AtaqatigiilersitsineqIlisimatusarneqInnuttaasutSilap pissusaata allanngoriartornera

Annap sila pillugu ilisimatusarluni misissukkat Tunumi innuttaasunit atorneqariaannaalersikkusuppai

Tasiilaq, Anna Burdenski, University of Vienna, snow, Snow2Rain, East Greenland, research, science, Arctic Hub,Ph.D. candidate in anthropology

Anna Burdenski Tasiilami inuunerup qanoq inneranik paasinninnissaminik pingaartitsivoq. Taamaattumik qaammatini qulini Tasiilamiinniarpoq. Najugaqavissunimmi nunanilu tamalaani silap pissusianik ilisimatuunik suleqatigiilersitsiniarpoq silap pissusianik ilisimatuut paasisaat najugaqavissunit Tunumi silap allanngoriartorneranik maluginnittunit atorneqariaannaanissaat qulakkeerniarlugu.

 

Allaatiginnittoq Signe Ravn-Højgaard

 

Tasiilap avatinnguani Anna Burdenski ikiortinilu tassani najugaqavissoq apummi itisuumik assaapput. Februaari naangajalerpoq, ukiorlu manna Tunumi illoqarfimmi pisarnermit apinerungaatsiarsimavoq. Taamaattumik Anna ajaappiamik suli allamik piseqqittariaqarsimavoq ajaappiaq aputip itissusianik uuttuutigisartakkani tallilerniarlugu.

 

Anna ikiortaalu silap pissusianik ilisimatuujunngikkaluarlutik ilisimatusaatigalugu suliniummut Snow2Rainimut aput pillugu paasissutissanik katersuipput. Uuttukkatik suleqatiminnut Østrigimi silap pissusianik ilisimatuunut nassiuttarpaat, suleqataallu uuttukkanut allarpassuarnut ilaliullugit uuttugaannik misissueqqissaassapput.

 

Silap pissusia ilisimatusarlugu

Uuttukkat silap pissusianik uuttueriaaserineqareersunut naleqqiunnissaat siunertarineqarpoq, Tasiilami eqqaanilu aputip silallu qanoq innissaannik siumut oqaatiginninniarluni periuserineqartartut qanoq pitsaatiginerat paasiniarlugu.

Suliniummi Snow2Rainimi ilisimatuut Wienimi Grazimilu universitetineersut Tasiilami eqqaanilu silap silallu pissusiata qanoq allanngoriartornerannik, allanngoriartornerillu Tunumi inooriaatsinut inuunerullu pitsaassusianut qanoq sunniuteqarnerannik, misissuipput. Taamaattumik suliniummi Snow2Rainimi ilisimatuut tigussaasunik uuttuiitigalutik najugaqavissut eqqaminni sila pillugu ilisimasaat misilittagaallu ilinniarfigaat.

 

Anna Burdenski, Wienimi universitetimi antropologiimi ph.d.-nngorniaq, najugaqavissut Tunup siunissaa pillugu takorluugaannik aamma silap silallu pissusiata Tunumi inuunermut  qanoq sunniuteqarsorinninnerannik pingaarnertut misissuivoq.

“Katersugaasivimmi ikiuutaanera ilisimatuutut misissuininnut Tasiilamiinninnullu pingaaruteqarsimaqaaq innuttaaqatigiinnut akuulernissannut iluaqutaasimammat,”
Anna Burdenski

 

Najugaqavissut ilisarisimanerulerumallugit Tunumilu qanoq inuusoqartarneranik paasinnikkumalluni Anna qaammatini qulini Tasiilamiinniarpoq, ph.d.-nngorniutiminut atatillugu ornigulluni misissuiutigaluni. Tasiilamiinnermini Tasiilap Katersugaasiviata ammaqqinneqarnissaani ikiuutaajumasimavoq.

