Matematikkimi ligninngit imaannaanngitsut akvarelinngortinnerisigut Domino Jonesip neriuutigaa Kalaallit Nunaanni innuttaasut ilisimatusarnermini peqataatissallugit.
Allattoq Nicoline Larsen
Domino Jones ilisaritipparput. University of Liverpoolimi ph.d.-nngorniaavoq, tassanilu Kalaallit Nunaanni sermit iigartartut siunissami silap pissusianit qanoq sunnerneqarumaarnissaannik ilusilersugaqarpoq.
Taamatut allaaserineqarneratigut eqqaasavut siulliit tassaagunanngillat akvarelinik qalipakkat. Domino Jonesili pappiaqqat qalipaasiutillu sakkugalugit allanik ilisimatusarnermut peqataatitsiniarnermi nutaanik periaasissarsiorpoq.
“Takussaasut atorlugit attaveqatigeeriaaseq allanik peqataatitsiniarnermi sunniuteqarluartarpoq alapernaannissamut kajumissaarutaasarmat – alapernaannerpiarlu ilisimatusarnermi pingaarnersaalluni,” Domino Jones oqarpoq, tamanna pillugu aalajangersimasoq ph.d.-nngorniutiminik assiliartalersuilluni eqikkaaniarluni.
Matematik nuanneraluarpoq…
Domino Jonesip Kangiata Nunaata Sermia, nunatta kimmut kujataani sermersuit annersaat, ilisimasassarsiorfigaa. Taassuma sermip ukiuni 1000-ini kingullerni allanngoriartornera misissuiffigaa, sermillu silap pissusianit allanngorartumit piffissap ingerlanerani qanoq sunnerneqartarsimanerata misissuivigineratigut paasiniarsarissavaa siunissami qanoq sunnerneqarumaarnersoq.
Sammisani tigussaasuugaluartoq Domino Jonesip ilisimatusarnini qarasaasiap saavani ingerlannerusarpaa.
”Ilaannikkut sammisannit ungasissorujussuartut misigisarpunga. Ligninngerpassuit atuartarpakka ullorlu naallugu kisitsisit eqqarsaatigisarlugit,” Jones oqaluttuarpoq.
“Ilaanni misigilerpunga sermip assingi sammerpiarnagit matematikkitaa kisiat ukkataralugu. Imaanngilaq matematikki nuannarinngikkiga, nuannareqaara! Mannali ph.d.-nngorniutigaara sermit nuannareqigakkit. Taamaalillunga sammisannut atassuteqarluarumallunga assiliartalersuisalerpunga,” Domino Jones oqarpoq.
Ilisimatusartup assiliartalersuinini suliaminut nutaamik pullaveqalissutigiinnarnagu aamma suliniutimi allanut oqaluttuarinissaanut iluaqutigisarpaa.
”Atuagaateqarfimmi parkimiluunniit titartaarujoorajukkama inuit orniguttarput aperalutik suna titartarneriga, oqaloqatigiinnerillu sermersiornermut tunngalertuaannarput. Tamannalu pissarsiaqarluarnartaqaaq.”
Aajuna Domino Jonesip ph.d.-nngorniutiminik assiliartalersuilluni eqikkagaa. Allaaserisaq assit ataatungaanni nangissaaq…
