Arctic Hub pisortartaalerpoq

Augustip 11-ani

Ukiut pingasut ingerlaneranni Arctic Hub allattukkani takorluugaannaariarluni Kalaallit Nunaanni ilisimatusarnerup silarsuaani suliniuteqarfinngorsimavoq pingaarutilik. Maanna tamakkuninnga tamanik aallarnisaasoq allattoqarfimmilu pisortaasoq Anna-Sofie Skjervedal tunualerpoq.

Anna-Sofie Skjervedal 2020-p naalernerani Arctic Hubip allattoqarfiani pisortanngorami anguniakkat imaannaanngeqaat. Danmarkimi nunatsinnilu sivisuumik kissaatigineqartarsimavoq Kalaallit Nunaanni ilisimatusartunut kalaallinut, danskinut nunanillu tamalaaneersunut katersuuffeqarnissaa. Kissaat tamanna Arctic Hubip Anna-Sofie Skjervedalillu piviusunngortittussaasimavaat.

Danmarkimi naalakkersuisunit nunatsinnilu naalakkersuisunit allaffeqartitaalluni taakkualu aningaasaliissuteqarneratigut piumassuseqarluarluni Arctic Hubimik tunngavilersuillualerpoq. Taamanimiilli Arctic Hub, ullumikkut tallimanik piffissaq tamaat sulisoqartoq, Kalaallit Nunaanni eqqaanilu ilisimatusarfigineqartut pillugit paasititsiniaanermi malunnaateqarluartunik arlalinnik suliniuteqartarsimavoq.

”Isumaqarpunga Arctic Hub suliassiissutigineqartumik suliarinnilluareersoq. Arctic Hub tusaamaneqarneruleriartuinnarpoq, Kalaallillu Nunaanni ilisimatusarnermut atatillugu suleqatigiumaneqarluarpoq. Anna-Sofie allattoqarfiup pisortaatut tamatuma ineriartortinneqarnerani pingaaruteqarluinnarsimavoq,” Ulrik Smith Korsholm, Arctic Hubimi siulersuisunut siulittaasoq oqarpoq.

Ilisimatusarneq tamanuussaaq

Anna-Sofie Skjervedal ilisimatusartunik siullermeerluni saqqummiussillaqqinneqqisaatsitsinermi, Paasisavut-mi, marsimi Katuami KNR-ikkullu toqqaannartumik ingerlanneqartumi, naliliisartut sisamat ilaattut Kalaallit Nunaanni inuppassuarnit immaqa eqqaamaneqassaaq. Paasisavut Anna-Sofie Skjervedal pisortaatillugu Arctic Hubimi suliniutigineqartut pingaarnersaraat.

Anna-Sofie Skjervedalip Arctic Hubimiinnerani pingaarnersat ilagaat ataqatigiissaarinermi workshoppertitsineq, Arctic Hub Connect, aamma Kalaallit Nunaanni ilisimatusarneq pillugu ataatsimeersuarnerit annersaat, Greenland Science Week, Kalaallit Nunaanni Danmarkimilu ilisimatusarfiit suleqatigalugit tassaalersimasoq aaqqissuussaq ingerlateqqinneqartartoq nunani tamalaani akuerisaasoq.

”Siulersuisut sinnerlugit Anna-Sofie Arctic Hubimik tunngaviliinermi ineriartortitsinermilu sulilluarnera pillugu qutsavigerujussuarpara. Naatsorsuutigisatsinnit angusaqarnerusimaqaaq,” Ulrik Smith Korsholm oqarpoq.

Saaffiginnissutit, attaveqatigiinnerit ingerlatitseqqiinerillu

Ullumikkut Arctic Hub ilisimatusarnerup inuiaqatigiillu kalaallit akornanni ataqatigiissitsisuuvoq pingaarutilik. Assersuutigalugu Arctic Hub ullut tamaasa ilisimatusartunit silarsuarmi tamarmeersunit Kalaallit Nunaanni ilisimatusarfigisaminnut atatillugu naleqquttunik suleqatissarsiortunit ingerlatitseqqerusuttunilluunniit saaffigineqartarpoq. Tamatumunngalu tunngatillugu Arctic Hub nunaqavissunik ilisimasaqarluartunik tutsuiginartunillu attavissaqalernissaannut ikiuutaasinnaalluarpoq.

Kalaallit Nunaanni ilisimatusarnerup innuttaasunut ammanerulersinnissaannik anguniakkamut ilaasutut Arctic Hub allaaserisaqarnikkut, videuliornikkut explainerinillu saqqummiussisarnikkut ilisimatusarnermut tunngasunik nalinginnaanerusunik ingerlatitseqqiinermik suliaqartarpoq. Aammattaaq Arctic Hub arlalinnik aaqqissuussaqartarpoq ilisimasanik paarlaateqatigiinnissaq suleqatigiilluarnerulernissarlu qitiutillugu ilisimatusarnerup, inuussutissarsiornerup, ilinniartitaanerup pisortaqarfiillu akornanni inunnik katersuutsitsiffiusunik.

”Aaqqissuussanik assigiinngitsorpaalunnik tamarmik immikkut Kalaallit Nunaanni ilisimatusarnermik inuiaqatigiinnut naleqarnerulersitseqataasussanik tunngaviliisimavugut. Taamaattumik piffissami takkuttumi pingaarnertut suliassarissavarput Arctic Hubimi suliassanik pingaarnernik aalajaallisaanissaq, ingammik Kalaallit Nunaanni ilisimatusarnissamut periusissiaq nutaaq iluaqusiullugu,” Ulrik Smith Korsholm oqarpoq.

DMI-mi pisortatut atorfik

Septembarimi Anna-Sofie Skjervedal DMI-mi silasiornermik ilisimatusarnermut immikkoortortami Københavnimiittumi pisortatut atorfinissaaq. Nunatsinnulli attaveqartuarumaarpoq DMI kunngeqarfimmi tamavimmi silasiortarmat.

”Arctic Hub suliassattut pingaartissimaqaara. Aallaqqaaterpiaanit suleqataalluni nalissaqanngilaq, Arctic Hub allattukkani takorluugaannaariarluni ullumikkut allattoqarfeqarmat aalaakkaasumik tunngavilik. Suleqatikka pikkorissut piumassuseqarluartullu sulilluarneratigut suliaq tamanna namminerlusooq ingerlasinnaanngorsimavoq, taamaattumik Arctic Hubip ineriartornerata malinnaaviginissaa qilanaaraara,” Anna-Sofie Skjervedal oqarpoq.

Ulloq Anna-Sofie Skjervedalip suliffissaa kingulleq tassaavoq aggustip 15-iat, allattoqarfimmilu allamik pisortassarsiulerpugut. Pisortassarsiornitsinni Arctic Hubimi konsulenti suliniutinillu aqutsisoq Jula Maegaard-Hoffmann allattoqarfimmi pisortaagallarumaarpoq.

Paasissutissanik amerlanerusunik piumaguit Jula Maegaard-Hoffmann attavigisinnaavat (e-mail: jula@arctichub.gl, oqarasuaat: +299 263723).