Ilisimatusartut ukioq manna pilersaarutitik saqqummiuppaat – uani tamaasa takukkit
March 11, 2026
|
Written by Nicoline Larsen
Arctic Hub Connect nunatsinnit nunanillu allanit ilisimatusartut katersorpai. Tassani ukioq manna ilisimatusarnissamut pilersaarutitik avitseqatigiiffigaat – maannalu uani taakku tamaasa takusinnaavatit.
Aasaanerami nunami sungaartoq aappaluaartunik atikkersorsimasut takukkajuttarpagut. Ilisimatusartulli taakku kikkuuppat, sulerippallu? Tamanna Arctic Hubip 2026-mut ilisimatusarnernik ingerlatanut saqqummiivia takullugu maanna akissutissarsisinnaavat.
Una toorlugu 2026-mut ilisimatusarnermik ingerlatsinernut nunap assinga interaktiivi takuuk.
”Aammaarluta ilisimatusartut aatsaat taama amerlatigisut ataqatigiissaarinermi workshopertitsinitsinni Arctic Hub Connectimi peqataasoraagut. Tassani ukioq manna ilisimatusarnikkut suliassatut pilersaarutitik avitseqatigiissutigaat, taakkulu innuttaasunut takusassiarisinnaanerat nuannaarutigaarput”, Avijâja Rosing-Olsen, Artic Hubimi allatseqarfimmi pisortaq oqarpoq.
Ilisimatusartut nunarsuarmit tamarmeersut attaveqaatikkut kaffisoqatigiinnermi katersuuttut
Ilisimatusartut 159-t nunarsuarmit tamarmeersut ulloq 5. marts Arctic Hubip attaveqaatitigut workshopertitsineranut peqataaniarlutik nalunaarput. Ilaat unnuaannarmi makillutik peqataanertik pissutigalugu angisoorsuarmik kaffisorfeqarput.
”Naak ilisimatusartut nunarsuup immikkoortuinit assigiinngitsunit peqataagaluarlutik, ilisimatusartunik allanik 2026-mi Kalaallit Nunaanni ilisimatusarnermik ingerlatsinissamik aamma pilersaaruteqartunik naapitserusupput. Immaqa arlaat assingusunik pilersaaruteqarput? Immaqalu ingerlataminnik ataqatigiissaarisinnaapput? Suut tamarmik Arctic Hub Connectimi ajornanngillat”, Avijâja Rosing-Olsen oqarpoq.
Ilisimatusarfiup rektoria unammillernartunik periarfissanillu paasissutissiivoq
Pilersaarutip ilaatut Mari Kleist, Ilisimatusarfimmi rektori Kalaallillu Nunaanni Ilisimatusartut siunnersoqatigiiffianni siuttoq, nunatsinni ilisimatusartut unammilligassaat periarfissaallu pillugit oqalugiarpoq. Naak ataatsimoorfiit nutaajukanneraluartut, ilisimasanik katersineq avitseqatigiinnerlu ileqqutoqaasoq, taassuma erseqqissaatigaa.
”Universitetit Issittumut – nunarsuullu sinneranut – takkunnerat sioqquterujussuarluguli, Kalaallit Nunaanni inuit kinguaariinni ilisimasanik katersillutillu ingerlatitseqqiisartut”, Mari Kleist oqarpoq.
Avijâja Rosing-Olsenip rektorip ilisimasaminik peqataasunut avitseqateqarnera nuannaarutigaa.
”Maani Kalaallit Nunaanni nunarsuarmi ilisimatusartunit soqutiginninneq annertooq misigaarput. Qanoq ililluta ilisimatusarneq Kalaallit Nunaannut tunngaannarani, aammali Kalaallit Nunaat peqatigalugu pillugulu pinissaata qulakkeernissaa maani nunarsuullu sinneranit ilisimatusartunut pingaaruteqarpoq. Arctic Hub Connect oqaloqatigiinnissamut periarfissaavoq immikkuullarissoq”, Avijâja Rosing-Olsen naggasiivoq.
Ukioq manna Mari Kleist, Ilisimatusarfimmi rektori Kalaallillu Nunaanni Ilisimatusartut siunnersoqatigiiffianni siuttoq, pingaarnertut oqalugiartuuvoq.
Faktaboks:
- Ilisimatusartut 159-t 2026-mut Arctic Hub Connectimut peqataaniarlutik nalunaarput.
- Arctic Hub Connect tallimassaa ingerlanneqarpoq. Ukioq manna workshop ulloq 5. Marts ingerlanneqarpoq.
- Arctic Hub Kalaallit Nunaanni ilisimatusarnermut akuusunut tamanut attaveqatigiiffiuvoq. Allatseqarfik Nuummi inissisimavoq.
- Arctic Hub 2020-mi Kalaallit Nunaata Danmarkillu peqatigiillutik pilersippaat, nunanillu taakkunannga aningaasalersorneqarpoq.
- Ilisimatusartut Arctic Hub Connectimut peqataanerat suliniutiminnillu nalunaarsuinerat, nammineq piumassuseq malillugu pisarpoq.
- Arctic Hub Connect saniatigut aamma Isaaffik.org piuvoq, attaveqatigiiffik ilisimatusarnermik pilersuinermi attaveqaatinillu paasissutissanik avitseqatigiiffittut ataqatigiissaariffittullu atorneqartartoq.
- Arctic Hub Connectip nunap assiutaanut linki: https://padlet.com/arctichub/arctic-hub-connect-2026-1b9rns8mgtszr139
