Regine Møller Paasisavut 2024-mi ajugaavoq

Regine Møller Aalborg Universitetimi ilinniartoq uummateqarfigisani pillugit isiginnaartunik killiivoq pingasunngormat unnukkut nunatsinni ilisimatusarfigisanik saqqummiussillaqqinneqqusaannermi Paasisavut 2024-mi ajugaagami.

Allattoq Rasmus Balle Hansen
Assiliisoq: Emil Stach

Regine Møller eqqumiitsuliamik 50.000 kroninillu akissarsitinneqarpoq.

Ukioq manna Paasisavut -mi ajugaasumik toqqaanissaq naliliisartunut pingasunut Nukâka Coster-Waldauimut, Minik Rosingimut Rosannguaq Rossenimullu imaannaasimanngilaq. Regine Møllerili Aalborg Universitetimi ph.d.-nngorniuteqartoq toqqagaavoq.

Pingasunngormat unnukkut Kalaallit Nunaanni ilisimatusarfigisanik saqqummiussillaqqinneqqusaannermi Paasisavut-mi ajugaavoq. Taassuma ajugaaniunnermi nunaqarfimmi Isortumi innuttaasut piujuartitsilluni ineriartortitsinermut isiginnittaasiat pillugu saqqummiussigami naliliisartunik ajasoortitsivoq.

Naliliisartut naliliinerminni ph.d.-nngorniutiminik uummateqarfigeqisaminik isiginnaartut killillugit saqqummiussinera immikkut maluginiarpaat.

“Tupigusoqaanga. Naatsorsuutiginngikkaluarpara,” Regine nuannaaqaluni oqaluttuarpoq nangillunilu:

“Ajugaanissara siunertarinnginnakku Isortormiut oqaluttuarerusuinnarsimavakka.”

Katuaq ilisimatusarneq pillugu isiginnaarianik ulikkaarpoq

Katuami inersuaq nunatsinni annersaasoq tusarnaarianik isiginnaarianillu qungujulaartunik ulikkaarpoq ajugaaniuttut tallimat tulleriiaarlutik scenemut sassarlutik ilisimasatik tamatta ilisimasassatsitut saqqummiummatigit.

“Nuannaarutigeqaarput ilisamatusarnermut tunngasunik aliikkusersuisoqarnerani nunatsinni inersuit annersaat ukioq mannattaaq ulikkaarneqarsinnaasimammat. Tassami ilisimatusarneq nuannaffiulluarsinnaavoq, unnummullu nuannaffioqaaq,” Nicoline Larsen, Arctic Hubimi Paasisavut-mik aaqqissuiffiusumi attaveqatigiinnermut akisussaasuusoq, oqarpoq.

”Aamma ajugaaniuteqataasortavut naliliisartullu tulluusimaarutigeqaagut. Peqataanngitsuuppatami Paasisavut ingerlanneqarsinnaassanngikkaluarpoq!” Paasisavut-mi ajugaaniuteqataasut, tamarmik ph.d.-nngorniuteqartuusut, ilisimatusarfigisatik aliikkusersuiutigalutik paasissutissiilluarlutik nunatsinni innuttaasunut minutsini tallimani saqqummiuttartussaavaat. Ukioq manna Paasisavut-mi Regine Møller saqqummiussilluarnerpaavoq.

Nunaqarfinnguamit kulturikkut pingaaruteqangaartumi oqaluttuassat

Regine Møllerip ilisimatusaatigalugu suliamini nammineq oqartussaaqataaneq piujuartitsillunilu ineriartortitsineq innuttaasunit qanoq isumaqarfigineqarnersut misissuivigaa.

Tunumi nunaqarfik Isortoq aallaavigalugu ph.d.-nngorniutimini misissuivigaa inuiaqatigiit inukitsut, kinaassuseq ileqqullu Kalaallit Nunaata siunissaanut qanoq sunniuteqangaarsinnaasut. Piniartutut inuuneq Kalaallit Nunaanni kinaassutsitsinnut tunngaviuvoq, aammali nunaqarfeeqqat piujuaannarnissaat nalorninartorsiortitsivoq.

Saqqummiussillaqqinneqqusaanneq sioqqullugu

Ulluni ajugaaniunnissaq sioqqullugu ajugaaniuteqataasussat tallimat inuppassuit saavanni sassarnermi ilinniartinneqarput saqqummiussinerlu ikittunik isiginnaartoqarlutik sungiusarsimallugu, Regine Møllerillu tamanna saqqummiussinermini iluaqutigisimavaa. “Paasisavut sioqqullugu Ane Marie Ottosenip ilinniartitsinera qujamasuutigeqaara. Tamatta ikiorlutalu tapersersorluaqaatigut,” Regine Møller oqaluttuarpoq.

Paasisavut 2026

Saqqummiussillaqqinneqqusaanneq isiginnaarsimanngikkukku immiussat KNR-ikkut kalaallisut danskisullu isiginnaarsinnaavatit. Paasisavut 2026-mi ingerlanneqaqqissaaq.

Ajugaaniunneq tamaat uani isiginnaaruk: https://www.youtube.com/watch?v=BF9NhesiSyo