Arctic Hub unnummi kulturisiorfimmi ullorissanik isiginnaariartoqqusivoq

By Nicoline Larsen

Qalipaatit, qaamaneq ullorissallu taaguutillit taarsuarmi uisorilasut. Taakku tassaapput Ulloriarsiuup, planetariap pullattakkap, iluani issialluni isiginnaarneqarsinnaasut.

Planetaria silataaniit isigalugu illuikkiamut eqqaanarpoq, qilaavalu qaarajuttoq ulloriarasaarpoq. Illuikkiamut iserniartilluni pisarnertulli Ulloriarsiooq paarmorluni iserfigisariaavoq, Nuummiullu unnummi kulturisiorfimmi taanna iserfigisinnaassavaat. Unnummummi kulturisiorfissamut atatillugu Arctic Hubip planetaria, Ilinniartitaanermut Aqutsisoqarfimmit pigineqartoq, atorniarsimavaa.

“Ulloriarsiooq Sisimiuni iserfigeqqaarakkuli Nuummukaallugu innuttaasunik alakkaaqqusinissarput takorloorsimavara,” Jula Maegaard-Hoffmann, Arctic Hubimi pisortaagallartoq, oqarpoq. “Nuummukaannissaalu iluatsereermat allat takusimasannik takusaqartinnissaat qilanaareqaara.”

Kalaallit Nunaanni astrofysikerit siullersaat naapisimaaruk

Pikialaarfimmili aaqqissuussami qilammik isiginnaarnissap saniatigut aamma allamik periarfissaqassaaq. Tassami Ivalu Barlach Christensen, Kalaallit Nunaanni astrofysikerit siullersaat, peqatigalugu avataarsua pillugu ilinniarsinnaassaatit.

Ivalu Barlach Christensenip ph.d.-nngorniutini Bonnimi Tysklandimiittumi suliaraa. Unnummili kulturisiorfimmi Nuummiissaaq.

“Ivalu arnaavoq inuusuttoq maligassaqqissoq ingammillu meeqqanut inuusuttunullu avataarsua pillugu oqaluttuarnermik nuannarisaqartuusoq. Nuannaaqaagut Nuummukarniarmat kikkunnullu tamanut – qassinilluunniit ukiulinnut – paasiuminartumik ilisimasaminik oqaluttuariartorusummat,” Jula Maegaard-Hoffmann oqarpoq.

Unnuk kulturisiorfik ingerlanneqassaaq arfininngornermi januaarip 20-anni nal. 15-18 Pikialaarfimmi Kivioq 5-imiittumi. Aaqqissuussaq tamanut ammavoq, peqataanerlu akeqanngilaq.  

Ivalup Aasianniit ullorissanullusooq angalanera pillugu uani atuarit ‘Astrofysikeri Aasiammiu‘.