United World Collegekkut kalaallit ilinniarnertuunngorniartut nunarsuarmut aallarlutik ilinniagaqarnissamut kulturinilu assigiinngitsuni ataatsimoorfimmut ilanngullutik inuunermi ikinngutitaarnissamut periarfissinneqarput.
Atuarfimmi marloriarluni Nobelip eqqissinermut nersornaataanut innersuunneqartumi atuartunik kulturinit allaneersunik peqateqarlutik nunat tamat akornanni apeqqutinik oqalliseqatiginniffigisinnaasanni atuarusussinnaavit?
Akissut aappiuppat, Upaluk Geisler Jensen Nuummersutut iliorlutit United World Collagemi (UWC), International Baccalauretemik (IB) nunanit 90-nit amerlanerusunik ilinniartulimmi ilinniarnissamut qinnuteqarsinnaavutit. Periarfissaq tamanna Kalaallit Nunaanni ilinniarnertuunngorniarfinni atuartunut tamanut periarfissaavoq, ukiullu tamaasa februaari qinnuteqarfissamut killigitinneqartarpoq.
”Nunani allani atuarlunga Kalaallit Nunaata avataani soqarnera takorusuttuaannarsimavara. Taamaaliornerlumi aamma uannut eqqortutut misinnarpoq,” Upaluk Geisler Jensen oqarpoq. Taanna 20-nik ukioqarpoq, 2024-milu Hollandimi IB-ni naammassivaa.
IB Kalaallit Nunaanni ilinniarnertuujunermut sanillersuunneqartarpoq, nunarsuarmilu tamani ingerlaqqiffiusumik ilinniarnissamut qinnuteqarnermi atorneqarsinnaalluni.
”UWC-mi nalinginnaasumik fagit arfiniliinnaat ilinniartitsissutigineqartarput, taamaalillunilu soqutigisaq aallulluarneqarsinnaasarpoq. Uanga nunarsuarmi politiki, eqqumiitsuliorneq tuluillu oqaasii aalluppakka” Upaluk Geisler Jensen oqaluttuarpoq.
Itisiliinissamut periarfissaq Nuummiumut inuusuttumut, Hollandimukarnissani sioqqullugu astrofysikimik atuarnissamik eqqarsartumut, annertuumik sunniuteqarpoq. Maanna taanna taarsiullugu Global Arts, Culture and Politicsimi Amsterdamimi ilinniarpoq.
”Nunarsuarmi pisorpassuaqarpoq, tamannalu iliuuseqaqataaffigerusuppara”
– Upaluk Geisler Jensen
Nunaanik ilisarisimasaqalerusuttoq
UWC Grønland stipendia, Upaluk Geisler Jensenip pissarisiaa ukiut 30-t sinnerlugit piuvoq. Ilinniartunut siullernut 90-kkunni nunarsuarmut aallartunut Aviâja Lyberth Lennert ilaavoq. Taanna ullumikkut Royal Arctic Linemi pisortamut tullersortaavoq.
”New Zealandimit paarlaateqatigiilluni ilinniarnermit uteqqammerpunga aallaqqillungalu inunnik nutaanik naapitseqqinnissamut annertuumik kissaateqarpunga, Aviâja Lyberth Lennert Nuummi umiarsualivimi allaffimmini oqaluttuarpoq.
Aviâja Lyberth Lennert Norgimukarpoq, tassanilu niviarsissat sisamat allat ineqatigai. Tassaniinneranilu ataatsimoorneq inuusuttoqatinullu nunarsuarmit tamanit assigiinngitsunik tunuliaqutalinnik naapitsineq nuannernerpaanut ilaasoq, Aviâja Lyberth Lennert nassuiaavoq, imalu nangilluni ”taamaalillunilumi qatanngutitaartoqartarpoq.” Qatanngutinilu maannakkut ukiut 30-t qaangiunneranni suli attaveqarfigai.
Ataatsimoornermik aallussineq suli UWC-p ilisarnaatigaa, tamannalumi aamma Upaluk Geisler Jensenip peqataasimanermini erseqqissaatigaa.
”Allanit annertuumik ilikkarnarpoq, nunarsuarmillu tamaneersunik inuunerup sinneranut ikinngutitaartornartarpoq” Aviâja oqarpoq.