteqarluni:
”Pinngortitaleriffik aalisarnermik inuussutissarsiutilinnik raajanut tunngatillugu suleqateqarluaraluartoq apeqquserneqarsinnaanngilaq raajat pillugit siunnersuinerit misissuinernilu allani angusat illuinnaasiorfiunerinik, ilisimatuussutsimik tunngaveqarnerinik kiisalu aningaasatigut politikkikkullu soqutigisanit sunnigaanerinik.”
Raajarniarnermi ristinik akuttunernik misileraanerit nutaat
Kingullertigut AnnDorte Burmeister aamma Andrias Olsen Ice Trawl A/S, Polar Seafood, Niisa Trawl aamma Qajaq trawl suleqatigalugit misissuisimapput raajanik immikkoortiterissutit kilisaatini raajarniarnermi atorneqartartut ristii akuttunerulersinneqarsinnaanersut.
“Aalisakkanut tunngasunik suliaqartilluni taakkuninnga inuussutissarsiuteqartut namminneq qimerluugaannik paasisaqarneq nalitoorujussuujuaannarpoq,” AnnDorte Burmeister
Immikkoortiterissutit ristiinik akuttunerulersitsinikkut immaqa avataasiorluni raajarniarnermi qalusinermi ataatsimi raajanik amerlanerusunik sumiiffiillu ilaanni anginerusunik pisaqartoqarsinnaasassaaq. Taamaattumik Andrias Olsenip AnnDorte Burmeister saaffigaa aperalugu Pinngortitaleriffik inuussutissarsiutillit suleqatigalugit taamatut akuttunerulersitsineq aalisarnermut nungusaataannginnerulersitsisinnaaneranik misissuerusunnersoq.
Suleqatigiinneq iluaqutissarpassualik
Suliniut tamanna AnnDorte Burmeisterimit, Andrias Olsenimit Miki Brønsimillu Polar Seafoodimeersumit ingerlanneqarpoq, kilisaatinilu Polar Qassiummi Nattarnamilu misissuisoqarpoq. Tamanna pillugu nalunaarusiaq maanna naammassineqaleruttorpoq.
Raajarniarnermi ristinut tunngasoq suliniutit AnnDorte Burmeisterimit Andrias Olsenimillu suleqatigiissutigineqartut ilaannaraat. Taakkuami isumaat naapertorlugu ilisimatuut inuussutissarsiornerullu iluani suliallit suleqatigiinnermikkut annertuumik iluaqutissarsisinnaapput.
”Aalisakkanut tunngasunik suliaqartilluni taakkuninnga inuussutissarsiuteqartut namminneq qimerluugaannik paasisaqarneq nalitoorujussuujuaannarpoq,” AnnDorte Burmeister oqarpoq. Andrias Olsen isumaqataavoq:
”Soqutigisaqaqatigiinneq suleqatigiinnermik ajornannginnerulersitsisarpoq.”