Nunap inoqqaavisa ilisimasaat ilisimatuutut sulinermut ilaasariaqarput
Kinaassuserput nalunngikkutsigu ilisimatuutut misissuinerup inuiaqatigiinnillu ineriartortitsinerup iluanni sivisuumik atasinnaasunik aaqqiisinnaavugut, Vivi Vold oqarpoq.
Allaatiginnittoq Phillippa Mangalika Maigaard Filtenborg
Ilisimatuutut misissuisut misissuinerminni Kalaallit Nunaanni inuiaqatigiinnit isiginniffimmit nunap inoqqaavisalu ilisimasaat ilisimatuutut sulinerminnut ilaatinngikkunikkit, taava paasisat sumiiffimmi inuiaqatigiinni sunniutikinnerulissapput. Vivi Vold, filmiliortartoq Ilisimatusarfimmiillu ilinniagartuujusoq taama isumaqarpoq.
Vivi Vold nassuiaavoq Kalaallit Nunaanni inuiaqatigiit ineriartortinneqassappata nunap inoqqaavisa tunngaviisa ilisimasaasalu iserfiginissaat akuerinissaallu pingaaruteqarluinnartoq. Tamannalu sumiiffinnut tamanut aamma atuuppoq.
”Inuup nammineq sinnattorisani pilersissinnaavaa nammineerluni kulturini ilisimaarillugulu paasisinnaaguniuk. Kulturikkut inuttullu tunngaviit ajunngikkuni, taava ilisimatuutut sulinermut atatillugu akissutissarpassuarnik tunniussaqarsinnaavutit,” Vivi Vold oqarpoq.
Vivi Voldip ilisimatuutut sulisut nunat allamiorpassuit naapittarpai ilisimatuutut misissuinerminni paasisaminnik Kalaallit Nunaannut naleqqussaaniartartunik, nunap inoqqaavi paaseqqaannguarnagit.
”Piujuartitsisumik pissuseqarneq kulturitsinni tunngaviuvoq. Pinngortitaq ataqqineqassaaq. Inoqativut ataqqissavavut. Pinngortitamut kulturimullu attaveqarnerput paasigaanni ajornartorsiutit inuiaqatigiinnit isiginniffinni tamaniittut pitsaanerusumik aaqqiivigisinnaavavut. Tamannalu aallaavigalugu ineriartorneq patajaatsoq pitsaanerusumik pilersissinnaallugu,” Vivi Vold oqarpoq.
Vivi Voldimut pingaarluinnarpoq sumiiffinni najugallit aamma nammineerlutik naleqarnertik ukkatarissagaat. Itisiliilluni oqarpoq sumiiffinni najugallit sulissutigissagaat naleqartitatik inuiaqatigiinni ajornartorsiutaasunut aaqqinnissamut naammattuusut ajunngitsunillu sakkussaasunik imaqartuusut. Kalaallit tunngavitsik paasigunikku aaqqiinernut patajaatsunut sivisuumillu atasinnaasunut sumiiffimmi inuiaqatigiinnut naleqquttunut ineriartorfissanik pilersitsissapput.
”Namminiussuseqaraanni aamma inuttut imminut ilisimasanillu pigisanik uummateqarluni ataqqinnikkaanni, taava aaqqiissutit naleqquttut, suleqatigiinnerit ineriartornissamullu periarfissat inuiaqatigiinnut kalaallinut iluaqutaasussat nassaarineqarsinnaanngussapput,” Vivi Vold oqarpoq.