Maanna Paasisavut 2024-mut qinnuteqartoqarsinnaanngorpoq
![Paasisavut 2024](https://arctichub.gl/kal/wp-content/uploads/sites/3/2024/05/4.jpg)
Ph.d.-t ph.d.-nngorniallu nunanit tamalaaneersut Kalaallit Nunaanni Paasisavut-mi ilisimatusarfigisanik saqqummiussillaqqinneqqisaateqataanissamut maanna qinnuteqarsinnaanngorput. Juunip 1-ianni saqqummiussillaqqinneqqisaateqataanissamut qinnuteqartoqarsinnaanngussaaq, nunatsinnullu toqqaannartumik atassuteqartumik ph.d.-nngorniuteqartut ukiulluunniit marluk kingulliit iluanni ph.d.-nngorsimasut ajugaaniuteqataanissamut qinnuteqarsinnaapput.
”Paasisavut-mi ajugaaniutsitseqqissinnaanerput tulluusimaarutigeqaarput,” Jula Maegaard-Hoffmann, Arctic Hubip allattoqarfiani Paasisavut-mik aaqqissuiffiusumi pisortaasoq, oqarpoq.
Saqqummiussillaqqinneqqisaattoqassaaq Nuummi 2024-mi novembarip 13-ianni.
Ph.d.-nngorniutit minutsini 5-ini nassuiaruk
Ukioq kingulleq Paasisavut siullerpaamik ingerlanneqarpoq. Katuami saqqummiussisarfiit pingaarnersaanni ph.d.-nngorniat tallimat ilisimatusarfigisatik paasiumiunartumik aliikkusersuiutigalutik saqqummiuppaat, inersuarmi najuuttut tv-kkullu angerlarsimaffinni isiginnaaqataasut tamarmik paasisinnaaniassammassuk ilisimatusarfigisatik sooq taama pingaaruteqartiginersut.
Saqqummiussillaqqinnerpaatut toqqagaasoq 25.000 kroninnattorlu tassaavoq Nick Duelund Ilisimatusarfimmeersoq. Taassuma Kalaallit Nunaanni meeqqat isigiarsuttut pillugit ilisimatusarfigisani oqaluttuarigamigit naliliisartut isiginnaartullu ajasoortippai.
“Paasisavut-mi ajugaaniutsitseqqissinnaanerput tulluusimaarutigeqaarput”
– Jula Maegaard-Hoffmann
Maannalu ph.d.-nngornianik piginnaaneqarluartunik allanik ukioq manna Paasisavut-mi ajugaaniuteqataasussarsiulerpugut.
![](https://arctichub.gl/kal/wp-content/uploads/sites/3/2024/05/Tilfoj-en-overskrift.jpg)
Ilisimatusartut tallimat uku unammisitsinersuarmi 2023-mi peqataapput.
Assiliisoq: Emil Stach Nørgaard
Nunanit tamalaanit peqataaffigineqarsinnaasoq
”Kingullermik qinnuteqartut amerlangaarmata uissuummeqqaqaagut, naak Paasisavut siullerpaamik ingerlanneqaraluartoq. Taamaattumik ukioq manna qinnuteqartut qanoq amerlatigissanersut pissangageqaarput,” Jula Maegaard-Hoffmann oqarpoq.
Taassuma erseqqissarpaa ajugaaniunneq ph.d.-nut ph.d.-nngornianullu ilisimatusarfinni silarsuarmi sumiikkaluartuniluunniit allagartalinnut ukioq manna ammassasoq – tassa ph.d.-nngorniutigineqartoq Kalaallit Nunaannut toqqaannartumik tunngassuteqarpat ilisimatusarnerullu pingaarnersaa nunatsinni pisimappat.
Paasissutissiilluni ataatsimiisitsineq
Qinnuteqarnissamut killigitinneqarpoq septembarip 1-iat 2024. Tamatuma kingorna saqqummiussinermik pikkorissartitsisoqassaaq ajugaaniuteqataasussamut naleqqussakkamik, ajugaaniuteqataasussat saqqummiussassatik pillugit ilinniarsimasunik siunersiuisinnaallutik inuppassuarnullu saqqummiussinermi sungiusarneqassallutik.
Paasisavut pillugu paasisaqarnerorusukkuit www.paasisavut.gl alakkariuk.
Ajugaaniuteqataanissamullu qinnuteqarnissat eqqarsaatigigukku, taava Arctic Hubip internetsikkut juunip 6-ianni paasissutissiisitsinerani najuukkina. Nassuiarneqarumaarpoq qanoq qinnuteqartoqartartoq ajugaaniuteqataasussatullu toqqagaagaanni pikkorissartitsinerit qanoq ingerlasarnersut. Ugguuna najuunnissat nalunaarutigisinnaavat: https://www.paasisavut.gl/infomeeting
![](https://arctichub.gl/kal/wp-content/uploads/sites/3/2024/05/Titel-7-aspect-ratio-722-582.jpg)