 

Anna ima oqaluttuarpoq: ”Katersugaasivimmi ikiuutaanera ilisimatuutut misissuininnut Tasiilamiinninnullu pingaaruteqarsimaqaaq innuttaaqatigiinnut akuulernissannut iluaqutaasimammat. Katersugaasivimmimi inuit ullut tamaasa suliaqaqatigisarakkit.”

 

Ilisimatusarnermi innuttaasunik peqataatitsineq

Sila Tunumi ulluinnarni oqaloqatigiissutigineqarajuppoq. Ukiorlu manna pisarnermit apinerujussuummat eqqartorneqarluaqaaq. Sikumita qanoq avasitsigisoq tikillugu qajannaappa? Ullumi sermip nalaani piniariartoqarsinnaassagunarpoq. Massakkut sumut aalisariarsinnaavugut? Annap oqaloqatigiinnerit tamakku allattortarpai. Ulluinnarni sila pillugu oqaloqatigiinnerit tamakku inuit silap allanngoriartorneranik paasinnittaasiannik sunik ersersitsinersut paaserusuppaa.

Annap Tasiilami suliaanut ilaasoq pingaarutilik tassaavoq najugaqavissunik suliniummilu Snow2Rainimi ilisimatuunik suleqatigiilersitsinissaq.

 

Ima nassuiaavoq: ”Suliniummi Snow2Rainimi najugaqavissunik akuutitsinissaq pingaaruteqartorujussuuvoq. Najugaqavissunik akuutitsinitsigut neriuutigaarput ilisimatuutut misissuinitsinni paasisavut taamaalillutik inuit taakkua ulluinnaanni atorneqarluarsinnaalissasut. Taamaattumik anguniagaraarput ilisimatuutut misissuivigisassat maani innuttaasut pisariaqartitaannut naleqqussarneqarnissaat.”

 

”Siunissaq ungasinnerusoq eqqarsaatigalugu pissutsit qanoq innissaat pillugu paasissutissat najugaqavissut pingaartippaat, imaluunniit anori issilu – allarluinnaalluunniit – pillugit paasisaqarnissartik pingaarnerutippaat? Paasissutissarpassuaqarpoq ullumikkut atorneqarfiinut atornagit immaqa allatut atorneqarsinnaasunik. Immaqa paasissutissat misissueriaatsini allani atorneqarsinnaapput taamalu najugaqavissunit atorluarneqarsinnaanerulerlutik.”

 

Piniartunut takornarianullu pitsaaqutit

Assersuutigalugu Annap najugaqavissunik oqaloqateqartarnermigut paasisimavaa sermip siaruarneranik assit nunalluunniit assingi nutaanerusut atorluarneqarsinnaasut. Nunap assingi nutaanerusut iluaqutigalugit piniartut takornariallu sukkoorsinnaanerlutik takulluarnerusinnaassavaat. Silammi pissusiata allanngoriartorneratigut sermeq aakkiartorpoq milliartorlunilu taamalu nutaanik aqqutissaqalertarluni nunallu assingi pisoqqat atorneqarsinnaajunnaartarlutik.

 

Qaammatialuit qaangiuppata ilisimatuut suliniummit Snow2Rainimeersut Tasiilami workshoppertitsissapput, maannamut paasisimasaminnik saqqummiussissallutik, najugaqavissullu sila pillugu ilisimatusarnermut tunngatillugu isummaminnik kissaatiminnillu eqqartuillutik qanoq tapersiisinnaanerat pillugu oqalliseqatigissallugit, sila pillugu ilisimatusarfigineqartut inunnit silap sunniutaanik maluginnittunit atorneqariaannaaniassammata.

 

 

Anna Burdenski universitetimi Wienimiittumi Ph.D.-nngorniarpoq suliniummilu Snow2Rainimi suleqataalluni. Uani suliniut Snow2Rain atuaruk.

Assit
Allaatigisami assit tamarmik Anna Burdenski aamma Jorrit van der Schot