Ukioq manna nunatsinni ilisimatusarfigineqartussat nunap assingani malinnaavigikkit
March 3, 2025
|
Written by Nicoline Larsen
Written by Nicoline Larsen
Ilisimatusartut nunarsuarmit tamarmeersut Kalaallit Nunaanni ilisimatusarnissamut pilersaarutitik internetikkut workshoppertitsinermi oqaluttuaraat. Maanna suliniutigineqartussat tamaasa nunap assingani malinnaavigisinnaanngorpatit.
Aasaru Uummannamiissaguit imaassinnaavoq ilisimatusartoq inuit Qilakitsumi timinut paniinnarnikunut isiginnittaasiinik misissuisoq naapikkit. Narsamiikkuilli tissiartaallu takugukku imaassinnaavoq taakku ilisimatusartuusut Protero-Litho2-mik taallugu geologiimik misissuinermik suliniuteqartut. Arlaat naapillugilluunniit takussagaluarukkit nunap assingani malinnaavissami Arctic Hubip tamanut ammasumik saqqummiussaani ujarsinnaavatit.
Aatsaat taama peqataasoqartigaaq
Paasissutissat nunap assinganut ilanngussassat katersorneqarput ukiumoortumik internetikkut workshoppertitsinersuarmi Arctic Hub Connectimi, Arctic Hubimit aaqqissuussaasumi. Ukioq manna ilisimatusartut nunatsinneersut nunanillu allaneersut Kalaallit Nunaanni ilisimatusarnissamik pilersaarutiminnik paasissutissiisut peqataapput.
“Ukioq manna Arctic Hub Connectimi aatsaat taama peqataasoqartigaaq. Tamanna nuannerluinnarpoq, Kalaallimmi Nunaannut iluaqutissaasumik ilisimatusarnissamik ilumoorluni soqutiginnittoqarneranut takussutissaagami,” Daniel Lyberth Hauptmann, Arctic Hubip allattoqarfiani pisortaagallartoq, oqarpoq.
“Arctic Hubimi Kalaallit Nunaanni ilisimatusarfigineqartut malinnaavigiuminarsarnissaat sulissutigaarput. Tamatuma saniatigut ilisimatusarnerit nunatsinni aallaaveqarluarnissaat kissaatigaarput. Taakkuupput marluk Arctic Hub Connectimut siunertaasut. Siunertallu taakku marluk qujanartumik eqqortinneqarput – aaqqissuussallu peqataaffigineqarluarneranit tamanna takuneqarsinnaavoq,” Daniel Lyberth Hauptmann oqarpoq.
Ilisimatusartut nunarsuarmit tamarmeersut Arctic Hub Connectimi naapeqatigiipput Kalaallillu Nunaanni ilisimatusarnissamik pilersaarutitik oqaluttuaralugit.
‘Uagut peqataatinnata uagut oqallisigineqartassanngilagut’ ilisimatusarnermi aamma atuuppoq
Ukioq manna Arctic Hub Connectimi Kalaallit Nunaanni ilisimatusarnermi oqallisigineqarnerusut ilaat sammineqarneruvoq, tassa Kalaallit Nunaanni ilisimatusarfigineqartunik Kalaallit Nunaat qanoq ’piginneqataanerulersinnaanersoq’. Tamanna paasisimasalinnik oqallitsitsinikkut pivoq ima qulequtalerlugu: “Nothing About Us Without Us – How can this principle be applied in research?” (’Uagut peqataatinnata uagut oqallisigineqartassanngilagut – najoqqutassaq tamanna ilisimatusarnermi qanoq atorneqassava?’)
Oqallitsitsisuupput Sara Olsvig, ICC-mi nunanut tamalaanut præsidenti, Lorenz Meire Ilisimatusarfimmi ilisimatusartuuneq kiisalu Aka Simonsen, UNESCO sinnerlugu aqutsisoq.
Oqallitsitsisut oqariartuutaasa pingaarnersaraat ilisimatusaatigalugu suliniuteqariartortut nunatta avataaneersut suliniutiminni maani innuttaasunik suleqateqartassasut – assersuutigalugu Kalaallit Nunaanni ilisimatusarnermik suliaqarfinnik suleqateqarnermikkut innuttaasunillu suliniuteqaqataasussatut atorfinitsitsinermikkut.
“Nuannaarutigeqaarput ukioq manna Arctic Hub Connectimik ingerlatsinitsinnut atatillugu oqallitsitsisinnaasimagatta. Pingaaruteqarpoq uagut qanoq ililluta Kalaallit Nunaanni ilisimatusarfigineqartunik ’piginneqataanerunissarput’ peqataatinneqarnerunissarpullu pillugit ilisimatusartut avataaneersut oqalliseqataanissaat, taakku allanngueqataasussaammata,” Daniel Lyberth Hauptmann, Arctic Hubip allattoqarfiani pisortaagallartoq, oqarpoq.
PAASISSUTISSAT:
- Arctic Hub Kalaallit Nunaanni ilisimatusarnermut attuumassuteqartunut tamanut attaveqatigiiffiuvoq. Allattoqarfik Nuummiippoq.
- Arctic Hub 2020-mi Kalaallit Nunaata Danmarkillu suleqatigiinneratigut pilersinneqarpoq nunanillu taakkunannga marlunnit aningaasaliiffigineqarluni.
- Arctic Hub Connect sisamassaa ingerlanneqarpoq. Ukioq manna februaarip 25-anni workshoppertitsisoqarpoq.
- Ilisimatusartut 132-t Arctic Hub Connect 2025-mut peqataaniarlutik nalunaarsimapput.
- Ilisimatusartut namminneq piumassutsiminnik Arctic Hub Connectimut peqataasinnaapput suliniutigisaminnillu nalunaarsuisinnaallutik.
- Arctic Hub Connectip saniatigut periarfissaavoq Isaaffik.org, paasissutissiinermut ilisimatusarnermilu aaqqissuussinermut attaveqaasersuinermilu atorneqartartoq.