Kalaallit NunaatSocial Science

Innuttaasut nunatsinnut qaninnerusunik suleqateqarusunnerupput

Kalaallit Nunaanni innuttaasut nunanik nunatsinnut qaninnerusunik suleqateqarusunnerupput. Tamanna nunanut allanut politikkimut tunngasunut isiginnittaaserineqartut pillugit misissuinermi Nasiffimmit ingerlanneqartumi paasineqarpoq.

 

Allattoq Kevin McGwin

 

Kalaallit Nunaanni innuttaasut nunanut allanut politikkimut tunngasunut isiginnittaasiannik misissuineq nutaaq tamanut saqqummiunneqaqqammerpoq. Misissuineq Nasiffimmit – nunanut allanut sillimaniarnermullu ilisimatusarfimmit – ingerlanneqarpoq, ukiullu pingasut matuma siorna innuttaasut sammisat taakku pillugit isumaat misissuivigineqaqqaarput.

 

2021-miilli allanngulaartoqarsimavoq – annersaalli suli taamanisulli iinnarput – NATO, EU nunallu sanilerisat Issittumi Siunnersuisoqatigiit, ’issittumi iligiinnik’ taaneqartartut, suli Kalaallit Nunaanni innuttaasunit suleqatigiumaneqarnerupput.

 

Ilisimatusarfimmi saqqummiunneqarput

 

Misissuinermi paasisat Ilisimatusarfimmi Nuummiittumi sisamanngornermi decembarip 12-ianni ilisimatusartunit misissuinermik ingerlatsisunit, Rasmus Leander Nielsenimit Maria Ackrénimillu, saqqummiunneqarput. Saqqummiunneqartullu Mininnguaq Kleistimit Naalagaaffinngornissamut Nunanullu allanut Naalakkersuisoqarfimmeersumit oqaaseqarfigineqarput.

Rasmus Leander Nielsen aamma Maria Ackrén, misissuinermik ‘The Second Foreign and Security Policy Opinion Poll in Greenland’-imik ingerlatsisuupput, tassanilu innuttaasut nunanut allanut sillimaniarnermullu politikkimut tunngasut pillugit isumaat paasisaqarfigineqarsinnaapput.

 

Assilisaq: Ilisimatusarfik

 

Misissuineq ‘The Second Foreign and Security Policy Opinion Poll in Greenland’-imik  taaguuteqarpoq, tassanilu innuttaasut nunanut allanut sillimaniarnermullu politikkimut tunngasut pillugit isumaat ukiullu pingasut matuma siorna misissuisoqaqqaarneranit qanoq allanngorsimanersut paasisaqarfigineqarsinnaapput.

Nalinginnaasumik isiginnittaaserineqartut aatsaat paasisaqarfigaavut

 

Paasisanit erserpoq nunanut allanut tunngasut, ilaatigut USA-mut Kinamullu attaveqarnerit, inatsisiliortunit tusagassiuutinilu suli sammineqangaatsiaraluartut nunatsinni naalakkersuineq innuttaasunit isumakuluutigineqarnerpaasartoq.

 

Rasmus Leander Nielsenip, innuttaasunik misissuinermik siullermik pilersitseqataasup tupiginngilaa ulluinnarni ajornartorsiutit, soorlu inuuniarnermi aningaasartuutit, Kalaallit Nunaanni innuttaasunit suli isumakuluutigineqarmata. Misissuinermili erseqqinngilaq Issittumi aaqqiagiinnginnerit nunanilu allani akerleriinnerit nunanut allanut sillimaniarnermullu politikkimut isiginnittaaserineqartunut qanoq sunniuteqarsimanersut.

 

“Inuit Issittumi Siunnersuisoqatigiit, USA, Kina EU-lu pillugit qanoq isumaqarnersut ilisimaneqarluanngilaq,” Rasmus Leander Nielsen oqarpoq.

 

“Takusinnaavarput inuit nunanut allanut tunngasut eqqumaffigisaraat, eqqumaffigigaluaraangamikkilluunniit nunaminnut qaninnerpaasut suli pingaarnerutittarpaat.”

“Takusinnaavarput inuit nunanut allanut tunngasut eqqumaffigisaraat, eqqumaffigigaluaraangamikkilluunniit nunaminnut qaninnerpaasut suli pingaarnerutittarpaat”

– Rasmus Leander Nielsen

Nalunaarsukkani takutinneqarput 2021-mi 2024-milu innuttaasut isumaat naapertorlugit nunat sorliit Kalaallit Nunaata suleqatiginerussagai – suleqatiginnginnerussagaaluunniit.

 

Takussutissiat nalunaarusiameersut: ‘The Second Foreign and Security Policy Opinion Poll in Greenland’

Kinap Kalaallit Nunaannut tunngatillugu siunissami inissisimaffissaa

 

Rasmus Leander Nielsen isumaqarpoq Kalaallit Nunaat nunanut allanut politikkip tungaatigut Danmarkimit attaveerukkiartuinnartillugu misissuinermi paasisat aalajangiisartunut qinersisartunullu paasissutissiisarneq eqqarsaatigalugu pingaaruteqarnerujartuinnassasut.

 

Tamatumunnga takussutissaasinnaasut ilagaat Kalaallit Nunaata sinniisoqarfinnut amerlatsikkiartortunut attaveqartarnerata oqallisaanera. Kalaallit Nunaata sinniisoqarfia nutaanerpaaq Beijingimiippoq, misissuinermili apeqqutinik akisisut affaasa kissaatigaat Kinamut attaveqarunnaamisoqassasoq.

 

Innuttaasunik peqataatitsinissaq pingaaruteqassaaq

 

Rasmus Leander Nielsenip immikkut maluginiagaannut ilaavoq Issittumi Tunngaviusumik Ilinniarfittaamut isiginnittaaserineqartoq. 2021-mi misissuinermi misissuinermilu kingullermi matumani inuit amerlanersaat nunatsinni sakkutooqarnissamut akuersaanngillat. Qularnartoqartitsisoqaqqaariarlunili issittumi tunngaviusumik ilinniarneq Danmarkimi illersornissaqarfiup nunatsinnilu oqartussaasut suleqatigiinnerisigut neqeroorutigineqartoq soqutigineqarnerujartuinnarpoq.

 

“Ilinniagaq akerleriissutaariarluni iluatsilluavippoq inuit paasileramikku sakkutuujunissaq pineqanngitsoq,” Rasmus Leander Nielsen oqarpoq. ”Taamaalilluta paasivarput inuit sammisanik taakkuninnga soqutigisaqartut, aammali naligineqartutut peqataatinneqarusuttut.”

 

Misissuinermi Nasiffik – Nunanut allanut sillimaniarnermullu ilisimatusarfik – sinnerlugu Danmarkimi misissueqqissaartarfimmit Epinionimit ingerlanneqartumi Kalaallit Nunaanni apeqqutinik akisisut 702-t isiginnittaasii saqqummiunneqarput.

 

Asseq qulleq: Nalunaarusip ‘The Second Foreign and Security Policy Opinion Poll in Greenland’-ip saqqaa.