Paasisavummi kingullermi ajugaasoq: Sapinngikkuma, illittaaq sapinngilatit!
June 11, 2026
|
Written by Arctic Hub
Written by Arctic Hub
Regine Møller 2024-mi Paasisavummi ajugaavoq. Maanna ph.d.-nngorniartut allat kajumissaarpai periarfissaq atorluarlugu Paasisavut 2026-mut unammisussanngorniarlutik qinnuteqaqqullugit.
“Sapinngikkuma, illittaaq sapinngilatit.”
Taamatut oqariartuuteqarpoq Regine Møller, 2024-mi Paasisavummi ilisimatusarnermik saqqummiillaqqinneqqusaannermi ajugaasoq. Tassani ilisimatusartut ph.d.-mut suliniutiminnik minutsit tallimat ingerlaneranni nassuiaasinnaanerminnik unammipput.
Arctic Hub ukioq manna Paasisavummut qinnuteqarnissamut ammaasseqqammerpoq, tamatumunngalu atatillugu Regine Møllerip ilisimatusartut kajumissaarpai periarfissaq atorluarlugu ilisimasaminnik Kalaallit Nunaanni innuttaasunut ingerlatitseqqeqqullugit.
Isortoq pillugu oqaluttuap saqqummiunneqarnissaanik kissaateqarneq
2024-mi Regine Møller Katuap inersuaani isiginnaarianik ulikkaartumi, KNR-imiillu immiunneqartumi, ph.d.-mut suliniutini kajumissuseqarfigilluarlugu saqqummiuppaa. Tassani Isortumi innuttaasut piujuartitsisumik ineriartornermut qanoq isiginnittariaaseqarnerat misissorpaa. Saqqummiussinera naliliisunit nuannarineqarluarpoq, taamaalillunilu 50.000 koruuninik aningaasartalimmik ajugaassutisivoq.
Paasisavummi peqataaniarluni qinnuteqarnermini ajugaanissaq siunertaralugu qinnuteqarsimanngilaq. Siunertaali pingaarneq tassaasimavoq Isortup oqaluttuaata saqqummiunneqarnissaa.
“Nunatsinni innuttaasunut tamanut ilisimatusarninnik avitseqatiginnikkusullunga, amerlanerusunullu saqqummeerusullunga, Paasisavummi peqataaniarlunga qinnuteqarsimavunga.” Regine Møller, Aalborg Universitetimi ph.d.-nngorniartoq oqarpoq.
Ilisimatusartut nunarsuarmi sumiiffinni tamaneersut qinnuteqarsinnaapput, taamaattorli makku piumasaqaataapput:
- Ph.d.-nngorniartuuvutit imaluunniit ph.d.-mik naammassinnissimavutit, kiisalu ukiuni kingullerni marlunni immikkut suliamik saqqummiussisimallutit.
- Ph.d.-mut suliniutit Kalaallit Nunaannut toqqaannartumik attuumassuteqarpoq.
- Ilisimatusarninni imaluunniit misissuininni pingaarutilinnik Kalaallit Nunaanni ingerlatsisimavutit imaluunniit ingerlatsinissat pilersaarutigaat.
- Ilisimatusarnermik ingerlatsivimmi imaluunniit ilisimatusarfimmi allatsissimavutit imaluunniit siornatigut allatsissimasuullutit.
Peqataaneq pissarsiaqarnarluartoq
Aningaasat ajugaassutisiassat saniatigut Regine Møller Paasisavummi peqataanermini aamma allanik pissarsiaqangaatsiarsimavoq.
“Paasisavummi peqataaneq inuttut suliamullu tunngatillugu ineriartorninnut pingaaruteqarluinnarsimavoq.” Regine Møller oqarpoq.
Paasisavummi unammisussatut toqqarneqaraanni Arctic Hubimit aaqqissuussamik immikkut pilersaarusiamik ingerlatsinermut peqataasoqartarpoq. Regine Møller immikkut pingaarutilimmik pissarsiarisimasaa tassaavoq paasissutissanik ingerlatitseqqiinermut immikkut ilisimasalinnik siunnersorneqarneq.
“Piareersarnerup tamaat attaveqatigiinnermut immikkut ilisimasalinnit ikiorneqartarpugut. Ilisimatusarnermik ajornakusoortumik qanoq ersarissumik paasiuminartumillu minutsit tallimat ingerlaneranni saqqummiussisoqarsinnaanersoq ilinniartippaatigut, kiisalu qanoq nammineq nipi, timikkut ussersorneq misigissutsillu atorlugit isiginnaartunik attaveqalersitsisoqarsinnaanersoq ilinniartippaatigut,” Regine Møller oqaluttuarpoq.
Paasisavummi unammisussatut toqqarneqartut tallimat nunanit, ilisimatusarnermik ingerlatsivinnik, ilisimatusarfinniillu assigiinngitsuneersuupput. Unammisitsinerugaluartoq, pitsaasumik toqqissisimanartumillu misigisaqarfiusimavoq, Regine Møller oqarpoq.
“Paasisavummi suleqatigiit nuannerluinnarput. Misigisarlu tamaat nuannaarutaallunilu pissarsiffiulluarpoq. Allaat ilaanni unammisitsinerusoq puigornarsisarluni,” Regine Møller oqarpoq.
Paasisavut 2024-mi ajugaasoq Regine Møller naliliisartunik tupaallatsitsivoq 50.000 koruuninillu akissarsisinneqarluni.
“Misigisarlu tamaat nuannaarutaallunilu pissarsiffiulluarpoq. Allaat ilaanni unammisitsinerusoq puigornarsisarluni”
– Regine Møller
Juunip 16-iani paasissutissiilluni ataatsimiinnermi paasisaqarnerugit
Paasisavummut qinnuteqarnissaq eqqarsaatigigukku, Arctic Hub juunip 16-iani nalunaaqutaq 10.00 (Kalaallit Nunaanni nalunaaqutaq naapertorlugu) internetikkut paasissutissiilluni ataatsimiititsissaaq.
Ataatsimiinnermi qinnuteqarnissamut qanoq ingerlatsisoqartarnersoq paasisaqarfigissavat, kiisalu inaarutaasumik unammisussatut toqqarneqaruit suna naatsorsuutigisinnaanerlugu tusagaqarfigalugu.
Paasissutissiilluni ataatsimiinnermi peqataanissamut uani nalunaarit.
Paasisavut pillugu annertunerusumik paasisaqarnerorusukkuit www.paasisavut.gl alakkaruk.
Paasisaqarnerorusuppit?
Juunip 16-iani paasissutissiilluni ataatsimiinnermi paasisaqarnerugit
Atuaruk
June 1, 2026
Paasisavut 2026 maanna qinnuteqarfigineqarsinnaalerpoq
Read this story
November 15, 2024
Regine Møller Paasisavut 2024-mi ajugaavoq
Read this story
