Nick Paasisavut 2023-mi ajugaavoq: Misigisaq nuanneqaaq!
Maanna Nickip ilisimatusartoqatini kajumissaarpai ukioq manna Paasisavut-mut, ph.d-t ilisimatusarfigisaminnik nunatsinni innuttaasunut saqqummiussillaqqinneqqusaateqataanissamut qinnuteqaqqullugit.
Allattoq Nicoline Larsen
Nick Duelund siorna ilisimatusarfigisanik saqqummiussillaqqinneqqusaannermut peqataaniarluni nalunaarami naatsorsuutiginngikkaluarpaa ilisimatusarfigisani soqutigineqarlualissasut. Unammeqataanikkulli soqutigineqarlualernera tupaallannaqaaq, ilisimatusartoq oqaluttuarpoq.
“Sulerinersugut maanilu nunatsinni suut ilisimatusarfiginerivut ilisimaneqaleriataarpoq. Nuanneqaaq,” Nick Duelund, kalaallit meerartaasa isigiarsunnerat pillugu ph.d.-nngorniutiminik saqqummiussigami Paasisavut 2023-mi ajugaasoq, oqarpoq.
Paasisavut ph.d.-nngornianik ph.d.-nngorsimasunillu Kalaallit Nunaanni ilisimatusartunik unammisitsineruvoq. 2024-mi novembarip 13-ianni toqqaannartumik aallakaatitsinikkut ilisimatusartut ilisimatusarfigisaminnik nunatsinni innuttaasunut saqqummiussillaqqinneqqusaatissapput. Katuami Nuummiittumi saqqummiussillaqqinneqqusaatitsisoqassaaq, KNR-ikkullu toqqaannartumik aallakaatinneqassaaq.
“Ilisimatusarfigisatit tunniusimaffigigukkit ilisimatusarninnillu pitsanngorsaanissamut piareersimaguit, taava Paasisavut 2024-mut peqataanissannik qinnuteqapallakkina.”
– Nick Duelund, Ph.d.
Ph.d.-nngorniutiminik tamanut paasiuminartumik oqaluttuarinnissinnaasoq ajugaatinneqassaaq.
Ilisimatusarninnik suli pitsaanerulersitsigit
Paasisavut-mi ajugaaniuteqataanissamut toqqagaasut tallimat ilisimatusarfigisanik saqqummiussinermik ilinniarsimasumit isiginnaartitsisartumillu sungiusarteqqissaarneqassapput, ph.d.-nngorniutiminnik sapinngisamik pitsaanerpaamik saqqummiussinissamut ikiorneqassallutik.
“Paasisavut-mi peqataanikkut pingaaruteqarluinnartumik paasisaqarpunga: ilisimatusarnerit naammassigukku imaanngilaq suliassaaruttutit. Ilisimatusarfigisanik innuttaasunut saqqummiunnissinikkut tunniussaqaqqinnissaq naammassinissatulli pingaaruteqartigaaq. Paasisavut-llu aqqutigalugu saqqummiussineq misigisaavoq nuannerluinnartoq, saqqummiussinnginnitsinni sungiusarneqarnerput torrallataaqimmat,” Nick Duelund oqaluttuarpoq.
Paasisavut-mi ajugaaniuteqataanissamik qinnuteqarnissamut killigitinneqarpoq septembarip 1-iat, 2024:
“Ilisimatusarfigisatit tunniusimaffigigukkit ilisimatusarninnillu pitsanngorsaanissamut piareersimaguit, taava Paasisavut 2024-mut peqataanissannik qinnuteqapallakkina.”
Ph.d.-nngorniat ph.d.-llu ukiut marluk kingulliit iluanni ph.d.-nngorniutiminnik tunniussisimasut silarsuarmit tamarmeersut Paasisavut-mi ajugaaniuteqataanissamut qinnuteqarsinnaapput, ph.d.-nngorniummi sammineqartoq Kalaallit Nunaannut tunngassuteqavippat.
Aggustip 6-ianni paasissutissiisoqarnerani paasisaqarnerugit
Paasisavut-mi peqataanissannut qinnuteqarnissat eqqarsaatigigukku Arctic Hub aggustip 6-ianni internetsikkut paasissutissiilluni ataatsimiisitsissaaq.
Ataatsimiinnermi qanoq qinnuteqarnissat ajugaaniuteqataasussatullu toqqagaagui suut qilanaarisinnaaneritit paasissutissiissutigineqassapput. Paasissutissiilluni ataatsimiisitsinermut peqataanissannut maana nalunaarit: https://www.paasisavut.gl/infomeeting.
Paasisavut pillugu paasisaqarnerorusukkuit www.paasisavut.gl alakkaruk.
![](https://arctichub.gl/kal/wp-content/uploads/sites/3/2024/07/Info-meeting-aspect-ratio-722-582-1.png)