Louise Pindstrup Scavenius ph.d.-nngorniutini ”Meeqqat atuarfianni meeqqat ulluinnarni misigisartagaat” illersorlugu Ilimmarfimmi saqqummiussissaaq tallimanngorneq 16. januar.
Meeqqat atuarfimmi qanoq misigisaqartarnerat pillugu misissuisimavoq. Meeqqat ilinniartitsisullu akornanni atuartitsinermi qanoq pisoqartarnersoq, qanorlu meeqqat atuarnerannut ilikkagaqarusussianullu isumaqarnersoq.
Louisep ph.d.-nngorniarnermini atuartitsinerup qanoq sunniuteqarnera ukkatarisimavaa, qanorlu atuartunit misigineqartarnersoq. Sulinermini atuartut angajulliit malinnaaffigisimavai (8. – 10. klassit, aaqq.) ulluinnarni atuartitaanerini malinnaaffiginerisigut, apersuinikkut kiisalu atuartut ilinniartitsisullu apersornerisigut.
Taakku saniatigut nuna tamakkerlugu apeqqutinik akisassanik atuisimavoq, atuartut atuarfitsik atuartinneqartarnerallu pillugit.
Ph.d.-nngorniarnissamut isumassarsineq
2017-imi Ilinniarfissuarmi atuartitseriaatsimik atuartitsilluni aallartikkami, ersarissisimavoq meeqqat atuarfiat pillugu ilisimasanik amigaateqartoqartoq, atuartitsineq ilikkagaqartarnerlu kalaallisut ingerlatsinermi. Ilisimatusarnikkut nunat tamalaat akornanni peqarluarpoq, kisiannili takusinnaallugu Kalaallit Nunaanni immikkut inissisimasoqartoq, paasissallugit pingaaruteqartoq meeqqat atuarfiat ineriartorteqqinneqassappat.
Ph.d.-nngorniarnermut soqutiginninneq sivisuumik pinngoriartorsimavoq. Louise ilikkartitsinermut, meeqqanut atuarfimmullu atuarluni aallartikkami immikkut soqutigisimavaa atuarfiup ilikkartarnerullu ataqatigiinnerat – ingammik sooq meeqqat ilaanni ingerlaannaq sunut tamangajannut ilikkartarnerat, ilaannilu sooq nunarsuarmi pikkunaannerpaatut inissisimasarnersoq.
– Iluaalliornera annertusiartorpoq nunatsinni oqartoqartarmat ”meeqqat atuarfii ingerlanerliorput” ilutigalugulu meeqqat atuarfiini atuartitsinermilu qanoq ingerlasoqarnersoq amigartumik sukumiisumillu paasisimasaqarfiginagu. Taanna peqqutigalugu sulerusulersimavunga, Louise oqaluttuarpoq.
Inuuneq alla
Taamatut paasinninneq aallaavigalugu ilisimatusarneq aallartippaa pissutsit itisilerumallugit.
Allaatigisap inernerata takutippaa ulluinnarni meeqqat atuarfianni atuartitseriaatsip qanoq inissisimanera, atuartut ilinniartitsisullu atuartitsinermi naapinneranni.
– Paasisaasa qitiulluinnartut takutippaat meeqqat atuarfimmi misigisaat allarujussuusut meeqqat atuarfiata avataani misigisaannut naleqqiullugit. Tamannalu isumaqarsinnaavoq meeqqanut atuarfimmi atuartitsinerullu siunertaat takujuminaassinnaasut, Louise oqaluttuarpoq,
Louisep meeqqat atuarfiat pillugu misigisaa tassaavoq sattaaserlunilusooq ingerlaneq, paasisarlu taanna atorlugu meeqqat atuarfiat pitsaanerusoq pilersinneqarsinnaasoq.
– Anigorniagassat tamarmik eqqartorpaat, kisiannili qanorpiaq iliortoqassanersoq ilisimaneqarani. Ilisimatusartutut allaatigisami ilisimasat saqqummiunneqarput meeqqat atuarfiat ineriartortinnissaanut atorneqarsinnaasut, isumaqarluarnerusumik kiisalu atuartut perusussusiisa qaffassarnissaanut ilinniakkamillu aallartitserusussusiinut, Louise oqaluttuarpoq.
Meeqqat atuarfiiniittarnermini Louisep nammineq atuartitsineranut iluaqutaasimavoq, meeqqat atuarfiani ulluinnarni ilisimasaqarluarneq aqqutigalugu, Ilinniarfissuarmilu atuartitsinerup ineriartortinnissaanut nukittorsarnissaanut atorneqarsinnaasunik.
– Neriuppunga paasisat nutaat meeqqat atuarfiata ineriartortinneranut iluaqutaajumaartut, taamaalilluni meeqqat isumaqarnerusumik pitsaanerusumik atuartalersinnaanerannut. Nammineq ilinniartitsisussanut atuartitsininni paasisat nutaat atorluarsinnaavakka ilinniartitsisunngortussanut meeqqanullu annguttussanngorlugit Louise oqarpoq.
Ajornaanngitsuinnaasimanngilaq
Ph.d.-liornermi atuarfinnut iserniarneq ajornarnerpaasimavoq.
Meeqqat atuarfii misissuinernut peqataatinniarlugit ajornakusoorsimavoq, siornatigummi misilittagarisimagamikku misissuisut ”katersipallariarlutik qimaguttarnerat (hit-and-run)”, ilisimatusartut paasisaminnik utertitsisannginnerat atuarfinnullu iluaqutaasussaagaluanik avitseqateqartarsimannginnerat. Aamma peqqutaaqataasinnaavoq meeqqat atuarfiini ulapinneq ilisimatusartumillu atuarfimmiittoqarnissaq merserisarlugu Louise oqaluttuarpoq.
Taamaakkaluartoq Louise tunuarsimaarsimanngilaq, meeqqat atuarfianni qanimut malinnaaneq pissanganartutut ilikkagaqarnartutullu misigisimagamiuk. Naapitai tamangajammik meeqqat atuarfianukartarput ulloq pitsaasumik ingerlakkusullugu.
– Meeqqat atuarfianni ulluinnarni ingerlanerannut isertinneqarluni misigisaq annertuujuvoq, ulluinnarni annikitsut annertuullu misigisartagaat takullugit. Inissaqarsimavoq atuartut anitsiarneranni annikikkaluarnik quijanartunik nalaataqartarneq. Ulluinnarni atuartitsinerup nalaani paatsooqatigiinneri pillugit illartarsimapput, meeqqat atuarfianni uummaarissumik naatsorsuutiginngisamik nalaanneqartartut ilanngullugit. Taamatut nalaataqartarnerit atuarfimmi uummaarissumi takutitsisarput.
Ulloq imaannaanngitsoq
Louisep ilisimatusartutut allaatigisaq 16. januar illersortussaavaa, qilanaaralugulu 2018-imiit suliarisimasami inerneri saqqummiutissallugit.
– Soorunami pissangavunga. Meeqqat atuarfiat amerlasoorpassuarnut pingaaruteqarmat, tamarmillu isumaqarfigalugu. Kisianni misigisimavunga piareersimallunga, neriuppungalu tigulluarneqarumaartoq, Louise qilanaartoq oqarpoq.
Arctic Hub-ip Louise iluatitsilluarnissaanik kissaatingaarpaa.