Greenland Science Weekimi ilisimasanik silarsuarmut matut ammarneqarput. Silami issippoq, illulli iluani meeqqat inersimasullu paasisaqarusuttut silassorissut taama amerlatigisut ilisimasanut nutaanut aqqutissiuussileruttornerannik eqqarsaammik kissassersinnaallutik.
Allaatiginnittoq Niels Ole Qvist, Assiliisoq Leif Josefsen
Una allaatigisaq, siullermik aviisi paasissutissiissut “Ilisimatusarneq tamanut” Arctic Hub-imit, Sermitsiaq.AG suleqatigalugu, pilersinneqartumi saqqummersinneqarpoq.
Ullut 14-it ingerlaneranni pisussatut pilersaarutigineqartuni tunniunneqartut tassaasimapput filmit, oqalugiarnerit, assilisat pisoqartitsinerillu pissanganartut allat nunatsinni sumiiffinni arlalinni ingerlanneqartut – pingaartumik Nuuk aallaavigalugu.
Sammisat uummaarissumik paasiuminartumillu suliamut ilisimasaqartunit, suliaqarfigisaminnik pingaartitsilluinnartunit, ingerlateqqinneqarput. Arctic Hub, aaqqissuussinermut aaqqissuusseqataasoq, assersuutigalugu ilisimatusartunut arlalissuarnut qinnuiginnissimavoq ilisimatusaatiminnik aqqaneq-marlunnik ukiulimmut nassuiaanertut oqaluttuarinneqqullugit.
Ilaatigut »ilisimatusartut kinguaariit tulliuttut« ilisaritinneqarput, immap naqqata assiliorneqarnera itinersuarmilu uumassuseqartut oqalugiaatigineqarlutik. Kiisalu ilungersunarnerusuni angutit arnanut nakuusertarnerannut tunngasumik aaqqissuussineq ingerlanneqarluni.
Sammisat assigiinngiiaassuseqartorujussuupput – Ilisimatusarnermillu Festivali innuttaasunik suliaqartitsilerluni ilisimatusarnermilu periutsinut alutornartunut qanillisitsilluinnarluni.
Science Weekimiinnaanngitsoq ilisimatusartut assatik inuiaqatigiinnut isaattarpaat. Aamma unnuk kulturisiorfimmi Pinngortitaleriffik innuttaasunut ammatitsisarpoq ilaatigut eqalussuaq oqaluttuariniarlugu.
