Isumaginninnikkut ilisimatusarnerup Indiana Jonesimut akissutaatut Steven Arnfjord inuiaqatigiit atugarissaarfiusut orpippassuini angalasarpoq – nutaanik paasisassarsiorluni.
Allaatiginnittoq Niels Ole Qvist, Assiliisoq Leif Josefsen
Una allaatigisaq, siullermik aviisi paasissutissiissut “Ilisimatusarneq tamanut” Arctic Hub-imit, Sermitsiaq.AG suleqatigalugu, pilersinneqartumi saqqummersinneqarpoq.
Steven Arnfjord piffissat ilaanni tamaginni takussaasarpoq. Nukissaqarluarpasilluni ilisimatusartutullu uummateqarluni isumaginninnikkut aarlerinartorsiortunut kissalaartumik tillertumik.
Suleriaatsinni ilaatigooriarlutit sunniiniartartorpalaartutut pissuseqarpasittarputit. Tamanna ilisimatusartutut ajornartorsiutaava?
Steven Arnfjordip apeqqut illaatigaa.
– Sunniiniartartoq, aap. Isumaginninnermut politikkip iluani suliaqartilluni pissutsit tamatigut imaattassagunarput, avatangiisinit ilisimatusartoq »politikeriuniartumit« immikkoortikkuminaassinnaasarluni. Inuit ilaasa siutaanni immaqa sunniiniartartutut nipeqarsinnaavunga. Tamannalu skizofrenimik pissuseqartutut aamma misinnarsinnaasarpoq. Kisianni sulininni suleriaatsinut qanittuararsuujuaannarpunga, tamatumanngalu periuseq uppernassuseqalersinneqarpoq, Steven Arnfjord akivoq itisiliillunilu:
– Universitetip silataani silarsuarmut qanimut atassuteqarnermut aamma Kalaallit Nunaata taama ittuunera aamma pissutaavoq. Universitetimi mikisumi ilisimatusartutut iluaqutaasumik suliaqarnissamik pisussaaffeqarpugut. Pallittaalisami issiaannarsinnaanngilagut allaaserisanillu suliaqarluta, ingammik inunnik isumaginninnerup iluani, tamatumanimi pissusissamisoortumik suleriaatsinut qanittuararsuarmiittarpugut.
Periaaseq toqqaannartoq
Steven Arnfjord inunnik isumaginninnermut immikkoortortamut aamma Ilisimatusarfimmi Issittumi Atugarissaarnermik Ilisimatusarfimmut aqutsisuuvoq. Innuttaasunit angerlarsimaffeqanngitsut atugarisaannik ilisimatusaateqarnini ilisimaneqaatigineruaa. Inuit ilaatigut NoIni-p suppiliortarfiani nammineq kajumissutsiminik sulleqataasutut qanillisimasani.
Kisianni avammut sammisumik periaaseqarneranut aamma ilaasimapput meeqqat illersuisuannik sulianut tunngasuni siunersiueqatiginnittarneq aamma innuttaasut inunnut innarluutilinnut isiginnittaasiinik assigiinngitsunik qulaajaaniarluni misissuinermik suliaqarnissaq pillugu inuit innarluutillit illersuisuannik suleqateqarneq.
Suleriaasiani immikkut ilisarnaat tassaavoq, isumaginninnerup iluani ingerlatsisunik qitiusumiittunik ingerlaavartumik oqaloqateqarnera. Taamaalilluni iluaqutaassusilimmik naleqarneq qulakkeerneqarpoq. Ilisimatusarnikkut apeqquterpassuit apeqqutiginerinut akissutillu inuit ilaannit arlaannut atorneqarsinnaanerinik neriuutiginninnermut taarsiullugu ingerlatseriaatsimit akissutit suut ujartorneqarnerannik aamma misissuisarpoq.
– Ilisimasanik nutaanik sumerpiaq pisariaqartitsisoqarneranik qulajaasoqanngippat tamanna sianiilliornerussagaluarpoq, suliaqarfimmik tigussaasumik nalilersuinermut ikiuussinnaaniassagatta taamaalillutalu ajornartorsiutit ilaannik aaqqeeqataalluta, maluginiakkani tunngavigalugit oqarpoq.
