Sapaatip-akunnerani matumani ilisimatusartut nunanit tamalaaneersut Greenland Science Conferencemi katersuutissapput Kalaallit Nunaanni ilisimatusarnerup suleqatigiissutigilluarneqarnerulernissaa siunertaralugu.
Kalaallit Nunaanni ilisimatusarnissamik soqutiginnittoqarluarnera qanoq ililluni nunatsinni naleqalersillugulu iluaqutaalersinneqarsinnaava?
Tamanna ilisimatusartunit, ilinniartunit aalajangiisartunillu nunat tamalaat ilisimatusarneq pillugu ataatsimeersuarneranni, Greenland Science Conference 2025-mi, oqallisigineqartussat ilagaat. Tamannalu pissaaq Katuami novembarip 12-ianni 13-iannilu Arctic Hubimillu aaqqissuunneqarluni.
Nunanit 22-neersunit peqataaffigineqassaaq
Greenland Science Conference 2025-mut peqataaniarlutik nalunaartut 350-init amerlanerupput nunarsuarmilu sumiiffinnit assigiinngitsorpassuarneersuullutik. Ataatsimeersuarneq nunanit 22-nit peqataaffigineqassaaq. Peqataasussani Kalaallit Nunaanneersut Danmarkimeersullu amerlanersaapput, aammali Canadamit, Islandimit, Japanimit, USA-mit, Nigeriamit Savalimmiunillu peqataasoqassaaq.
“Qiimmaallannaqaaq takullugu taama amerlatigisut Greenland Science Conferencemi peqataanissaminnik pingaartitsisimammata. Tassannga erserpoq Kalaallit Nunaanni ilisimatusarneq pingaaruteqaqisoq – nunatsinniittunuinnaanngitsoq, silarsuarmulli tamarmut,” Avijâja Rosing-Olsen, Arctic Hubip allattoqarfiani pisortaq, oqarpoq.
“Greenland Science Conferencemi pingaarnersaavoq inuiaqatigiittut ajornartorsiutitsinnut aaqqiissutissarsiornissaq. Aaqqiissutissarsiumalluni ingerlatsivittut akunnitsinni nunallu killeqarfii akimorlugit suleqatigiittariaqarpugut,” Avijâja Rosing-Olsen oqarpoq.