Qaqqat sisooratarsinnaanerat – alapernaarsuiveqarluarneq isumannaallisaataassaaq
Aatsitassanut immikkoortortaqarfimmi nalunaarusiaq nutaaq naapertorlugu Uummannap sulluani qaqqat suli sisooratarsinnaapput. Ujarassiuulli oqarput qaqqanik nakkutilliinerulernikkut sioqqutsilluni aarlerisaarisoqarsinnaassasoq.
Allattoq Rasmus Balle Hansen
Umiammakku Nunaanni Kangerluarsummilu ukiuni marlunni misissuereernerup alapernaarsuivinnillu paasissutissanik katersuereernerup kingorna Ujarassiornermut immikkoortortaqarfik, Inuutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmiittoq, qaqqat sisooratarsinnaanerat pillugu nutaanik paasisaqarpoq.
Tamaani qaqqat sisoorsinnaanerannik aarlerinartoqaraluartoq ujarassiuut nalunaarusiaat nutaaq naapertorlugu tassaarsuit annertussusii siornatigut ilimagineqartumit annikinnerungaatsiartutut nalilerneqarput.
Qaqqaq kaanngalasoq eqqumaffigineqartariaqarpoq
2017-imi qaqqap sisoorfiata kangiatungaani qaqqaq kaanngalasoq siumorneqarsimavoq. Qaqqat taanna ”2017 kangilleq”-mik taaneqartartoq, immikkut aarlerinaateqarpoq siornatigullu malugineqarsimanani. Taamaattumik ukiuni tulliuttuni tamatuma eqqaa ilanngullugu alapernaarsuiffigineqartassaaq.
“Uummannap sulluani pinngortitami ajunaarnersuaqarneratigut qaqqat annertuumik sisoorsinnaaneri eqqumaffiginerulersimavarput. Alapernaarsuiveqarpugut, tassani assiliiveqarpoq nunallu sajuppillattarneranik uuttuutinik aamma peqarluni GPS-eqarlunilu. Taakkuupput pingaarnerit paasissutissat pissarsiarisartakkavut,” Jonas Petersen, Ujarassiornermut immikkoortortaqarfimmi ujarassiooq, taama oqarpoq.
“Ukiut 100 tulliuttut ingerlaneranni qaqqat sisoortartut amerlassanersut erseqqissumik akineqarsinnaanngilaq,”
– Jonas Petersen
2024-p ingerlanerani tamatuma eqqaa misissuiartorfigineqartaannassaaq, paasisallu nutaat aarlerinartunik misissueqqissaarnermut pitsanngorsaaqataassapput.
Siunissami qaqqat sisoorsinnaanerat
Imaanngilaq qaqqat tamarmik nakkaakkiartulersut, qaqqallu sisooraangata tamanna sivisuumik ineriartortoqarnerata kingornatigut pigajuppoq. Ujarassiuulli silap pissusiata allanngoriartornera tamatumalu nunap iluanut qeriuaannartumut sunniutai siunissami qaqqat sisoorsinnaanerannik aarlerinartoqarnerulersitsisinnaasut imminnut attuumassuteqarsinnaasoraat. Ilaatigut tamanna pissutigalugu ukiuni takkuttuni nuna tamakkerlugu alapersuiveqalernissaanik pilersaarusiortoqarpoq.
“Ukiut 100 tulliuttut ingerlaneranni qaqqat sisoortartut amerlassanersut erseqqissumik akineqarsinnaanngilaq, sumiiffiilli silap allanngoriartorneranit sunnerneqarsimasuni imaassinnaavoq akulikinnerusumik pisalersoq,” Jonas Petersen oqaluttuarpoq.
Nunap ilua qeriuaannartoq suua?
Nunap ilua qeriuaannartoq tassaavoq nunap ilua sivikinnerpaamik ukiuni marlunni ukioq naallugu qerisimasoq. Nunap ilua tamanna aasaagaluaraangalluunniit qeriuaannartuuvoq.
Jonas Petersen Ujarassiornermut immikkoortortaqarfimmilu suleqataa Eva Mätzler.
Assiliisoq: Rasmus Balle Hansen
Kalerrisaarutit isumannaallisaanermut iluaqutaassapput
Qaqqat sisooratarsinnaanera eqqumaffigineqarsinnaavoq, aammali innuttaasut tamanna pillugu kalerrisaarneqarsinnaasariaqarput. Ullumikkut pissutsit atuuttut naapertorlugit immikkoortortaqarfik qaqqap sisoornissaa pillugu ilimasaarisinnaavoq, aammali naatsorsuutiginngisamik qaqqat sisuussagaluarpata pilertornerusumik kalerrisaarisoqarsinnaanissaanik aaqqissuussisoqarnissaa kissaatigineqarpoq.
Aatsitassanut immikkoortortaqarfimmi ujarassiuut maannakkorpiaq ilisimatusaatigalugu suliniutini marlunni peqataapput. Suliniutit kalerrisaarummik nunaqarfinni navianartumiittuni innuttaasunik ingerlaannaq – assersuutigalugu sms-ikkut – qaqqat sisoornerannik kalerrisaarisinnaasussamik ineriartortitsinissamut atuutilersitsinissamullu tunngapput.
Kalerrisaarummilli taama ittumik ineriartortitsiniarneq imaannaanngilaq qaqqat sisooratarsinnaasut eqqaat, pinngortitarsuup nukingisa sakkortusinnaaffiat, kalerrisaarummik sanaartorfigiuminaammata. Ujarassiuulli ilisimatusartullu Kalaallit Nunaanni atorneqarsinnaasumik allamik aaqqiissutissarsiornissamut tunngatillugu isumalluarput.
Jonas Petersenip suleqataasalu Eva Mätzlerip aamma Alexander Philip Gamblep Ujarassiornermut immikkoortortaqarfimmiittut nalunaarusiaat tamaat uani atuaruk.