Jenniferip sermeq malinnaaffigeqqissaarpaa
Ilisimatuutut misissuinermi silaannaap pissusiata allanngornerata sumiiffimmi sermip qanoq sunnertarneraa itisilerneqarpoq. Paasisat sumiiffinni inunnut atorneqarsinnaassapput, taakkumi sermeq sisorarfittut qamuteralaffittulluunniit atortarmassuk.
Allaatiginnittoq Phillippa Mangalika Maigaard Filtenborg
Teknologiip nutaap ilisimatuutut misissuisut aputip sermillu sermersuarmi allanngornerisa nakkutigineqarnerannik nalunaarsorneqarnerannillu ikiorsertarpai.
Ilisimatuutut suleqatigiit ataatsit time-lapserluni (piffissamik aalajangersimasumik akunnilertarluni) assiliinerit atortarpaat aput sermerlu sermeqarfinni qanoq allanngortarneri nakkutiginiarlugit nalunaarsorniarlugillu. Ph.D-tut Ilisimatuutut misissuisoq Jennifer Arthur Dunham Universitymeersoq Kalaallit Nunaanni ilisimatuutut misissuisut nunanit allaneersut amerlasuut Asiaq Greenland Survey-imik suleqateqartut ilagaat. Ilisimatuutut misissuinini sumut tunngasuunersoq ima nassuiarpaa:
”Ukiup ilaata ingerlanerani aputip sermillu qanoq allanngoriartornerat ilisimatusarnikkut misissorparput. Taamatut nakkutiginninnikkut klimap allanngornerata sermimut qanoq sunniuteqarneranut takussutissarsisarparput,” Jennifer Arthur oqarpoq.
Ilisimatuutut suleqatigiit assiliivik time-lapsertillugu ikkuppaat, taannalu assit kisissaanngiusartut nalunaaquttap-akunneri ikittut qaangiukkaangata assiliisarpoq. Taamaalillutik ineriartorneq qanimut malinnaaffiginiarlugu asserpassuarnik peqalerput. Tunuani allattarfiusarsuarmi Kangerluarsunnguami Qasigiannguit Sermiata assilineqarnera takuneqarsinnaavoq. Sermit aputitaasa allanngornerinik pissarsiffiisa taanna ilagaat.
Taamatuttaaq ilisimatuutut suleqatigiit sumiiffimmi najugallit ilisimatuutut sulinerminnut ilanngutitippaat. Tassami tamaani najugaqartorpassuit sermeq Kangerluarsunnguamiittoq taannarpiaq sisorarfigaluguluunniit qamuteralannik aqqutigisarmassuk.
”Nuummiut akulikitsumik maanga sermimut tassungarpiaq sisorariakaasarput qamuteralakkiartorlutilluunniit. Taakku takusaat malugisaallu ilisimatuutut sulinitsinnut ilannguttarpavut, suleqatigiinnittalu paasisat atorneqarsinnaanerulersittarpai. Taakku iluaqutigalugit namminerlu misissuinerput atorlugu naatsorsorsinnaavarput ukiup ingerlanerata qanoq ilinerani nunap ilaata taassuma angalaffiginissaa isumannaannerpaanersoq, Jennifer Arthur oqarpoq.