Meeqqat angerlarsimaffianni pisortaq: Ilisimatusartunik suleqateqarnivut tamatsinnut iluaqutaasarput

Uummannami meeqqat angerlarsimaffianni meeqqat iluatsinnerminnik misigisaqartarput maligassaqalertarlutillu ilisimatusartut suliniuteqarneranni ikioraangamikkit.

Allattoq Nicoline Larsen 

Sikup ataanut aqqarsimapput. Sermersuarmi misissugassanik tigusiartoqataasimapput. Svalbardimiissimapput. Qaanaamut qimusserlutik angalasimapput. Meeqqat Uummannami meeqqat angerlarsimaffianniittut ilisimatusartut nunanit tamalaaneersut suliniuteqarneranni suleqataagaangamik assigiinngitsorpassuarnik misigisaqartarput.

”Tamanna tamatsinnut iluaqutaasoraara, tunniussaqaraangata tunineqaqqittaratta,” Ann Andreasen, Uummannami meeqqat angerlarsimaffianni pisortaq, taama oqarpoq.

Iluatsinnermik misigisaqarnerit maligassaqarnerlu

Ann Andreasen ukiuni 39-ni Uummannami meeqqat angerlarsimaffianni sulitillugu meeqqat angerlarsimaffiat ilisimatusaatigalugu suliniutinut assigiinngitsorpassuarnut peqataanissamut akuersisarsimavoq. Akuersisarneranut tunngaviuvoq ilisimatusartut meeqqallu angerlarsimaffianniittut imminnut tunniussaqarluarsinnaanerat.

”Ilisimatusartut misilittagaqarlutillu ilisimasaqarput, uaguttaarlu maani najugaqartugut misilittagaqarlutalu ilisimasaqarpugut. Taamaalilluta ikioqatigiissinnaavugut,” oqarpoq, imalu nassuiaavoq:

”Ilaanni inuusuttuaqqat atuarfinni ingerlalluanngitsut maani najugaqarput. Ilisimatusartoqatigiilli tikimmata inuusuttuaqqat taakku specialklassiniinnatik ilisimatusartunut ikiortaapput.”

Assiliisoq: Nicoline Larsen 

Ann Andreasenip maluginiarsimavaa ilisimatusartunik suleqateqartarnikkut meeqqat inuusuttullu angerlarsimaffimmiittut nutaanik piginnaasaqalertartut ilinniagaqartillutillu iluatsinnerminnik misigisaqartartut.

”Meeqqat maani najugallit ilaat atuarfimmi ingerlanerliortarsimapput, taamaattumik atuarfimmiitilluni nuannersunik misigisaqarneq inuunerannut allannguutaasinnaavoq.”

Ilisimatusartut meeqqallu angerlarsimaffimmiittut ilinniarfigeqatigiilluarsinnaapput

Suleqatigiinneruvorli, meeqqat ilisimatusartunut tunniussaqarluarsinnaaqimmata. Meeqqammi nunap ilaani tamaani oqaatsinik, kulturimik pinngortitarsuarmillu immikkut ilisimasaqartuupput.

”Meeqqat maaniittuutivut ilisimatusartunik misissueqateqariartortarnertik nuannarilluartaqaat, suleqatigigaangamikkimmi oqaatsitik nunartillu pillugit ilisimasatik atorsinnaasaramikkit,” Ann Andreasen oqarpoq.

“Taamaattumik atuarfimmiitilluni nuannersunik misigisaqarneq inuunerannut allannguutaasinnaavoq”
– Ann Andreasen

Assersuutigalugu eqqaavaa meeqqat inuusuttullu angerlarsimaffimmiittut pinngortitarsuarmiinneq piginnaasaqarluarfigigaat. Ilaanni meeqqat ilaat ilisimatusartoqatigiinnik franskinik sikup ataanut aqqaqataallutik misissuiartoqateqarput. Ilisimatusartut taakkua meeqqat imarmut nilleqisumut aqqarnerminni periaaserisaat ajasoorutigeqaat.

Oqaatsitigut ikioqatigiinneq

Ilisimatusartut meeqqallu taakkua misilittakkanik ilisimasanillu aveqatigiinnermik saniatigut tamarmik immikkut tunngaviulluinnartutigut ikioqatigiissinnaapput – tassa oqaatsit tungaatigut.

Assiliisoq: Parnuna Egede Dahl

”Meeqqat ilaat tuluttut ilinniarnissaminnik soqutiginnittorujussuupput. Tamannalu ilinniarnissamut periarfissaalluarpoq,” Ann Andreasen oqarpoq.

“Meeqqat maaniittuutitta inuit taakku tarrarsorfigisarpaallusooq, ilisimatusartullu taakkununnga maligassanngortarput”
– Ann Andreasen

Ann Andreasen nassuiaavoq inuusuttuaqqat angerlarsimaffimmiittut ilaat ilisimatusartunik Uummannamiittoqaraangat kalaallisuumiit tuluttuumut tuluttuumillu kalaallisuumut piffissap ingerlanerani nutserussisalersimasut. Taamaalillutik ilisimatusartut nutserinermut atatillugu ikiortissaqartarput inuusuttuaqqallu tuluit oqaasiinik atuinerusalerlutik.

Maligassat

Ukiut ingerlaneranni meeqqat angerlarsimaffianni meeqqat ilisimatusaatigalugu suliniutinut peqataasarnermikkut nuannersorpassuarnik nallernissaqanngitsunillu misigisaqartarsimapput, aammali meeqqat ilisimatusarnerup qanoq paasisariaqarnera ilisimatusartutullu sulineq paasisimasaqarfigilerpaat.

”Meeqqat maaniittuutitta inuit taakku tarrarsorfigisarpaallusooq, ilisimatusartullu taakkununnga maligassanngortarput. Atuarfimmi ingerlalluannginneq apeqqutaatinnagu, susassaaleqisarnani pinerlukujuttarnanilu nukiit silatusaartumik – inuiaqatigiinnut iluaqutaasumik – atorneqarsinnaapput,” Ann Andreasen oqarpoq.

Assiliisoq: Nicoline Larsen 

Naligiilluni attaveqatigiittoqassaaq

Ann Andreasen meeqqallu angerlarsimaffiat ilisimatusartunik suleqateqarnissamut akuersisinnaaqqullugit naligiilluni attaveqatigiittoqarnissaa piumasaqaataasarpoq.

”Naatsorsuutigaara avataaneersut aammattaarlu sulisutta meeqqallu maaniittuutitta ataqqinnittumik naligiillutillu suleqatigiittarnissaat. Naligiilluta naapeqatigiittarnissarput,” oqarpoq.

”Ilisimatusartullu suliaminnik naammassinnikkaangata sunik paasisaqarsimanersut soorunami paaserusuttarparput, filmit allaaserisalluunniit suleqataaffigineqartut ikiuutaasimasunut ilisimatusaqataasimasutullu misigisimasunut takutinniassagatsigit. Nuannertaqaaq takutissinnaallugit, kingusinnerusukkummi atorsinnaagamikkit allanullu ingerlateqqillugit.”