Sumiiffinni suliffeqarfiit ilisimatuutut misissuinermit tapersersimaneqartut
Angalatitsivik Nuummeersoq isumaqarpoq ilisimatusarnikkut angusat nutaat inuussutissarsiornermi ineriartornermut periarfissiisut.
Allaatiginnittoq Phillippa Mangalika Maigaard Filtenborg
Saki Daorana tassaavoq Nuummi angalatitsivimmi sulisuusoq. Covid-19-eqarnerup nalaani sullitai tassaanerupput tusagassiortut aamma piviusulersaarutinik suliaqartartut ilisimatusarnikkut nutaarsiassanik ujaasisut.
”Takornariat nalinginnaasut tikittanngillat, sullitakkalu amerlanerpaat tassaasimapput inuussutissarsiutigalugu ilisimasanik piviusunillu ujartuisut. Tamatuma kingunerisaanik inuiaqatigiinni ilisimatuunut attaveqaataanikuuvunga ilisimatuussutsikkullu nalunaarusiat atuartarlugit,” Saki Daorana oqarpoq.
Saki Daoranap sullitaasa paasissutissat suut tamaasa atorfissaqartippaat – silap pissusiata sermillu allanngorneraniit qilalukkanut qernertanut nannunullu. Aammattaaq nunap inoqqaavinut kulturiannullu soqutigisaqarneq annertunerulersoq misigaa. Taamaattumik Greenland Science Week-imut peqataavoq ilisimasani itisilerniarlugit inuillu nutaat naapinniarlugit.
“Internetimi ujaasisinnaajuarpugut, e-mailimik nassiussilluta imaluunniit ilisimatuutut nalunaarusianik atuarluta. Kisianni inuk naapillugu oqaluullugu allaavoq. Sumiiffimmi ataatsimi peqataasut amerlasuut ataatsimut isumasioqatigiinnerannut peqataaneq iluaqutaaqaaq,” Saki Daorana oqarpoq.