Qiteraq illunik tuniniaasartuusimavoq – maanna uumassusilerisunngorniarpoq
May 8, 2025
|
Written by Christine Hyldal
Written by Christine Hyldal
Ukiut tallimat matuma siorna Qiteraq qinngamigut aalluni sakissamigullu anniarluni iterpoq. Maannali aqissiliakulalersimavoq, aqissiliarneq Ilisimatusarfimmi uumassusilerisunngorniarfimmut nutaami SILA-mi ilinniagassanut ilaammat.
Ullaakkut nalunaaqutaq arfineq-pingasuniit unnukkut nalunaaqutaq arfineq-pingasunut telefoni sianertarpoq. Illunik tuniniaasartup Qiteraq Eugeniusip tigujuaannarpaa.
Ukiumi 2020-mi Qiteraq illunik tuniniaasartutut ilinniakkamini naammasseqqammerpoq Nuummullu suliffittaarfimminut uteqqammerluni. Inissiamik nammineq najugassaminik pisisimavoq, illoqarfiillu pingaarnersaanni illorsuit portusuut nutaat amerliartuinnarput. Qiteraq angusaqarluarusoqaaq: Maanna illoqarfimmi matumani inissianik tuniniaaneq aningaasarsiutigerusuppaa.
Pilersaarutigisamisulli pisoqanngilaq.
“Sukkavallaamik akisussaaffippassuaqalerunarama,” ullumikkut oqarpoq, eqqaamavaami sivitsunngitsoq allaffimmi ingerlatsinermut akisussaasuusutut misigilerluni.
Ukiut tallimat matuma siorna Qiteraq qinngamigut aalluni sakissamigullu anniarluni iterpoq.
Maannali aqissiliakulalersimavoq, aqissiliarneq Ilisimatusarfimmi uumassusilerisunngorniarfimmut nutaami SILA-mi ilinniagassanut ilaammat.
Photo: Qiteraq Eugenius
Sinissaaleqisarneq
Tamakku ukiut tallimaannaat matuma siorna pipput, inuunerali allanngorujussuarsimavoq. Maanna illunik tuniniaasartut allaffiannukartarunnaarluni aappassaanik ilinniartunngorpoq laboratorianiikulasarlunilu. Ilisimatusarfimmi uumassusilerisunngorniarfimmi nutaami SILA-mi angajullersaavoq.
“Illunik tuniniaasartuujumalluni soorlumi misigittaatsuunissaq pisariaqartoq. Suliaq tamanna ingerlattuarumallugu isiginngitsuusaarsinnaanissaq pisariaqarpoq, uangali taamaassinnaanngilanga,” Qiteraq Eugenius 34-nik ukiulik oqarpoq.
Qiteraq misigivoq ilisimasalittut suliinnarnissaq sapernarsiartuinnartoq. Sullitani innimigisariaqartarlugillu piffissaqarfigisariaqartarpai. Taamaattumik soraareeraluaraangami ulapittuartarpoq aammalu illuserusuttut tuniniaarusuttullu apeqqutissarpassui akisariaqartarlugit. Kinguneranik sininnaveertalerpoq. Unnuillu ilaanni sakissamigut anniarluni qinngamigullu aalluni iterpoq. 2022-mi tamanna pivoq.
Nakorsap stressimik napparsimanerarpaa.
“Paasivarali aningaasat nuannaarnissamut pingaaruteqarpianngivissut. Sakkissakkut anniarluni qinngakkullu aalluni unnuakkut itertaraanni aningaasat pingaarnerpaajunnaartarput.”
– Qiteraq Eugenius
Qiteraq Eugenius suliunnaarpoq, inissiaq najukkani tunivaa angajoqqaaminullu nuulluni.
“Suli angajoqqaanni najugaqarpunga. Aningaasartuutinnik annikillisaavunga sulisariaqannginniassagama. Kiffaanngissuseqarlungalu pinngortitarsuarmiittarusukkama. Ilinniakkamilu SILA-mi taakku pingaarnersaapput,” oqarpoq.
Kalaallit Nunaanni uumassusilerisunngortussat siulliit
Ilaanni ineeqqamini Instagramimiittunik isiginnaarujoortilluni assit ilaat maluginiarpaa – Kalaallit Nunaanni uumassusilerinermi bachelorinngorniartoqarsinnaanngorsimaneranut tunngasoq. Ilinniagaq SILA-mik taaguuteqarpoq, qinnuteqarfigineqarsinnaanngorsimavorlu.
“Linki toorpara ilinniakkallu qanoq aaqqissuunneqarsimanera pillugu atuarlunga. Qulequtaa ‘Uumassusilerinermi bachelorinngorniarneq’ atuaannarlugu… uumassusilerinermi soqutigisariuaannarnikuuara,” oqaluttuarpoq.
