Maanna Kalaallit Nunaanni uumassusilerinermi bachelorinngorniarsinnaanngorputit

Allattoq Nicoline Larsen.
Assiliisoq Daniel Lyberth Hauptmann.

Sapaatip-akunnerini kingullerni Kalaallit Nunaata ilisimatusarfeqarnermi oqaluttuarisaanerani kapitali nutaaq aallartippoq. Nunatsinni uumassusilerituunngorniarfeqarnissaa ukiorpassuarni takorloorneqartarsimavoq. Takorluugaq tamanna maanna piviusunngorpoq.

Ilisimatusarfik Pinngortitaleriffillu suleqatigiillutik uumassusilerinermi bachelorinngorniarfimmik pilersitsipput SILA-mik taaguuserlugu, maannalu tassani ilinnialernissaq qinnutigineqarsinnaanngorpoq.

”Nunatsinni ilaqutariit ilarpassui piniarnermik, aalisarnermik pinngortitamiinnermillu annerusumik minnerusumilluunniit sungiusimannikkamik iluanaarput. Nukittuffigisat taakku ilinniakkamut tunngavissaalluarput,” Aviaja Lyberth Hauptmann, uumassusilerinermik ilinniarfimmi nutaami SILA-mi pisortaq, oqarpoq. Imalu nangippoq:

”Uumassusilinnut tunngasut inuiaqatigiittut ilisimasaqarfigilluaqaagut, inunnillu ilisimaneqareersut taakku aallaavigalugit SILA-mi ilisimatusartoqassaaq.”

Isumassarsiaq piviusunngortoq

Aviaja Lyberth Hauptmann, tappiorannartunik ilisimatuutut misissuisimasoq 2016-imi nittartakkakkut allaaserisaqarsimavoq. Allaaserisami tamatumani isumassarsiai SILA-p pilersinneqarneranik kinguneqartut siulliit allassimapput.

Tassani isumaliutersuutigaa Kalaallit Nunaanni innuttaasut amerlanersaasa misilittagaannik piginnaasaannillu aallaaveqartumik uumassusilerituunngorniarfeqarnissaa pissusissamisuussasoq.

”Uanga ilaquttanni inuiaqatigiittullu kulturitsinni tuttunniarneq aallunneqarluartuuvoq. Paasilerparalu tuttunniarumalluni uumassusilerinermi ilisimasaqarluarnissaq pisariaqartoq, takorluulerparalu ilinniakkap ilaatut aavariarsinnaagaanni qanoq nuannertigissasoq,” Aviaja Lyberth Hauptmann oqarpoq.

”Qilanaaqaagut. Ilinniartitariligassavut kikkuuppat? Qanoq igissavaat? Takorluukkatsitut nuannertigilissava?”
– Aviaja Lyberth Hauptmann

Ukiuni pingasuni kingullerni taanna Kalaallit Nunaanni uumassusilerituunngorniarfiliornissamik takorluukkap piviusunngortinniarnerani siuttuusimavoq.

”Maannalu ilinniagaq tamanna pilersereerparput. Kursusit ilaat ’Tuttu’-mik taaguuteqarpoq. Kursusillu tamatuma ingerlanneqarnerani aavariassaagut. Tamanna eqqarsaatigalugu killitsinnaqaaq.”

Nunatsinni uumassusillit ataqatigiiaarnerannik nammineq paasinnittariaqarlutalu nakkutilliisariaqarpugut

’Tuttu’-p saniatigut semesterinut pilersaarummi kursusit ilaatigut ima taaguutillit ingerlanneqassapput: ’Appa’, ’Siku’, ’Puisi’ aamma ’Imaq’. Fagit taakku tamarmik nunatsinni pissutsinik piviusunik aallaaveqarput. Aviaja Lyberth Hauptmannimummi taassumalu SILA-mi suleqataanut allanut erseqqippoq sooq Kalaallit Nunaat nammineq uumassusilerituunngortitsisinnaasariaqartoq.

”Nunatsinni isertitatta 90 procentii immami uumassusilinnik tunngaveqarput. Aalisarnikkut isertitat atorlugit nunatsinni napparsimmaviit nunatsinnilu paaqqinnittarfiit akilersorneqarput. Taamaattumik soorunalimi maani innuttaasut uumassusillit ataqatigiiaarnerannik inuuffigisatsinnik paasinninnissamut piginnaaneqartariaqarput nakkutilliisinnaasariaqarlutillu,” Aviaja oqarpoq.

Ilinniartunut assigiinngitsunut ammasoq

Aviaja Lyberth Hauptmannili isumaqanngilaq ilinniagaq taamaallaat kalaallinut inuiaqatigiittut pingaaruteqartoq. Isumaqarpoq aamma inunnut ataasiakkaanut pingaaruteqassasoq.

”Ilinniagaqarneq naggataatigut suliffeqalernissamut tunngaannanngilaq. Ilinniaqarnikkut inuttut silarsuarmi sutigut allanngueqataasinnaaneq aamma paasineqartarpoq. Aalajangersimasunik sakkussaqalernikkuinnaanngitsoq, aammali apeqqusiisinnaassusermik ineriartortitsinikkut inuttullu kinaassutsip paasiniarsarineratigut,” oqarpoq.

”Taamaattumik ilinniakkap matuma inuttut imminut tatiginerulersitsinissaa kissaatigeqaarput.”

Eqqarsaatit taakku aallaavigalugit qinnuteqarusuttut ilinniakkamut assigiinngitsutigut piukkunnarsarsinnaatinneqarput, kikkut tamarmik ilinnialernissamut akuerisaanissamut naligiinnik periarfissaqarniassammata.

”Ilinniagaq ilinniarnertuunngornianut ilinniarnertuunngorniarnerminni angusarissaarluarsimasunut inuunertillu tamaat pinngortitamik ilisimatusarusussimasunut ammavoq. Aammattaarli inunnut ilinniarnertuunngorniarnissamik toqqaasimanngitsunut uumassusillilli pillugit ilisimasaqarluartunut inuiaqatigiinnullu tunniussaqarluarsinnaasunut ammavoq,” Aviaja Lyberth Hauptmann oqarpoq.

Taamaattumik Aviaja Lyberth Hauptmann suleqataalu SILA-mi siullerpaatut ilinnialersussanik toqqaalerunik pissutigisat allaatigalugit qinnuteqartut pingaarnerpaatinneqassapput.