Silap pissusia pillugu workshoppertitsineq: anorersuartillugu juullerpalaarneq

Nuup Katersortarfiani silap pissusia pillugu workshoppertitsisoqarmat qalipaatigissaartunik siaartartoqarpoq nerrivinniillutillu juulimaap assingi ullorissallu juullerpalaartut. Innuttaasut tamaanilu suliniuteqartartut silap pissusiata allanngoriartorneranik misigisatik oqaluttuariniarlugit aggiapput.

 

Allattoq Rasmus Balle Hansen

 

Silap pissusia pillugu workshoppertitsineq aallartingajalerpoq. Anorersuup ataani peqataajartortut 30-t missaanniittut issaapput. Igalaat saatsut silataanni anoraasuasaqattaarpoq. Taamatut silarlunnera sammisassatsinnut tulluartutut oqaatigineqarsinnaavoq – silap pissusiata allanngoriartornera oqallisigissagatsigu.

 

Nunalerinermut, Imminut Pilersornermut, Nukissiutinut Avatangiisinullu Naalakkersuisoq, Kalistat Lund, workshopperiartoqqusisuuvoq. Aallarniutigalugu taassuma aggiasut silarlukkaluartoq takkummata silallu pissusiata allanngoriartorneranut tunngatillugu misigisaminnik oqaluttuariartormata qutsavigai. Anguniagaavormi innuttaasut illoqarfinnilu suliniuteqartartut nuna tamakkerlugu silap pissusia pillugu periusissiamik nutaamik ineriartortitseqataanissaat, Kalaallit Nunaata Parisimi isumaqatigiissummut ilanngunnerata kingunerisaanik.

 

Unnummut tamatumunnga pilersaarut saqqummiunneqarpoq. Oqallissaarutaasussat pingasuupput: silap pissusia, silap pissusiata allanngoriartornera silallu pissusia pillugit periusissiat. Naggasiutigalugulu nerrivinni gruppikkuutaarluni suleqatigiinnissamut piffissaqassaaq.

Silap pissusia pillugu workshoppertitsinermi apeqqutit akisassat.

Assiliisoq: Rasmus Balle Hansen

Siunnersuutissaqarluarput

 

Nerrivinni tamani plastikkimik qallikkanik pappialaqarpoq pingasunik apeqqutitalinnik minutsini 30-ni suleqatigiilluta akisassatsinnik:

  1. Silap pissusiata allanngoriartornera qanoq misigiviuk?2
  2. Nunatsinni silap pissusiata allanngoriartornera iliuuseqarfigiumallugu susariaqarpugut?
  3. Nunatsinni silap pissusiata allanngoriartorneranut naleqqussarumalluta susariaqarpugut?

Minutsit 30-t taakku inersuarmilu inoqarpallaanngitsumi oqallinnerit aallartipput. Silap pissusiata allanngoriartorneranik misigisarpassuit assigiiaartortaqarlutillu assigiinngiiaartortaqarput. Pappiaqqamut plastikkimik qallikkamut anngajaamut akissutit tussimik qernertumik allattorneqarput. Akunnerup affaa qaangiummat allattuivissaqarpiarunnaarpoq.

 

Anorersuaq sakkortusiartorpoq

 

Arnaq nerriviit siulliit ilaanneersoq oqaluttuarpoq: ”Ukiuni 40-ni kingullerni sila allanngoriartorsimaqaaq,” imalu nangippoq: ”Siumut oqaatiginissaa ajornarnerulersimavoq.”


Arlallit tamanna pillugu isumaqataapput. ”Aamma silarluttarnerit sakkortunerulersimapput,” alla oqarpoq. Peqataasullu tamannattaaq pillugu isumaqataapput. Suli anoraasuasaqattaarpaluppoq. Nipikitsumik aperisoqarpaluppoq: ”Bussit suli ingerlanerlutik?”

 

“Sila allanngorartaqimmat pilersaarusiornissaq ajornakusoortarpoq, tamannalu aningaasatigut kingunerluttarpoq,” Christian Keldsen, Sulisitsisuni pisortaq, oqarpoq.

 

Taamaalilluni aningaasanut tunngasortaa oqallisigineqalerpoq. Unnuup ingerlanerani erseqqissivoq pingaartumik inuussutissarsiornermik suliallit katersortarfimmut juullerpalaartulersorneqarsimasumut aggialluarsimasut.

Nuup Katersortarfia kusassarsimasoq.

