Arctic Hubermiut suleqatiminnik pisortartaarput
Allaaserinnittoq Nicoline Larsen
Arctic Hubip allattoqarfiani pisortatut atorfik inuttalerneqarpoq. Jula Maegaard-Hoffmann pisortanngorpoq. Atorfineqqammeraluarlunili avatangiisinik suleqatiminillu sungiusimannilluarpoq. Tassami Jula Maegaard-Hoffmann 2021-miilli Arctic Hubimi konsulentitut suliniutinillu aqutsisutut sulisimavoq.
”Kalaallit Nunaanni ilisimatusarneq aatsaat taama soqutigineqartigaaq, ukiunilu takkuttuni soqutigineqarneruleraluttuinnartussaavoq. Suliniutivut pingaarnerit siulliit aallartereernikuuavut, allattoqarfimmilu pisortatut Arctic Hubimi siunissami suliassatsinnik sammiviilinissara qilanaaraara,” Jula Maegaard-Hoffmann oqarpoq.
Anna-Sofie Skjervedal 2023-mi ukiakkut tunuarmalli Jula Maegaard-Hoffmann Arctic Hubip allattoqarfiani pisortaagallarsimavoq, januaarilli aallaqqaataanit pisortatut atorfinippoq.
“Suliniutivut pingaarnerit siulliit aallartereernikuuavut, allattoqarfimmilu pisortatut Arctic Hubimi siunissami suliassatsinnik sammiviilinissara qilanaaraara,” Jula Maegaard-Hoffmann
”Arctic Hubip ullumikkut peqatigiiffittut pingaaruteqalernissaa Anna-Sofiep sulissutigingaatsiarsimavaa. Qujamasuppugut Arctic Hub peqatigiiffittut nutaajugaluartoq ilisimatusarnermik sulialinnit tikilluaqquneqarluarmat. Taamaammallu ataqqinningaarlunga sulinera aallartippara – Arctic Hubimi siulersuisut allattoqarfimmiullu qanimut suleqatigalugit. Tunngaviliilluartoqareerpoq, suliarlu tamanna ingerlateqqissavarput Kalaallit Nunaanni ullut tamaasa ilisimatusarfigineqartartorpassuit soqutiginaqisut nunatsinni nunanilu tamalaani suli iluaqutigineqarnerulerniassammata,” Jula Maegaard-Hoffmann oqarpoq.
Arctic Hubip allattoqarfia Nuummiippoq, massakkorpiarlu piffissaq tamaat sulisut sisamaapput ataatsimillu praktikkertoqarluni. Allattoqarfik 2020-mi pilersinneqarpoq Kalaallit Nunaata Danmarkillu suleqatigiinneratigut. Arctic Hubip pilersinneqarneranut siunertarineqarpoq Kalaallit Nunaanni ilisimatusarfigineqartut malinnaavigiuminarnerulersinnissaat ilisimatusarnermilu paasineqartut innuttaasunut tamanut ammasuutinnissaat. Arctic Hubimi siulersuisuni siulittaasup, Ulrik Korsholmip, allattoqarfimmi pisortanngorlaamik suleqateqarnermi ingerlatiinnarnissaa qilanaaraa:
”Jula nalunngereeratsigu taassuminnga suleqateqarnitta ingerlatiinnarnissaa qilanaaraarput. Jula Arctic Hubimik aallarnisaaqataasimavoq suliarineqartunillu siullernik iluatsisitseqataasimalluni. Siulersuisut qularutiginngilaat Julap piginnaaneqarluarluni allattoqarfik suliassanut nutaanut siulersussagaa, Arctic Hub ilisimatusarnerup inuiaqatigiillu sunniivigeqatigiinnerannik naleqarnerulersitsiartortuarluni,” taama oqarpoq Ulrik Korsholm, Arctic Hubimi siulersuisunut siulittaasuunermi saniatigut Danmarks Meteorologiske Institutimi (DMI) direktørimut tullersortaasoq.
“Jula Arctic Hubimik aallarnisaaqataasimavoq suliarineqartunillu siullernik iluatsisitseqataasimalluni,” Ulrik Korsholm
Arctic Hubip suliaannut ilaavoq ilisimatusarfigisanik saqqummiussillaqqinneqqisaanneq Paasisavut, KNR-ikkut aallakaatinneqartoq. Aamma Arctic Hub workshoppertitsisarpoq ilisimatusartut ilisimatusaatigalugu suliaminnik ataqatigiissaariffigisinnaasaannik Greenland Science Weekimillu aallarnisaasunut pingaarnernut ilaalluni. Aammattaaq Arctic Hub Kalaallit Nunaanni ilisimatusarneq pillugu nalinginnaanerusunik videuliortarlunilu allaaserisaqartarpoq www.arctichub.gl-imi alakkarneqarsinnaasunik.
Apersuerusukkuit, assinik perusukkuit allanilluunniit apeqqutissaqaruit attaveqaqatigiinnermut akisussaasoq Nicoline Larsen attavigigiuk uku aqqutigalugit: nico@arctichub.gl imaluunniit tlf. 590901.