Naalakkersuisoq Vivian Motzfeldt Arctic Hubimi siulersuisunut ilaasortanngortitaqarpoq.
Allattoq Nicoline Larsen
Naalagaaffinngornissamut Nunanullu Allanut Naalakkersuisoqarfik maanna tamanut nalunaarutigereerpaat Arctic Hubimi siulersuisunut ilaasortanngortut kikkuunersut. Ilaasortanngorlaat ukuupput:
– Nuunu Ludvikka Johansen Jeremiassen, SIP-mi siulittaasoq, Sulinermik Inuussutissarsiuteqartut Kattuffiat (SIK)
– Elna Thomsen Heilmann, Ilinniartitsisut Meeqqat Atuarfianneersut Kattuffianni (IMAK) siulittaasoq
– Frederik Fuuja Larsen, Nunatta Katersugaasiviani Allagaateqarfianilu pisortaq
Naalagaaffinngornissamut Nunanullu Allanut Naalakkersuisoqarfiup tusagassiorfinnut nalunaarutaa naapertorlugu Naalakkersuisup Vivian Motzfeldtip neriuutigaa ilaasortanngorlaat ilisimatusarnermik inuiaqatigiinnut siammartereqataassasut, Kalaallit Nunaanni aamma Kalaallit Nunaat pillugu ilisimatusarfigineqartut innuttaasunit peqataaffigineqarlutillu iluaqutigineqarsinnaaqqullugit.
Arctic Hubimi siulersuisunut ilaasortat arfineq-pingasuupput, taakkunannga sisamat nunatsinneersunit toqqagaapput sinnerilu Danmarkimeersunit. Ilaasortanngorlaat nunatsinneersunit toqqagaasut pingasut saniatigut Arctic Hubimi siulersuisunut ilaasortat ukuupput:
– Ulrik S. Korsholm, direktørimut tullersorti, DMI – Danmarks Meteorologiske Institut
– Mininnguaq Kleist, Naalagaaffinngornissamut Nunanullu Allanut Naalakkersuisoqarfimmi pisortaq
– Torben Røjle Christensen, ilisimatusarnermi aqutsisoq, Greenland Ecosystem Monitoring aamma Zackenberg Research Station
– Lise-Lotte Terp, CEO & Founder ProConsi International
– Ditte Mesick, pisortap tullia, Uddannelses- og forskningsstyrelsen