Anna Burdenski Tasiilami inuunerup qanoq inneranik paasinninnissaminik pingaartitsivoq. Taamaattumik qaammatini qulini Tasiilamiinniarpoq. Najugaqavissunimmi nunanilu tamalaani silap pissusianik ilisimatuunik suleqatigiilersitsiniarpoq silap pissusianik ilisimatuut paasisaat najugaqavissunit Tunumi silap allanngoriartorneranik maluginnittunit atorneqariaannaanissaat qulakkeerniarlugu.
Allaatiginnittoq Signe Ravn-Højgaard
Tasiilap avatinnguani Anna Burdenski ikiortinilu tassani najugaqavissoq apummi itisuumik assaapput. Februaari naangajalerpoq, ukiorlu manna Tunumi illoqarfimmi pisarnermit apinerungaatsiarsimavoq. Taamaattumik Anna ajaappiamik suli allamik piseqqittariaqarsimavoq ajaappiaq aputip itissusianik uuttuutigisartakkani tallilerniarlugu.
Anna ikiortaalu silap pissusianik ilisimatuujunngikkaluarlutik ilisimatusaatigalugu suliniummut Snow2Rainimut aput pillugu paasissutissanik katersuipput. Uuttukkatik suleqatiminnut Østrigimi silap pissusianik ilisimatuunut nassiuttarpaat, suleqataallu uuttukkanut allarpassuarnut ilaliullugit uuttugaannik misissueqqissaassapput.
Silap pissusia ilisimatusarlugu
Uuttukkat silap pissusianik uuttueriaaserineqareersunut naleqqiunnissaat siunertarineqarpoq, Tasiilami eqqaanilu aputip silallu qanoq innissaannik siumut oqaatiginninniarluni periuserineqartartut qanoq pitsaatiginerat paasiniarlugu.