“Soorlu uannut allagaasoq. Meeraallungali sissami aalisartarpunga, aalisakkat ammartertarpakka iloqutaat misissorlugit. Ilinniakkami tassani atuagarsornerit pinngortitarsuarmiinnernut laboratoriamilu misissuinernut ataqatigiissinneqartarput, pinngortitarsuarmiinnerlu misilittagaqarfigilluarpara. Aammali atuagarsorneq laboratoriamiinnerlu ilinniarfigisinnaalluaqaakka.”
Ilinniagaq SILA februaarip 1-ianni aallartippoq.
Uumassusilerinermi bachelorinngorniarfik nutaaq Ilisimatusarfiup Pinngortitaleriffiullu suleqatigiinneratigut pilersinneqarpoq.
Ilinniakkami innuttaasut amerlanersaasa misilittagareriigaat piginnaasareriigaallu aallaavigineqarput.
Tassa Kalaallit Nunaanni pissutsit piviusut tunngavigineqarput. Pikkorissarfissat ilaatigut ima taaguuteqartinneqarput: Tuttu, Appa, Siku, Puisi aamma Imaq.
Photo: Ilisimatusarfik
Aqqaneq-marluk ilinnialerput
Qiteraq nipituumik oqaluppoq illaqattaarlunilu. Oqaasissaaleqinngilaq. Tunuarsimaarutissaqanngilarlu inooriaatsini nutaaq nuannarigamiuk. Aamma soraarummeeruteqartilluni sapiutilertaraluarluni. Tamannali ilinniarnerup ilagiinnarpaa, uumassusilerisussanngortunillu ilinniartitseriaaseq nuannareqaa. Ilinniartitsissutigineqartummi pingaarnerpaamik atoriaannaasuupput.
“Atuakkamik atuartinnani sammineqartunik misissuisarneq inunnillu tamanna pillugu ilisimasaqartunik oqaloqateqarneq uagutsinnut uumassusilerisunngornianut kalaaliusunut pissusissamisoorsoraara,” oqarpoq.
“Misigaanga aliikkutaralugu sammisartagara massakkorpiaq ilinniagaralugu.”
– Qiteraq Eugenius
Ilinniartut aqqaneq-marluk ukioq manna februaarip aallaqqaataani ilinnialerput, ataaseq unippoq, ilinnialersullu tamarmik nunatsinneersuupput Qiteqqatorluinnaq pinngortitarsuarmiinnermi misilittagaqarluartut. Ilaat avannaaneersuupput, sinnerilu nunatta kitaaneersuullutik, oqaluttuarpoq.
“Nuummiuusupilussuuvunga. Sikorsuit arferillu pillugit ilisimasaqanngilanga, ilisimasatsinnilli avitseqatigiittarpugut.”
“Aamma aqissiliartarpugut, nuannisaqaagut. Misissuiartorluta pinngortitarsuarmut unnuiartortarnissarput qilanaareqaara.”
Kunngip immikkoortortaqarfimmi SILA-mi ilinniartut naapippai, taakkua silap pissusia, uumassusillit assigiinngisitaarnerat kiisalu inuit pinngortitallu ataqatigiinnerat ilisimatusarfigisarpaat.
Photo: Ilisimatusarfik
Aliikkutaralugu sammisartagara ilinniagarilerpara
Qiteraq Eugeniusilli illunik tuniniaasartut allaffiat qimavinngilaa. Suli tassani sulisarpoq, sapaatip-akunneranut ulluni marlunni piffissap ilaani sulilluni ilinniarnermini aningaasarsiorniassagami.
Massakkut inuunerit siornatigut inuunerisimasannit qanoq allaanerutigiva?
“Misigaanga aliikkutaralugu sammisartagara massakkorpiaq ilinniagaralugu, aliikkutarisartagarlu inuuniutigisinnaagaanni torraalluinnassaaq. Eqqarsartarnikuuvunga aningaasarsiorumallunga illunik tuniniaasartuusariaqarlunga. Paasivarali aningaasat nuannaarnissamut pingaaruteqarpianngivissut. Sakkissakkut anniarluni qinngakkullu aalluni unnuakkut itertaraanni aningaasat pingaarnerpaajunnaartarput.”
May 21, 2024
Maanna Kalaallit Nunaanni uumassusilerinermi bachelorinngorniarsinnaanngorputit
Read this story
October 21, 2024
Nukannguup Kalaallit Nunaanni inuit siulliit tikeraarpai
Read this story
March 21, 2025
Ilinniartorpaaluit imungarsuaq takorluugallit – Sisimiuni ingeniørinngorniarneq ima ingerlasarpoq
Read this story