Hanne Aarslev Jensen Kalaallit Nunaanni inuussutissarsiortut toqqaannartumik peqatigalugit ilisimatusartutut suliaqarpoq. Arctic Hubimik isumassarsiaq nuannarilluinnarpaa. – Suleqatigiinnernut nutaanut ammaassivoq, oqarpoq.
Allaatiginnittoq Niels Ole Qvist0, Assiliisoq: Leif Josefsen
Una allaatigisaq, siullermik aviisi paasissutissiissut “Ilisimatusarneq tamanut” Arctic Hub-imit, Sermitsiaq.AG suleqatigalugu, pilersinneqartumi saqqummersinneqarpoq.
Royal Greenland aalisakkanik qalerualinnillu nunarsuarmi tunisassiortuni siuttuusunut ilaavoq Kalaallit Nunaannilu aningaasarsiornikkut suliffeqarfiit annersaralugu. Tamatuma qaavatigut suliffeqarfik nunat tamalaat akornanni ilisimatusarnikkut suliniutinut peqataanissamik kissaateqarpoq.
Royal Greenland allatut oqaatigalugu ilisimatusartumut Hanne Aarslev Jensenitut ittumut »ikiffigissallugu« pitsaalluinnartuuvoq.
– Suliniutima Royal Greenlandimut toqqaannartumik attuumassuteqarnera uannut pingaarutilerujussuuvoq. Suliffeqarfimmik taamaalilluni ilisimatusarninnik pisariaqartitsinera nuannerpoq, oqarpoq.
Danmarks Tekniske Universitetimi inuussutissarsiornikkut ph.d.-mik ilisimatusaatimi ilaatut ukiut pingasut ingerlaneranni Royal Greenlandimi suleqatigiinnik peqateqarluni raajat qalipaajarneqanngitsut avataasiorluni uutitikkat pitsaassusaannik suli pitsaanerulersitsinissamut periutsinik nassaarniarniarpoq. Tamanna suliffeqarfimmi tunisassianik pitsaassutsikkut qulakkeerinninniarnermik arlalippassuartigut suliaqartuartumi suliassaavoq pingaaruteqartoq.
Taassuma ilisimatusarnerata annerpaartaa universitetimi ingerlanneqassaaq, kisianni Hanne Aarslev Jensenip tamatuma saniatigut Royal Greenlandip Kalaallit Nunaanni suliffissuinut takuniaajartornissaa, ilaatigu Nuummi qullersaqarfimmut Tysklandimilu suliffissuarmut, pilersaarutaavoq. Minnerunngitsumillu ingerlatseqatigiiffiup avataasiorluni suliffissuinut angalaqataassaaq; raajarniussuarnut, Issittumi kuultimik aappaluaartumik qalluisunut.
Misigisassarsiornissaq tamanna aalisariutini inuuneq pillugu videofilminik isiginnaarnikkut piareersarfigaa iisartakkallu imaani angalanermi merianngunaveersaatit atornissaat isumaliutigalugu; paasissutissaq kingulleq taanna qungujulluni tunniunneqarpoq.
– Inuunera tamakkerlugu Kalaallit Nunaat alutorisorujussuusimavara. Taamaammat periarfissaq takkummat ilannguppunga. Royal Greenland suliffeqarfiuvoq alutornartoq, ilisimatusarnikkut suliniutinik ingerlataqartoqarneranik sungiusimanninnermik malunnaateqartoq, Hanne maluginiakkani tunngavigalugit oqarpoq.
