Paasisavut 2026 maanna qinnuteqarfigineqarsinnaalerpoq
June 1, 2026
|
Written by Arctic Hub
Written by Arctic Hub
Ukioq manna aammaarlutik ilisimatusartut piginnaanillit ph.d.-mik ilisimatusarnertik pillugu kikkunnut tamanut paasiuminartumik saqqummiussillaqqinneqqusaallutik unammissapput.
Innuttaasunut tamanut Katuami ph.d.-mik ilisimatusarninnik saqqummiussinissannik takorluugaqaruit, maanna periarfissaqalerputit. Arctic Hub-ip ph.d.-tut ilinniartunut ph.d.-millu naammasseqqammersunut saqqummiussillaqqinneqqusaannermik unammisitsissutaa Paasisavut 2026 maanna qinnuteqarfigineqarsinnaalerpoq. Ajugaasoq 50.000 koruuninik akissarsisinneqassaaq.
“Paasisavut tassaavoq nunatsinni ilisimatusarneq pillugu innuttaasunut ingerlatitseqqiinissamut periarfissatsialaalluinnartoq. Tamaattumik Arctic Hub-imi ulloq manna qilanaarisimavarput, Paasisavut 2026-mut qinnuteqarnissamut ammaasinnaagatta,” Arctic Hub-imi allattoqarfiup pisortaa Avijâja Rosing-Olsen oqaaseqarpoq.
Paasissutissat
- Paasisavut ilisimatusarnermik saqqummiussillaqqinneqqusaanneruvoq Arctic Hub-ip aaqqissuussaa.
- Arctic Hub tassaavoq Kalaallit Nunaanni ilisimartusarnermut qitiusumik attaveqaataasoq, Kalaallit Nunaata Danmarkillu suleqatigiinnerisigut 2020-imi pilersinneqartoq. Allattoqarfik Nuummi inissisimavoq.
- Aaqqissuussineq ulloq 13. november 2026 Katuami ingerlanneqassaaq KNR-imilu toqqaannartumik aallakaatinneqassalluni. Isissutissanik tuniniaaneq
suli aallartinneqanngilaq.
- Paasisavut siullerpaamik 2023-imi ingerlanneqarpoq, Ilisimatusarfimmeersorlu Nick Duelund ajugaalluni.
- Arctic Hub soqutiginnittunut qinnuteqarnissamut paasissutissiinertalimmik ataatsimiisitsissaaq
ulloq 16. juni.
- Inaarutaasumik unammisitsinissamut peqataasussat september 2026-imi nalunaarutigineqassapput.
Ilisimatusartut tallimat, minutsit tallimat
Paasisavut-ip aaqqissuussaanera pisariitsuuvoq: Ilisimatusartut tallimat ilisimasatik pillugit kikkunnut tamanut paasiuminartumik saqqummiussillutik unammissapput – tamannalu minutsit tallimat iluanni pissaaq. Aaqqissuussineq Katuami ulloq 13. november ingerlanneqassaaq KNR-ikkullu toqqaannartumik aallakaatinneqassalluni.
“Maanna pingajussaanik Arctic Hub-ip Paasisavut ingerlatissavaa, ukiunilu siuliini qinnuteqaatinik pitsaasunik arlalinnik tigusaqartarsimavugut. Soorunami ukioq manna aamma taamaattoqarnissaa neriuutigaarput,” Avijâja Rosing-Olsen oqarpoq.
Unammisitsinermut peqataaniaraanni ph.d.-tut ilinniartuusariaqarpoq imaluunniit ukiuni kingullerni marlunni ph.d.-mik naammassinnissimasuussalluni. Tamatuma saniatigut ilisimatusarfiusoq nunatsinnut toqqaannartumik
attuumassuteqassaaq, suliniutillu pingaarnerit nunatsinni ingerlanneqarsimassallutik.
Ilisimatusartut nunatsinniit nunaniillu allaneersut qinnuteqarsinnaapput.
“Paasisavut tassaavoq nunatsinni ilisimatusarneq pillugu innuttaasunut ingerlatitseqqiinissamut periarfissatsialaalluinnartoq”
– Avijâja Rosing-Olsen
Paasisavut 2024-mi ajugaasoq Regine Møller naliliisartunik tupaallatsitsivoq 50.000 koruuninillu akissarsisinneqarluni.
Ilisimatusarneq nuannersoq, attortisimanartoq aliikkusersuisorlu
Paasisavut ukiut marlukkaarlugit Arctic Hub-ip aaqqissuuttarpaa. 2024-mi Aalborg Universitet-imi ph.d.-tut ilinniartoq Regine Møller unammisitsinermi ajugaavoq. Tassani Isortumi innuttaasut piujuartitsinermik ineriartortitsinermut isiginnittaasiat
pillugit ilisimatusarnini saqqummiuppaa.
“Ilisimatusarneq pikkunaatsutut imaluunniit paasiuminaatsutut isumaqarfigigukku, taava Paasisavut 2026 qilanaartuutigissavat. Tassanimi ilisimatusarneq nuannersumik, attortisimanartumik aliikkusersuisumillu
saqqummiunneqartarpoq,” Avijâja Rosing-Olsen oqarpoq.
Paasissutissat amerlanerusut qinnuteqarnissamullu periarfissaq www.paasisavut.gl-imi nassaassaapput. Paasisavut 2026-mi inaarutaasumik unammisitsinermut peqataaniarluni qinnuteqarnissamut killigititaq tassaavoq 1. september 2026.
Juunip 16-ni 2026, nal. 10.00 Kalaallit Nunaanni nalunaaqutaq malillugu, Arctic Hub-ip paasissutissiinermik ataatsimiisitsissaaq digitaliusumik ph.d.-nngorniunnissamut unammisitsinermi Paasisavut pillugu. Paasissutissiinermi ataatsimiinneq tuluttut ingerlanneqassaaq aamma Teams aqqutigalugu online-kut ingerlanneqassalluni – nalunaarit uani!
November 15, 2024
Regine Møller Paasisavut 2024-mi ajugaavoq
Read this story
May 28, 2025
Aalisartut piniartullu ilisimasaat aqqutigalugit pinngortitaq illersorneqassaaq
Read this story