Assiliisoq: Rasmus Balle Hansen

Oqallisigissallugu mianernartoq

 

Pappiaqqami allattuiffissap naqqanut killippugut apeqqullu silap pissusiata allanngoriartornera qanoq iliuuseqarfigissaneripput sammineqalerluni.

 

Kalaallit Nunaanni CO2-mik aniatitsiffiunerpaasut tassaapput kiassarneq, assartuineq tunisassiorfissuillu. Taakku tamarmik ataatsimut CO2-mik aniatitsinerit 90%-iinik aniatitsisuupput, Avijâja Rosing-Olsen, Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmi specialkonsulentiusoq workshoppertitsinernilu Kalaallit Nunaata silap pissusia pillugu periusissiassaanik siullerpaamik suliarinninnermut ilaasuni ataqatigiissaarisuusoq oqaluttuarpoq.

 

“Nalunngilara oqallisigissallugu mianernartuusoq, nunaqarfinnulli assartuinermut orsussamik atuisorujussuuvugut,” oqartoqarpallappoq. Maanna anoraasuasaqattaarnera kisimi tusarsaalerpoq.

 

“Tamatuma oqallisiginissaa politikkikkut ammaffigineqarpa?” inersuarmiittut ilaat aperivoq.

 

Nuummiit sumiiffinnillu allaniit pissutsinik isiginnittaatsit ilisimaneqartutut assigiinngissinnaasarput. Taamaattumillu Nuummiinnaanngitsoq silap pissusiata allanngoriartornera pillugu innuttaasut oqalliffigisinnaasaannik workshoppertitsisoqassaaq. Novembarimi Tasiilami assingusumik workshoppertitsisoqarpoq, januaarimilu kujataani innuttaasut isummaminnik eqqartueqatigiissinnaassapput. Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmit naatsorsuutigineqarpoq 2025-p ingerlanerani Kalaallit Nunaanni sumiiffiit arlallit tikeraarneqarumaartut.

 

Ataatsimoorluni qitiutitaqarneq suliniutillu amerlanerusut

 

Apeqqutini pinaveersaartitsinermut tunngasumut killippugut. Nerriviit ilarpassuini naleqqussariaannaanissaq pingaaruteqartutut eqqartorneqarpoq. Silap pissusiata allanngoriartorneranut naleqqussarneqarsinnaasunik qanoq inissialiorlunilu umiarsualiviliortoqarnissaa ingammik sammineqarpoq.

 

CO2-mik aniatitsisoqartuassappat nunaqarfinni Kullorsuartut ittuni imaq ukiuni 70-ini tulliuttuni 2,7 meterinik appassaaq, Sacha Schiøtt Pinngortitaleriffimmi ilisimatusartoq oqaluttuarpoq. Kalaallit Nunaat nunarsuarmi sumiiffinnut ikittuinnarnut allanut immap appariartorneranik misigisaqartussanut ilaavoq. Sermersuummi aakkiartornera nilaminernik imerfimmit peersinertut sunniuteqassaaq. Iluliaqannginnerulerpat imaq appariartussaaq.

 

Innaallagissiuutit anorisaatit seqernullu qinngorneranik tigooraassutit peqataasunit siunnersuutigineqarput. Naggataatigut uparuarneqarpoq politikerit CO2-mik aniatitsinnginnerusunut aningaasaliissuteqarnissaq innuttaasunut pilerinarnerulersittariaqaraat.

 

Ilaat oqarpallappoq:“Uuliamik kiassaateqarneq kiassaateqarfimmit kiassarnermit akikinneruvoq.”

 

Unnummut qujanaq

 

Workshoppertitsineq naggaserneqarpoq. Naalakkersuisup Kalistat Lundip nikueqqilluni aggiasut tamaasa qutsavigai. Inuit nikuikaapput atisalersulerlutillu.

 

Bussit ingerlajunnaarnerat inersuarmiittunut nalunaarutigineqarpoq.

Naleqqussariaannaasoqarnersoq maanna paasinarsissaaq. Arnat ilaat aperivoq: ”Nuussuarmukartoqassava?” Angutit ilaat nappaavoq. Ikittunnguit anorersuarmut kigaatsumik aniakaapput.

 

Workshoppertitsineq qaangiuppoq angerlamullu angalaneq aallartilluni.

Kalaallit Nunaanni silap pissusiata allanngoriartornera pillugu paasisaqarnerugit

Kalaallit affaannaasa silap pissusiata allanngoriartornera inunnit peqquteqartoq ilisimavaat

Atuaruk