Ulloriaq Grønvold politioreerluni atornerluinermik akiuiniarusunneq allanullu maligassiuerusunneq tunngavigalugit maanna Ilisimatusarfiup inatsisilerinermi kandidatut siullersaalluni naammassivoq.
Ulloriaq Ilisimatusarfiup kantiinaani inunnik ulikkaartumi soraarummeersimanermut uppernarsaatini tigujartorlugu sassarmat, peqataasut ersaattaallutik nillernertalimmillu pilluaqqusipput.
Tamanna pissutissaqarluarpoq. Ulloriarmi Ilisimatusarfiup inatsisilerinermi kandidatini siullersaaraat. Taamatuttaaq februarimi ukiuunerani soraarummeertut akornanni angutit pingasuinnaasimapput, arnalli 42-it naammassinnillutik. Ulloriaq aammattaaq kandidatinngortut akornanni agguaqatigiisillugu karakterinik qaffasinnerpaamik angusaqarpoq – tamannalu kingusinnerusukkut uterfigissavarput.
Ulloriaq anguniagaqarumatuujuvoq piumassuseqarluarlunilu. Tamanna meeraanermini Qeqertarsuarmi najugaqarsimaneranit aallaaveqarpoq. Tassani inuiaqatigiinni hashimik tuniniaaneq amerlasuunit nipaatsumik akuerineqartutut misigaa. Inersimasunngoramilu qanigisami ilaanni kinguaassiutitigut atornerlunneqarsimasoq paasivaa.
”Innuttaasut akornanni nipaatsumik akuersaarneqartutut ippoq… Taamaattussaannartut isigineqalersimavoq. Tamanna akiorniarlugu iliuuseqarusuppunga. Allanngueqataarusuppunga,” Ulloriaq oqarpoq.
“Tamanna akiorniarlugu iliuuseqarusussimavunga. Allanngueqataarusuppunga.”
– Ulloriaq Grønvold
22-nik ukioqarluni persuttaasimanermut suliami siullerpaamik unnerluussisunngortoq
2008-mi Nuummi politiinngorniarfimmi aallartippoq. Taamanikkut 22-nik ukioqarpoq. Ilinniarnerminilu aallartikkami eqqartuussivimmi unnerluussisartutut sassartalersimavoq.
Qaqortup politeeqarfiani praktikkerpoq, tassanngaanniillu Narsamut aallartinneqarluni, tassani angut persuttaasimasutut unnerluutigineqartoq pillugu eqqartuussisoqartussaammat. Ulloriaq aperineqarami suliaq taanna pillugu unnerluussisunngorsinnaanerluni, Politiit eqqartuussivimmi unnerluussisartutut sassartarnissaat nalinginnaasuummat, Ulloriaq akuersivoq suliassaanillu qanoq ingerlatsisarnissaminik ilitsersuunneqarluni.
”Eqqartuussisumut illersuisoq eqqaamavara. Misilittagaqarluarpasippoq, ernumaammeraluarpungalu ajugaaffigineqassanasoralunga. Taamaanngilarli, unnerluutigineqartorlu persuttaasimanini pillugu qaammatini arfineq-pingasuni pineqaatissinneqarsimasunut inissiisarfimmiittussanngortinneqarpoq.” Ulloriaq oqaluttuarpoq. Suliaq taanna qaquguluunniit puigunngisaannassallugu oqaatigaa.
”Suliaq aallaqqaataaniit misissorlugu aallartinneraniit, eqqartuussivimmi aalajangiisoqarnissaata tungaanut malinnaaffiginissaa immikkut pisinnaaneruvoq. Tamatuma kingorna suliaq naammassineqarsimaneranik misigisitsisarpoq, taamaalillungalu nalunngilara sulinera iluaqutaasimasoq.” Ulloriaq Grønvold oqarpoq.