Kalaallit Nunaanni ilisimatuutut misissuinernik suliniutit massakkut ingerlasut nassaarikkit
Kalaallit Nunaanni eqqaanilu ilisimatuutut misissuinernik suliniutit massakkut ingerlasut pillugit ilisimasaqarusukkuit ISAAFFIK saaffissaavoq.
ISAAFFIK tassaavoq Kunngeqarfimmi Danmarkimi ilisimatusarfiit ilisimatuutullu misissuiffiit tamarmik Kalaallit Nunaanni, Danmarkimi aamma Savalimmiuni ilisimatuutut misissuinermik suliniuteqartut suleqatigiiffiat.
“Ilisimatuutut misissuinermi suliniutit tamakkiisut takorusukkukkit, taava ISAAFFIK-mut isiinnarsinnaavutit Kalaallillu Nunaanni sammisat aalajangersimasut imaluunniit nunap ilaa aalajangersimasoq ujarlugu suliniutillu ingerlanneqartut imaluunniit aappaagumut pilersaarutigineqartut paasisaqarfigalugit,” Peter Schmidt Mikkelsen ISAAFFIK-mi Issittumut ‘isaavimmi’ ataqatigiissaarisoq oqarpoq.
ISAAFFIK-up aamma nunani assigiinngitsuni ilisimatusarnikkut suliaqarfiit suleqatigiinnissamut peqatiserai.
Isaaffik-mut ilitsersuummut qanoq ilanngussinnaanerlutit ugguuna takuuk.
Issittoq annertoorsuarmik sukkaqisumillu allanngoriartorpoq. Silap pissusiata allanngoriartornera ilisimatuutut misissuinernik aamma nunat assigiinngitsut akornanni killeqarfiit akimorlugit suleqatigiinnissanik perusunnerup annerulerneranut tunngaviuvoq. ISAAFFIK tassaavoq ilisimatusarnikkut misissuinermi suliniutinik angusanillu katersuivik. Arctic Hub-ilu tassaalluni Nunatsinni inuiaqatigiinnut atugassanik immikkoortiterivik.
“Oqaluttuat pitsaasut katersorpavut katersaatitsinnullu ikisarlugit. Neriuutigaarput Arctic Hub-ip oqaluttuat katersortassagai tamanullu takuneqarsinnaasunngorlugit ingerlateqqittassallugit,” Peter Schmidt Mikkelsen oqarpoq.
Isaaffik-mut ilitsersuummut qanoq ilanngussinnaanerlutit ugguuna takuuk.
ISAAFFIK-up pitsaasumik patajaatsumillu peqateqarnissap qanoq pingaaruteqartiginera ilisimareerpaa. Assersuutigalugu Arktisk Kommandomik qanimut suleqateqarput.
“Nalinginnaasuunngilaq ilisimatuutut sulinerup sakkutuunik taama qanitsigisumik suleqateqarnera, kisianni Kalaallit Nunaat siammaseqimmat isorartussutsit annertoqaat. Nunap ilaa annertoorujussuarmik tikikkuminaatsuusarput,” Peter Schmidt Mikkelsen oqarpoq.
Immikkoortut ilaanni sakkutuut umiarsuaat kisimik takkuttarput. Aallartussaasarmata ISAAFFIK aamma Arktisk Kommando isumaqatigiipput ilisimatuutut misissuisut ingerlanneqarnissaminnik qinnuteqarsinnaasut. Arktisk Kommandolu inissaqartitsippat ikiuinissaminullu piffissaqarluni ilisimatuutut misissuisut ilaasinnaasassapput.