2024-mi Kalaallit Nunaanni ilisimatusarfigineqartut paasisassarsiorfigikkit
Allaaserinnittoq Nicoline Larsen
Qanittukkut ilisimatusartut 72-it nunanit, ilisimatusarfinnit peqatigiiffinnillu assigiinngitsuneersut 2024-mi Kalaallit Nunaanni ilisimatusarnissamut pilersaarutitik pillugit Arctic Hubip internetikkut workshoppertitsinerani paasissutissiipput. Ilaatigut nunatsinnit, Danmarkimit, USA-mit, Tuluit Nunaannit, Finlandimit, Schweizimit, Tysklandimit Canadamillu peqataasoqarpoq, peqataasullu ilisimatusarfigisaat ilaatigut tassaapput peqqissuseq, nunasiaataajunnaarsaaneq, silap pissusia perorsaanerlu.
Arctic Hub Connect malinnaasinnaanerulersitsivoq
Workshoppertitsineq Arctic Hub Connectimik taaguuteqarpoq, taannalu aqqutigalugu Arctic Hub ilisimatusartunut kajumissaarivoq piffissami takkuttumi ilisimatusarnissamik pilersaarutitik ilisimatusartoqatiminnut innuttaasunullu aveqatigissagaat. Ukioq manna workshoppertitsineq februaarip 7-ianni pivoq.
”Soorlu amerlanersaasa nalunngereeraat nunatsinnut ilisimatusariartortartut amerlaqaat, taakkualu ilisimatusarfigisaasa malinnaavigilluarnerusinnaalernissaat Naalakkersuisut Arctic Hubillu anguniagaraat. Taamaattumik nuannaarutigeqaarput ilisimatusartut taama amerlatigisut ukioq manna Arctic Hub Connectimut peqataarusussimammata, taamaalillutami nunatsinni ilisimatusarfigineqartut ilumut malinnaavigilluarnerusinnaanngortaratsigit,” Jula Maegaard-Hoffmann, Arctic Hubip allattoqarfiani pisortaasoq, taama oqarpoq.
Naalakkersuisut kissaataat
Kalaallit Nunaanni ilisimatusartut nalunaarsortikkiartortarnissaannik malittarisassaqanngimmat suut ilisimatusarfigineqarnerannik tamakkiisumik malinnaasoqarsinnaanngilaq. Nunatsinnili ilisimatusarnerit tamarmik nunatsinnut iluaqutaasarnissaat Naalakkersuisut ilisimatusarnermut periusissiaani pingaartinneqarluinnarpoq. Anguniagaq tamanna angujumallugu pingaarnerpaamik ilisimaneqartariaqarpoq nunatsinni suut ilisimatusarfigineqarnersut. Matumanilu ilisimatusartut suleqataarusussuseqarnissaat aalajangiisuulluinnassaaq.
”Arctic Hub pingasoriarluni taamatut workshoppertitsisimavoq, workshoppertitsinerillu tamaasa peqataasartut amerleriarujussuartarput. Tamanna ilisimatusartuttaaq Kalaallit Nunaanni ilisimatusarfigineqartut malinnaavigilluarneqarsinnaanerunissaannik anguniagaqarnerannut takussutissatut isigaara,” Jula Maegaard-Hoffmann oqarpoq.
Arctic Hub Connectip saniatigut aamma Isaaffik.org pingaarnerpaamik pinngortitamik ilisimatusartut paasissutissanik avitseqatigiiffigisartagaattut ilisimatusarlunilu angalanernik attaveqatigiinnernillu ataqatigiissaariffigisartagaattut atugaavoq.
Nunap assinga innuttaasut malinnaaffissaat
Ilisimatusartut piffissami takkuttumi pilersaarutiminnik aveqatiginninnerisa saniatigut workshoppi aqqutigalugu periarfissaqartarput pingaarutillit oqaloqatigiissutiginissaannut – soorlu ileqqorissaarnermut atatillugu illersorneqarsinnaasumik nunaqavissut qanoq peqataatinneqarsinnaanersut, aamma ’research fatigue’-mik – tassa innuttaasut ilisimatusaatigalugu suliniutinut assigiinngitsorpassuarnut peqataaqquneqartangaaramik qatsussisarnerannik – qanoq annikillisaasoqarsinnaanersoq.
”Neriuppugut innuttaasut ilaasa artukkerneqartarnerannik pitsaaliuisinnaassalluta nunap assinga malinnaavigineqarsinnaasoq atorlugu. Nunap assinga atorlugu ilisimatusartut ataqatigiissaarisinnaapput innuttaasut aalajangersimasuinnaat ilisimatusaatigalugu suliniutinik artukkerneqannginniassammata. Aammali taanna iluaqutigalugu innuttaasut kajumissaarneqarput najukkaminni suut ilisimatusarfigineqarnerannik malinnaaqqullugit,” Jula Maegaard-Hoffmann oqarpoq.
Nunap assinga maanna tamanut ammavoq, kikkullu tamarmik taanna paasisassarsiorfigisinnaavaat ugguuna.
