Immap sarfaasa pingaarnerit ajalusuungajalernerat aaqqinneqarsinnaanngitsunik kingunipiloqartussaq silap pissusia pillugu Nuummi ataatsimeersuarnermi sammineqartuni isumaqatigiinngissutaavoq.
Allaaserinnittoq Rasmus Balle Hansen
CO2-mik aniatitsinerput annikilliserujussuanngikkutsigu Atlantikup avannarpasissuani immap sarfai, AMOC-imik taaneqartartut, ajalusoorsinnaapput. Tamanna pippat Alaskami silaannaap nillerneratulli Europap avannarpasissuani sila nillernerujussuanngussaaq. Ajalusoornera 2057-imiit aallartilereersinnaavoq.
Allaaserisami ilisimatusarneq pillugu atuagassiami Nature Communicationsimi 2023-mi juulimi saqqummersumi tamanna isummiunneqarpoq. Taassuminngalu allaaserinnittuupput Peter Ditlevsen, Niels Bohr Instituttimi Københavns Universitetimiittumi professoriusoq aamma Susanne Ditlevsen, Institut for Matematiske Fagimi Københavns Universitetimiittumi professoriusoq.
“Inuit tamanna pillugu pimoorussilersittariaqarpavut. Ukiummi 30-t qaangiuppata suli maaniissaagut,” Peter Ditlevsen oqaluttuarpoq.
Allaaserisaq taamanimiilli tusagassiuutini soqutigineqarluarsimavoq nunarsuarlu tamakkerlugu pingaarnertut allaaserineqartarluni.
Ilisimatusartulli tamarmiunngitsoq allaaserisami isummiunneqartunut isumaqataapput. Ajalusoortoqangajalerneranik qularinnittut ilagaat immamik ilisimatusartoq Hjálmar Hátún Havstovan – Faroe Marine Research Institute-imeersoq.
”Taama pisoqarnissaa ilimananngilluinnarsoraara,” Hjálmar Hátún, ilisimatusarnermini AMOC-imittaaq misissuisartoq, oqarpoq. Taassuma isummiunneqartoq tamanna ingasaassaasoraa. Isumaqataavorli CO2-mik aniatitsinitsinnik annikillisaasariaqartugut, silarsuarmi silap pissusianut, ilaatigut Grønlandspumpimut taaneqartartumut immamik nillertumik kujammut ingerlaartitsisartumut, ajortunik sunniuteqarpallaaqimmat.
AMOC (tuluttut: Atlanic Meridional Overturning Circulation)
Atlantikup avannarpasissuani immap sarfai sarfarpassuupput ingerlaaqatigiittartut. Sarfat taakkua imaq kissartoq avannaanut assartortarpaat imarlu nillertoq sarfat immap naqqatigoortut aqqutigalugit kujammukaattarlugu. Golfstrømmi sarfanut ilisimaneqarnerpaanut ilaavoq, sarfarpassuilli allat ilaat ataatsimut tassaapput Atlantikup avannarpasissuani immap sarfai.