Nukannguaq Mathiesenip Kalaallit Nunaata avannaarsuani ilisimatusaatigalugu suliniummi ilisimatusartunut peqataagami ukiut 4.500-t matuma siorna najugaqarfiusimasut tikippai.
Allaaserinnittoq Christine Hyldal
Timmisartuaraq twin-otteri Tunup Avannaarsua qulaallugu ingerlaarpoq.
Nuna tamanna inoqajuitsutut qaarsorasaarpoq, qaqqallu qaavi toqqissuupput – Qaanaap eqqaani qaqqanut eqqaanarluinnarlutik.
Ilisimatusartorpaaluit nunatsinneersut, Norgimeersut, USA-meersut Danmarkimeersullu timmisartumut ilaapput. Ilaasut ilagaat Nukannguaq Mathiesen 33-nik ukiulik. Taanna ilisimatusartuunngikkaluarluni ilisimatusartunut ikiortitut angalaqataavoq.
Aggusti aallartilaareerpoq. Saarnginik meqqutiliat pillugit bachelorinngorniutiminik tunniusseqqammerpoq, qaammatillu ataatsip missaa qaangiuppat ilinniarnermini ingerlaqqissaaq, Ilisimatusarfimmi Nuummiittumi Inuiaat Kulturiat Oqaluttuarisaanerallu kandidatitut ilinniagarilissallugu.
Maannali Qalasersuarmit 800 kilometeriinnartut ungasitsigisumiittumi timmisartorluni angalavoq, sapaatillu-akunnerini tulliuttuni marlunni sinngupuulerluni tupermi sinittassaaq internetimullu attaveqarsinnaassanani.
– Inuunermi misigisama nalissaqanngilluinnartut ilagaat. Pikkunaqaaq, Nukannguaq Mathiesen oqarpoq.