Maskinmesteri siulleq
Alfred Mølgaard Kalaallit Nunaanni ilinniartitseriaaseq nutaaq aallaavigalugu maskinmesterinngortuni siullersaavoq. Sapaatip akunnerani kingullermi taassuma ilinniarsimanermut uppernarsaatini Københavnimi Maskinmesterskolemi tiguaa.
Maskinmesterinngorniarluni ilinniarneq, Alfredip naammassisaa, ilinniartitseriaasiuvoq nutaaq Teknikimik Ilinniarfiup (KTI) Københavnimilu Maskinmesterskolimik suleqatigiillutik 2022-mi aallartitaat. Nunaqavissut amerlanerit ilinniartinnissaat nunatsinnilu suliffeqarnermut attuumassuteqarnerup nukittorsarnissaa anguniagaavoq.
Alfred 35-nik ukioqarpoq Qeqertarsuarmilu peroriartorluni. Portugalimi AFS-ersimavoq (2007-2008), Aasianni ilinniarnertuunngorniarfimmi atuarluni, maskinmesterinngorniarninilu sioqqullugu maskinentreprenøritut aatsitassarsiornermilu svenditut ilinniagaqarluni. Alfred Qeqertarsuatsiaat eqqaanni Aappaluttumi rubinisiorfimmi aamma sulisimavoq, Nuummilu mittarfiliornermik suliniummi sulilluni, tassanilu ukiuni marlunni qaqqamik 4 million kubikmeterimik qaartitereqataavoq.
Nalornisumik angertoq
Maskinmesterinngorniarnera ingerlaqqiffiusumik ilinniagaqarusunnermik aallartinngilaq. Sisimiuni KTI-mik ilinniarfiup periarfissamik neqeroorfigimmani nalornisunnguamik akuersivoq.
– Maskinmesterinngorniarnissara isumaliutigisimanngisaannarpara, KTI-llu attaveqarfigalunga ilinniarnissamik kaammattormanga tupaallattorujussuuvunga. Aatsitassarsiornermik ilinniarfimmi nalunngimmannga, ilungersorluartartutullu tunniutiinnartanngitsuusunga nalunnginnamikku taamaaliortut eqqarsarpunga, Alfred oqaluttuarpoq.
Aallaqqaammut maskinmesteri sulerisarnersoq ilisimarpiarsimanagu unneqqarilluni oqaluttuarpoq. Motoorinut tunnganerussagunartoq eqqarsarpoq, taamaammallu ilinniakkap qanoq siammasitsiginera tupaallaatigaa.
Sisimiunit Kongens Lyngbymut
Pitsianngitsoq Alfred Sisimiuni ilinniaqqilerpoq. Ulloq 15. august 2022 nunatsinneersut 13-t ilinnialerlaat peqatigalugit aallartippoq. Ilinniartitsinissamut pilersaarut malillugu nunatsinneersut 13-t tamarmik Danmarkimi, Kongens Lyngby-mi ilinniarnerminnik naammassiartortussaapput. Piffissap ingerlanerani Kalaallit Nunatsinnit ilinniartut
tallimaannanngorput. Naatsumik oqaatigalugu Alfred ilinniakkap naammassiartornerani atuaqatimini kiserngoruppoq.
Taamaatiinnartartut Alfredip paasilluarsinnaavai, atuarnermilu ingerlanerani nammineq aamma ilungersortaqaaq. Sisimiunimi sungiusimasat avatangiiseralugit Danmarkimi ilinniarneq allaanerujussuuvoq. Sisimiuni ataqatigiilluarput, ilinniartitsisuminnullu qanimut attaveqarlutik imminnullu tamarmik tapersersorput. Danmarkimi atuaqatigiit amerlanerulerput – ilinniartut 30-t missaat – ilinniarnermilu avatangiisit kulturilu allaanerusutut misinnarpoq.
– Avataani inissisimasutut misigisutut assersuunneqarsinnaalluarpoq. Uanga nammineq qallunaatut allannissamik oqalunnissamillu ilungersunartorsiorpunga, danskimmi oqaasii oqaasersiaraakka. Taamaammallu ilinniagassanik ilinniarneq tunniussassanillu suliaqarneq sakkortullunilu immikkut ilungersunartoq, Alfred oqaluttuarpoq.
Pisuusaarsinnaanngitsoq Ilinniarneq Alfredip tamakkiisumik aallussinissaanik pisariaqartitsiviusoq ersarippoq, tamannalumi ilinniarnermi nalaani suliffeqarnissamut nukissaqannginneranik kinguneqarpoq.
Sapaatit akunnerani nalunaaquttap akunneri tamakkerlugit innaallagissamik, innaallagissamik pilersuinermik, illup iluanik silaannarmik, nillataartitsinermi teknikimik, aqutsinermik imarsiornermilu ilinniagassanik – PLC-millu Progammable Logic Controllerimut naalisaataasumik, suliat immineq isumagisunngornerannut atuarneqarsinnaasumut alanngaarniarnermut atorneqartarput.
– Aallartissimasakka paaseqqaartinnagit allanik aallartitsisinnaasartuunngilanga. Pisuusaarnerlu ajorpunga – tassa paasinnittuusaarneq ajorpunga. Ilinniarneq sakkortuvoq piffissallu ilaani tunniutiinnangajappunga. Qujanartumillu immikkut akuerineqarpunga, toqqissillungalu ilinniarninnik nangitsisinnaanngorlunga, Alfred oqaluttuarpoq.
Tulluusimaarneq annerpaaq
Alfredip tunniutiinnartannginnera imminut akilerpoq, sapaatillu akunnerani kingullermi imminut maskinmesteritut taasinnaanngorluni ilinniakkamut allagartartaarpoq.
– Ilinniaqatigisanni pitsaanerpaanngikkaluarlunga ilinniakkannik naammassinninnera tulluusimaarutiginerpaavara. Maskinmesteritut ilinniarnima eqqarsartariaasera allanngortippaa. Aaqqiissutissanik nassaartoqartuaannarsinnaasoq, minnerunngitsumillu
maskinmesteritut ilisimasarilikkakka siammasissumik atorsinnaagikka uppernarsivara, Alfred oqarpoq.
Maskinmesterinngorlaatut pisortani namminersortunilu nunami imaanilu periarfissarpassuaqarpoq. Kilisaatiniissinnaavoq, Nukissiorfinni, Royal Arctic Linemi, Royal Greenlandimi, peqqissaavinni suliffeqarfinniluunniit namminersortuni. – Suliffigilersinnaasannut oqaloqateqarnissamut ammavunga, ilaannillu oqaloqatiginnereerpunga. Maannali anersaartulaaqqaassaanga ilinniarninnillu naammassinera ilorrisimaarutigilaassavara, maskinmesterinngorlaaq nuannaaqisoq tulluusimaaqisorlu oqarpoq.