Suliniutit
Arctic Hub-imi suliniutigut tamavimmik Kalaallit Nunaanni ilisimatusarnikkut ingerlanneqartunik uummammioqarput. Oqartoqarsinnaavoq suliagut tassaallutik sulianik tamanik uummammik ingerlalluarfiusumik aqqusaartuiffiusussamik qulakkeerinniffiusoq. Ilisimatusarnikkut inuiaqatigiinnilu ataqatigiilersitsiviuvoq naapeqatigiinnerit aqqutigalugit, ilisimatuullu inuussutissarsiortut, pisortat oqartussaaffiinik, ilinniartitaanermilu ingerlatsiviusut kiisalu nunat tamalaat akornanni suleqatigisanik naapeqatigiisitsilerfiusoq.
Kalaallit Nunaanni ilisimalikkat pissarsiarineqartut naleqaqisut Kalaallit Nunaanni inuiaqatigiinni pissarsiarineqarnissaat isumagissavarput. Ingerlatitseqqinnikkullu tamanna angussavarput, aammali ilisimatuut suliaqarneranni sumiiffimmi innuttaasunik eqeersimaartumik peqataalersitsinissaannik ikiuunnikkut. Naatsumik oqaatigalugu: ilisimalikkat ilisimatuussutsip silarsuaannit avammut siaruaallugit ammaatissavagut, piujuartitsinermillu toqqammaveqarluni ineriartortitsinissat siuarsaanissallu aqqutissiueqataaffigissallugit – Kalaallit Nunaanni nuarsuullu sinnerani iluaqutigisassanngorlugit.
Siunnerfik
Issittumi ilisimatusarnermik peqataalersinnaaneq ajornaatsuussaaq. Arctic Hub-illu taamaammat qiteraliuffissamik ataatsimoorfissamik pilersitsivoq, ilisimatuullu naapeqatigiiffigisinnaasaanik pilersitsilluni, ingerlatseqatigiiffiit suleqatigiiffigilerfissaanik pilersitsivigineqarsinnasumik, innuttaasullu Kalaallit Nunaanni ilisimatusarfiusunik eqeersimaartumik peqataaffigisinnaasaannik. Qularutiginngilarpummi Kalaallit Nunaanni Kalaallit Nunaatalu eqqaani ilisimalikkat piujuartitsinermik toqqammaveqarluni inerisaanissat aqqutissiueqataaffigisinnaagaat.
Ilaatigut ilisimatusarnerup nunat tamalaat akornanni unammilligassat aaqqiissutissaannik nassaarfiussammat, assersuutigalugu silaannaap allanngoriartornerata ajulusoortitsinerata unammilligaqalersimmatigut. Kalaallit Nunaannili aamma ilisimalikkat nutaat pitsaanerusumik ineriartortitsinissamut iluaqutigineqarsinnaapput. Taamaammallu issittumi ilisimasat tamanut ammasunngortinnissaat suliniutigaarput.